អន្តរជាតិ
ប្រជាជនពិភពលោកនឹងកើនដល់៩,៨ពាន់លាននាក់ត្រឹមឆ្នាំ២០៥០ ហើយឥណ្ឌាវ៉ាដាច់ចិន
× យោងតាមសេចក្ដីរាយការណ៍អង្គការសហប្រជាជាតិ ចំនួនប្រជាជន ពិភពលោកដែលបច្ចុប្បន្នមានត្រឹម ៧,៦ពាន់លាននាក់នឹងកើនឡើងដល់ ៩,៨ពាន់លាននាក់ត្រឹមឆ្នាំ២០៥០។ អ្វីដែលសំខាន់ ឥណ្ឌានឹងជំនួសតំណែងមហាយក្សចិនក្នុងនាមជាប្រទេសដែលមានប្រជាជនច្រើនជាងគេត្រឹមឆ្នាំ ២០២៤ ខាងមុខនេះដែរ។
គិតត្រឹមឆ្នាំ ២០៥០ ចំនួនប្រជាជនពិភពលោកនឹងកើនឡើងដល់ ៩, ៨ពាន់លាននាក់ឯណោះ។នេះជាការវាយតម្លៃរបស់អង្គការសហប្រជាជាតិតាមរយៈរបាយការណ៍មួយដែលចុះផ្សាយថ្ងៃ ២១ ខែមិថុនា។
របាយការណ៍ដែលចងក្រងឡើងដោយនាយកដ្ឋានកិច្ចការសង្គមនិងសេដ្ឋកិច្ចអង្គការសហប្រជាជាតិ បានកត់សម្គាល់ថា ឥណ្ឌាបច្ចុប្បន្ន(២០១៧)ដែលជាចំនួនប្រជាជនច្រើនលំដាប់ទីពីរពិភពលោកនឹងវ៉ាដាច់ចំនួនប្រជាជនចិន ក្នុងរយៈពេលតែប្រាំពីរឆ្នាំប៉ុណ្ណោះ។
សូមបើកវង់ក្រចកនបន្តិចដែរថា បច្ចុប្បន្នឥណ្ឌាមានចំនួនប្រជាជន១,៣ពាន់លាននាក់ ខណៈឯចិនមានចំនួនប្រជាជនចិន ១,៤ពាន់លាននាក់។ ដូច្នេះហើយនៅឆ្នាំ ២០២៤ ឥណ្ឌានឹងជំនួសតំណែងចិនក្នុងនាមជាប្រទេសមានប្រជាជនច្រើនជាងគេវិញម្តង។
យោងតាមរបាយការណ៍ដដែល ចំនួនប្រជាជននីហ្សេរីយ៉ា កំពុងតែកើនឡើងយ៉ាងរហ័ស ហើយវានឹងជំនួសតំណែងអាមេរិកដែលមានចំនួនប្រជាជនច្រើនជាងគេលំដាប់ទីបីលើពិភពលោកក្នុងឆ្នាំ២០៥០។ម្យ៉ាងវិញទៀត ចំនួនប្រជាជននៅប្រទេសចំនួន ២៦ ក្នុងតំបន់អាហ្វ្រិកទាំងមូលនឹងកើនឡើងយ៉ាងហោចណាស់ទ្វេដងត្រឹមឆ្នាំ២០៥០។
ចំនួនប្រជាជនដែលមានអាយុលើស ឬស្មើ៦០ឆ្នាំនឹងកើនឡើងលើសពីរដងក្នុងឆ្នាំ២០៥០ និងបន្តកើនលើសបីដងនៅត្រឹមឆ្នាំ ២១០០។ បច្ចុប្បន្នចំនួនប្រជាជនដែលមានវ័យចំណាស់ជុំវិញពិភពលោកក្នុងឆ្នាំ២០១៧ នេះមានចំនួន៩៦២ លាននាក់ ហើយចំនួននេះនឹងកើនដល់២.១ ពាន់លាននាក់ក្នុងឆ្នាំ២០៥០។ វាបន្តកើនដល់៣.១លាននាក់ក្នុងឆ្នាំ២១០០ ផងដែរ។
ទោះបីជាអាត្រាកំណើនប្រជាជនថយចុះក៏ដោយ ចំនួនប្រជាជនជុំវិញពិភពលោកនៅតែមានទំនោរកើនឡើងបន្តបន្ទាប់ ហើយចំនួនប្រជាជនប្រហែល ៨៣ លាននាក់កើនឡើងទូទាំងពិភពលោករៀងរាល់ឆ្នាំផងដែរ៕
Tag:
ចិន
ឥណ្ឌា
អង្គការសហប្រជាជាតិ
ប្រជាជនពិភពលោក
© រក្សាសិទ្ធិដោយ thmeythmey.com