ជាតិ
TI ប៉ាន់ប្រមាណលទ្ធផលបឋមបោះឆ្នោតឃុំ-សង្កាត់ ថា CPP បាន ៤៩.៤ ភាគរយ ឯCNRP បាន ៤៣.២ ភាគរយ
× អង្គការតម្លាភាពកម្ពុជា(TI) បានធ្វើសន្និសីទសារព័ត៌មានបង្ហាញលទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧។ ការសិក្សាផ្អែកទៅលើសំណាកវិទ្យាសាស្ត្រស្ថិតិ(SBO) អង្គការនេះ រកឃើញនូវលទ្ធផលបឋមថា គណបក្សប្រជាជនកម្ពុជាទទួលបានសំឡេងគាំទ្រទូទាំងប្រទេសចំនួន ៤៩.៤ ភាគរយ និងគណបក្សសង្គ្រោះជាតិទទួលបាន ៤៣.២ ភាគរយ។
ចំនួនសន្លឹកឆ្នោតទូទាំងប្រទេសដែលគណបក្សប្រជាជនកម្ពុជាទទួលបានមានប្រមាណ ៤៩.៤ ភាគរយ និងគណបក្សសង្គ្រោះជាតិទទួលបាន ៤៣.២ ភាគរយ។ នេះជាលទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំសង្កាត់ ដែលអង្គការតម្លភាពកម្ពុជា បានរកឃើញតាមរយៈវិធីសាស្ត្រអង្កេតការណ៍បោះឆ្នោតបែបសំណាកគំរូវិទ្យាសាស្ត្រស្ថិតិ SBO ។ ជាងនេះទៀត អង្គការមួយនេះរកឃើញថា អ្នកដែលបានចេញទៅបោះឆ្នោតកាលពីថ្ងៃទី ៤ ខែមិថុនា កន្លងទៅមានប្រមាណ ៩០.២ភាពរយ ខណៈដែលគណៈកម្មាធិការជាតិរៀបចំការបោះឆ្នោតប្រកាសថា អ្នកបានទៅបោះឆ្នោតជាង ៨៩.៥ ភាគរយ។
តាមពិតទៅលទ្ធផលនេះ អង្គការតម្លភាព បានដាក់អ្នកសង្កេតការណ៍តែ ៨២២ នាក់ប៉ុណ្ណោះ ដោយពង្រាយតាមបែបសំណាក (SBO)ទៅកាន់ការិយាល័យបោះឆ្នោតចំនួន៤១១ ហើយវាយតម្លៃលទ្ធផលបឋមនៃការបោះឆ្នោតចំនួន ២២១៤៨ ការិយាល័យទូទាំងប្រទេស ផ្អែកទៅលើសំណាកវិទ្យាសាស្ត្រស្ថិតិ(SBO) នេះឯង។ ដោយសារអង្គការនេះ ដាក់ចំនួនអ្នកអង្កេតការណ៍តិចបែបនេះ ធ្វើឲ្យវិមតិសង្ស័យអំពីសុក្រឹតភាពនៃលទ្ធផលបឋមដែលអង្គការតម្លាភាពរកឃើញ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល បានបកស្រាយនៅក្នុងសន្និសីទសារព័ត៌មាន នៅសណ្ឋាគារសាន់វ៉េកាលពីថ្ងៃទី ២២ ខែមិថុនា ក្រោយពីបង្ហាញលទ្ធផលបឋមដែលអង្គការលោករកឃើញ។ លោក ព្រាប កុល ពន្យល់ពីមូលហេតុដែល TI អាចវាយតម្លៃការបោះឆ្នោតទូទាំងប្រទេសបាន គឺការសង្កេតការណ៍តាមបែបសំណាកវិទ្យាសាស្ត្រស្ថិតិ(SBO) ដែលមានរហូតដល់៧ជំហាន។ លោកថា ជំហានទី១ ស្វែងរកចំនួនតួលេខការិយាល័យបោះឆ្នោតសរុបដែលមាន ២២,១៤៨ នៅក្នុង២៥ រាជធានី ខេត្ត និងជំហានទី២ គណនាសំណាកគំរូការិយាល័យបោះឆ្នោត ដែលត្រូវធ្វើការសង្កេតដើម្បីឲ្យត្រូវតាមលក្ខណៈវិទ្យាសាស្ត្រ និងកំណត់ចំនួនប៉ុន្មាន ដែលអាចតំណាងឲ្យ ២២,១៤៨ ការិយាល័យទូទាំងប្រទេស ដោយការគណនានេះមានច្រើនរបៀបតាមលក្ខណៈខុសៗគ្នាទៅតាមអ្នកវិទ្យាសាស្ត្រ។ ជំហានទី៣ ត្រូវជ្រើសរើសការកំណត់ចំនួនការិយាល័យបោះឆ្នោតសំណាក នៅតាមខេត្តនីមួយៗ ហើយនៅក្នុងនោះត្រូវបានបែងចែកជាពីរតំបន់គឺ ទីប្រជុំជន និងជនបទ។
បើតាមលោក ព្រាប កុល ជំហានទី៤ ត្រូវគណនាមធ្យមភាគតំណាងឲ្យជាភាគរយថា តើចំនួនហ្នឹង បើគិតបានប៉ុន្មានភាគរយ គឺយកចំនួនសរុបការិយាល័យបោះឆ្នោតនៅខេត្តមួយ ទៅចែកនឹងចំនួនសរុបការិយាល័យបោះឆ្នោតទូទាំងប្រទេស ហើយទៅគុណនឹង១០០ និងឃើញចំនួនភាគរយនៃខេត្តនោះ។ ត្រូវធ្វើដូចគ្នាទាំងអស់ទូទាំងប្រទេស។ ជំហានទី៥ គណនាភាគរយការិយាល័យបោះឆ្នោតនៅទីប្រជុំជន និងជនបទ គឺយកការិយាល័យខេត្ត ទៅគុណនឹងចំនួនការិយាល័យទីប្រជុំជន រួចទៅចែកនឹង១០០ នឹងឃើញការិយាល័យសំណាកទីប្រជុំជន រីឯជនបទ យកការិយាល័យបោះឆ្នោតខេត្ត ទៅគុណនឹងចំនួនការិយាល័យជនបទ រួចចែកនឹង១០០ នឹងឃើញការិយាល័យបោះឆ្នោតសំណាកជនបទ។
ជំហានទី៦ ការគណនាគម្លាត(Interval) គឺកំណត់លេខដែលជាគម្លាតក្នុងការជ្រើសរើសការិយាល័យបោះឆ្នោតសំណាកដោយចៃដន្យ។ ជំហានទី៧ គឺការជ្រើសរើសយកក្នុងចំណោម ២២,១៤៨ការិយាល័យទូទាំងប្រទេស រាប់លេខរៀងនោះ កំណត់យកទីតាំងណាមួយ យកទាល់តែគ្រប់គោលដៅ ដែលបានកំណត់រហូតដល់ ៤១១ការិយាល័យ ចំកន្លែងណា ទៅកន្លែងនោះ មិនអាចដូរបានទេ ដើម្បីកុំឲ្យខុស ហើយឲ្យត្រូវតាមSBO។
យ៉ាងណានៅចំពោះមុខអ្នកសារព័ត៌មាន លោក ព្រាប កុល ទទួលស្គាល់ថា វិធីសាស្ត្រនៃការគណនានេះ អាចនឹងពិបាកយល់ ព្រោះវាជារឿងបច្ចេកទេស ដែលត្រូវការពេលសិក្សា។ តែលោក កុល មានជំនឿថា លទ្ធផលបឋមនៃការបោះឆ្នោតឃុំ-សង្កាត់ ដែលក្រុមអ្នកជំនាញអង្គការលោកបានរកឃើញតាមសំណាកវិទ្យាសាស្ត្រស្ថិត SBO នេះ មានភាពត្រឹមត្រូវស្ទើរតែ ១០០ ភាគរយ៕
Tag:
បោះឆ្នោតឃុំ-សង្កាត់
TI
តម្លាភាព
© រក្សាសិទ្ធិដោយ thmeythmey.com