កីឡាជាតិ
ជាតិ
ទោះបីចាញ់វៀតណាមតែគ្រូបង្វឹក U17 កម្ពុជាថា សមត្ថភាពកើនឡើង
× ទោះបីក្រុមកីឡាករជម្រើសជាតិអាយុក្រោម១៧ឆ្នាំកម្ពុជា(U17)ប្រកួតចាញ់វៀតណាមនាជំនួបមិត្តភាពអន្តរជាតិក៏ដោយ គ្រូបង្វឹកក្រុម U17 កម្ពុជាហាក់ពេញចិត្តចំពោះទម្រង់ និងសមត្ថភាពរបស់កូនក្រុម។ សម្រាប់គ្រូបង្វឹក U17 កម្ពុជា ក្រុម U17 វៀតណាមមានសមត្ថភាពខ្ពស់លើការស៊ុតបញ្ចូលទី។
គ្រូបង្វឹកក្រុមជម្រើសជាតិអាយុក្រោម១៧ឆ្នាំកម្ពុជាលោក Inoue Kazunori នៅតែលើកសរសើរថា ក្រុម U17 កម្ពុជាមាន បច្ចេកទេស និងសមត្ថភាពរីកចម្រើនខ្លាំងបើធៀបទៅនឹងឆ្នាំមុន។ ការលើកឡើងបែបនេះ នាសន្និសីទសារព័ត៌មានក្រោយក្រុម U17 កម្ពុជាចាញ់ U17 វៀតណាម ៤-០ ក្នុងជំនួបមិត្តភាពអន្តរជាតិអបអរខួប៥០ឆ្នាំនៃទំនាក់ទំនងការទូតកម្ពុជា-វៀតណាម។
ទន្ទឹមនឹងនេះ គ្រូបង្វឹកក្រុម U17 វៀតណាមលោក Phan The Hieu មើលឃើញមិនខុសគ្នាពីគ្រូបង្វឹកកម្ពុជានោះទេ ដោយលោកបានអះអាងថា U17 កម្ពុជាមានការរីកចម្រើនគួរឲ្យភ្ញាក់ផ្អើលបើធៀបទៅនឹងការជួបគ្នាកាលពីឆ្នាំមុន។ លោកបានចាត់ទុកជ័យជម្នះរបស់ U17 វៀតណាមជាសំណាងដែលសល់ពីការដាក់សម្ពាធរបស់ក្រុមកម្ពុជា។
តាមរយៈការប្រកួតដ៏ស្វិតស្វាញក្រោមក្រសែភ្នែកទស្សនិកជនរាប់ម៉ឺននាក់នៅពហុកីឡដ្ឋានជាតិ ក្រុម U17 កម្ពុជាបានប្រើភាពជាម្ចាស់ផ្ទះបង្កើតឱកាសមាសយ៉ាងច្រើនមកលើក្រុមភ្ញៀវ U17 វៀតណាម តែធ្វើមិនបានសម្រេច។ ជាមួយគ្នានេះ គ្រូបង្វឹក U17 កម្ពុជាទទួលស្គាល់ថា កម្ពុជានៅមានចំណុចខ្វះខាតផ្នែកស៊ុតបាល់បញ្ចូលទី។ កត្តានេះជាហេតុធ្វើឲ្យវៀតណាមដែលមានសមត្ថភាពខ្ពស់លើការសម្រេចទីអាចបំប៉ោងសំណាញ់ទីកម្ពុជាបានជាច្រើនគ្រាប់។
ទាំងគ្រូបង្វឹកក្រុម U17 កម្ពុជា និង U17 វៀតណាមសុទ្ធតែបានអះអាងថា ជំនួបមិត្តភាពនេះជាឱកាសមួយដ៏ល្អសម្រាប់កីឡាករក្នុងការដកស្រង់បទពិសោធន៍ ដើម្បីអភិវឌ្ឍន៍សមត្ថភាពរបស់ពួកគេ។ លោករំពឹងថា ការប្រកួតនេះនឹងជួយពង្រឹងវិស័យកីឡាបាល់ទាត់របស់ប្រទេសទាំងពីរមានការរីកចម្រើនកាន់តែខ្លាំង៕
Tag:
បាល់ទាត់
U17 កម្ពុជា
Inoue Kazunori
© រក្សាសិទ្ធិដោយ thmeythmey.com