អន្តរជាតិ
អូស្ត្រាលីផ្តល់ជំនួយ៧០ ម៉ឺនដុល្លារដល់ប្រជាជនហ្វីលីពីនរងគ្រោះនៅក្រុង Marawi រូបភាព៖ ABS-CBN
× រដ្ឋាភិបាលអូស្ដ្រាលីឧបត្ថម្ភអាហារ និងរបស់របរជាច្រើនទៀតដែលគិតជាទឹកប្រាក់ប្រហែល ៧០ ម៉ឺនដុល្លារអាមេរិកដល់ប្រជាជនដែលរត់ភៀសខ្លួនពីទីក្រុង Marawi ដោយការការប្រយុទ្ធគ្នារវាងកងម្លាំងរដ្ឋាភិបាល និងក្រុមជ្រុលនិយមរដ្ឋឥស្លាម។ ថវិកាទំហំប្រហែល ៧០ ម៉ឺនដុល្លារអាមេរិកនេះជាជំនួយបន្ថែមលើជំនួយ ៣០ លានដុល្លារដែលអូស្ត្រាលីសន្យាផ្តល់ឲ្យហ្វីលីពីនកាលពីខែមីនាឆ្នាំមុន។
ជំនួយជាច្រើនសន្ធឹកសន្ធាប់មានទាំងចំណីអាហារនិងរបស់របរប្រើប្រាស់មានតម្លៃ៧០ម៉ឺនដុល្លារអាមេរិកត្រូវបានអូស្ត្រាលីផ្តល់ជូនប្រជាជនហ្វីលីពីនដែលរងគ្រោះដោយសារការប៉ះទង្គិចគ្នាដោយអាវុធនៅក្រុង Marawi។
សារព័ត៌មានហ្វីលីពីន ABS-CBN ផ្សាយថា រដ្ឋមន្ត្រីការបរទេសអូស្ដ្រាលីលោកស្រី Julie Bishop បានរៀបរាប់ជំនួយដែលអូស្ត្រាលីផ្តល់ឲ្យនោះមានតង់ កន្ទេល ម៉ុង ម្សៅសាប៊ូ ពិល កញ្ចែសម្រាប់ហៅរកជំនួយ សំលៀកបំពាក់ ស្បៀងអាហារមានទំហំ ៥០០ តោន រួមជាមួយឧបករណ៍ផ្សេងទៀតជាច្រើន។
រដ្ឋមន្ត្រីរូបនេះបានបន្តទៀតថា រដ្ឋាភិបាលអូស្ដ្រាលីគាំទ្រការប្រឆាំងភេរវកម្មរបស់ហ្វីលីពីន និងការបញ្ចប់ការបះបោរដោយក្រុមជ្រុលនិយមនៅកោះមិនដាណាវ។ កាលពីខែមីនាអូស្ដ្រាលីបានសន្យាថាជួយហ្វីលីពីន ៣០លានដុល្លារគាំទ្រការស្វែងរកសន្តិភាព ហើយជំនួយលើកនេះជាជំនួយបន្ថែមពីលើអ្វីដែលអូស្ត្រាលីបានសន្យាកាលពីខែមីនាដែរ។
រដ្ឋមន្ត្រីក្រសួងរូបនេះបានថ្លែងថា៖«រដ្ឋាភិបាលអូស្ដ្រាលីប្តេជ្ញាគាំទ្រការស្វែងរកសន្តិភាព និងការអភិវឌ្ឍនៅកោះមិនណាដាវដែលជាកិច្ចការដ៏សំខាន់ក្នុងការរក្សាស្ថិរភាពនៅហ្វីលីពីនទាំងមូល។ រដ្ឋាភិបាលអូស្ដ្រាលីនឹងបន្តសហការជាមួយហ្វីលីពីនដើម្បីកម្ចាត់ក្រុមភេរវជនក្នុងតំបន់»។
ការហ៊ុមព័ទ្ធ និងការប្រយុទ្ធគ្នារវាងកងទ័ពហ្វីលីពីន និងក្រុមជ្រុលនិយមឥស្លាមដើម្បីដណ្ដើមយកក្រុង Marawi មកវិញបានបង្កការភ័យខ្លាចដល់ប្រទេសនានាក្នុងតំបន់។ គេភ័យថា ក្រុមភេរវជនដែស្ហ (Daesh) អាចនឹងដណ្តើមយកតំបន់ភាគខាងត្បូងហ្វីលីពីនដែលសម្បូរដោយប្រជាជនម៉ូស្លីមធ្វើជាទីតាំងរបស់ខ្លួន។
ការប្រយុទ្ធគ្នារវាងកងទ័ពហ្វីលីពីន និងក្រុមភេរវជនមានភក្តីភាពចំពោះក្រុមដែស្ហ កើនឡើងកាន់តែខ្លាំងឡើងនៅថ្ងៃ ២០ ខែមិថុនា ដោយទាហានរដ្ឋាភិបាលបង្កើនការវាយប្រហារទាំងលើគោក និងពីលើអាកាសផង។ កងទ័ពហ្វីលីពីនមានបំណងបោសសម្អាតក្រុមភេរវជននេះឲ្យអស់មុនពេលបុណ្យបួស Ramadan ចប់ផងដែរ។ គិតត្រឹមថ្ងៃអង្គារ ទី២០មិថុនា មនុស្សជាង ៣០០នាក់បានស្លាប់ដោយសារការប្រយុទ្ធគ្នានេះក្នុងនោះមានក្រុមភេរវជន ២៥៨នាក់ ទាហានរដ្ឋាភិបាល ៦៥នាក់ និងជនស៊ីវិល២៦នាក់ដែរ៕
Tag:
អូស្ត្រាលី
ហ្វីលីពីន
Marawi
Jolie Bishop
© រក្សាសិទ្ធិដោយ thmeythmey.com