ជាតិ
បទយកការណ៍ / បទសម្ភាសន៍
សេដ្ឋកិច្ច
យុវជនមិនគួរយកលុយទៅសាកបើកអាជីវកម្ម ដោយត្រឹមតែចង់បានបទពិសោធនោះទេ
× ភ្នំពេញ៖ លោក ហេង ម៉េងហូ អគ្គនាយក្រុមហ៊ុនសន្តិសុខ លីប្រា ដែលធ្លាប់ឆ្លងកាត់ជីវិតជាបុគ្គលិកស៊ីឈ្នួលគេ និងបើកអាជីវកម្មខ្លួនឯងជាច្រើនឆ្នាំ បានផ្ដល់ជាយោបល់ថា យុវជនមិនគួរយកប្រាក់កាក់ទៅប្រថុយប្រថានលើការវិនិយោគអាជីវកម្ម «ដោយរំពឹងថាទោះលទ្ធផលយ៉ាងដូចម្ដេចក៏ទទួលបានបទពិសោធន៍ធ្វើជំនួញដែរ» នោះឡើយ។
សំឡេងបទសម្ភាស ៖
លោក ហេង ម៉េងហូ មានប្រសាសន៍ថា ចំពោះយុវជនដែលជាកូនអ្នកមានទ្រព្យច្រើន ការសាកល្បងធ្វើជំនួញ មិនសូវជាបញ្ហាទេពេលបរាជ័យ។ ប៉ុន្តែចំពោះអ្នកដែលពុំសូវមានដើមទុន មិនគួរសាកល្បងបើកអាជីវកម្មទាំងខ្លួនខ្វះបទពិសោធ និងសមត្ថភាពសមល្មម អាចរុញច្រានមុខជំនួញរបស់ខ្លួនដើរទៅមុខ នោះឡើយ។
សហគ្រិនរូបនេះ លើកឡើងថា ការបោះទុនពេលវេលា និងថវិកា ដើម្បីកសាងសមត្ថភាព គឺជារឿងចាំបាច់ណាស់។ លោកថ្លែងយ៉ាងដូច្នេះថា៖«ពិសេសអ្នកជាប់សែស្រឡាយចិនជំនាន់មុន បញ្ជូនកូនរបស់ខ្លួនឲ្យទៅធ្វើការឲ្យគេ វិនិយោគលើចំណេះដឹង រៀនឲ្យចេះសិន បើបើកហាងកាហ្វេ តើគេបើកយ៉ាងម៉េច?»។
អ្នកខ្លះបើកអាជីវកម្មដោយឈូឆរតាមគ្នា ហើយពេលខ្លះត្រូវបោះបង់ជំនាញដែលខ្លួនមិនទាន់រៀនចប់ ឬការងារទៀតផង ដែល លោក ហេង ម៉េងហូ ថានេះជាហានិភ័យខ្ពស់។ លោកបញ្ជាក់ថា ការមានគំនិតធ្វើជំនួញតែម្យ៉ាង មិនទាន់គ្រប់គ្រាន់ដើម្បីអាចបើកអាជីវកម្មមួយទទួលជោគជ័យនោះទេ គឺគេត្រូវមានសមត្ថភាពគ្រប់គ្រងសហគ្រាសរបស់ខ្លួនថែមទៀតផង។
ចុះសួរថាបើចាប់យកឱកាសធ្វើជំនួញ ដោយបោះបង់ជំនាញនៅសាលា ឬការងារដែលខ្លួនទើបចូលបំពេញ ប្រាកដថានឹងបរាជ័យឬ? លោក ហេង ម៉េងហូ ឆ្លើយតបត្រង់ចំណុចនេះថា មានឧទាហរណ៍របស់មហាសេដ្ឋីលើពិភពលោកមួយចំនួនដែរ ដែលពួកគេអាចធ្វើបានជោគជ័យ ដោយសារឱកាសនិងទេពកោសល្យ។ ប៉ុន្តែលោកបញ្ជាក់ថា មនុស្សដូចអ្នកទាំងនោះមានតិចតួចណាស់។ លោកបន្តថា គេពុំអាចវាស់វែងសមត្ថភាពរបស់ខ្លួនផ្អែកលើសញ្ញាបត្រនៅសាលារៀន ឬបទពិសោធការងារច្រើនឆ្នាំ ដើម្បីសម្រេចចេញធ្វើជំនួញនោះទេ។ បើឃើញឱកាស ហើយខ្លួនមានចំណេះជំនាញ និងភាពប៉ិនប្រសប់គ្រប់គ្រាន់ នោះជាពេលល្អដើម្បីធ្វើអាជីវកម្ម៕
© រក្សាសិទ្ធិដោយ thmeythmey.com