ជាតិ
រូបពីហ្វេសប៊ុកលោក នួន ផារ័ត្ន
×![]()
តាមការគ្រោងទុក នៅថ្ងៃទី២៨ខែមិថុនា សាលារាជធានីភ្នំពេញនឹងរៀបចំការផ្ទេរតំណែងអភិបាលរាជធានីភ្នំពេញ ព្រមទាំងអភិបាលរងម្នាក់ និងពិធីតែងតាំងអភិបាលរងថ្មីមួយរូបទៀត។ លោក ឃួង ស្រេង ដែលជាអភិបាលរង នឹងត្រូវឡើងកាន់តំណែងជាអភិបាលរាជធានី ជំនួសលោក ប៉ា សុជាតិវង្ស ដែលត្រូវចូលនិវត្តន៍។ លោក កើត ឆែ ដែលអភិបាលរងខេត្តពោធិ៍សាត់ នឹងត្រឡប់មកទទួលតំណែងជាអភិបាលរងរាជធានីជំនួសលោក ត្រាក់ ថៃសៀង ដែលត្រូវផ្ទេរឲ្យទៅបម្រើការងារនៅក្រសួងមហាផ្ទៃ។ បើយោងតាមអនុក្រឹត្យដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន នៅថ្ងៃទី២២ខែមិថុនានេះ តំណែងអភិបាលរងមួយទៀត ត្រូវបានផ្តល់ឲ្យលោក នួន ផារ័ត្ន។ តើលោក នួន ផារ័ត្ន ជាអ្នកណា?
មុនការតែងតាំងជាអភិបាលរងនៃរាជធានីភ្នំពេញ លោក នួន ផារ័ត្ន ដែលមានអាយុ៣៧ឆ្នាំ គឺជាអនុប្រធានគណបក្សប្រជាជនកម្ពុជានៅខេត្តកំពង់ស្ពឺ និងជាប្រធានក្រុមការងារយុវជនខេត្តដដែលនេះ។ បើសិនជាគេឃើញលោក នួន ផារ័ត្ន តែងមានវត្តមានញឹកញាប់ជាមួយ លោក ហ៊ុន ម៉ានី នៅក្នុងកម្មវិធីយុវជននានា នោះក៏ព្រោះតែលោក នួន ផារ័ត្ន គឺជាសមាជិកគណៈអចិន្ត្រៃយ៍នៃសហភាពសហព័ន្ធយុវជនកម្ពុជា ដែលដឹកនាំដោយលោក ហ៊ុន ម៉ានី។
តាមពិត លោក នួន ផារ័ត្ន មានជំនាញផ្នែកច្បាប់ ហើយបានធ្វើការងារច្រើនទាក់ទងនឹងការតាក់តែងច្បាប់ផងដែរ។ លោក នួន ផារ័ត្ន បានបញ្ចប់ថ្នាក់អនុបណ្ឌិតផ្នែកនីតិសាស្ត្រ និងផ្នែកវិជ្ជាជីវៈតុលាការពីប្រទេសបារាំងក្នុងឆ្នាំ២០០៣ ។ ពេលត្រឡប់ពីប្រទេសបារាំង លោក ផារ័ត្ន បានធ្វើជាសាស្ត្រាចារ្យច្បាប់នៅសាលកវិទ្យាល័យនានាក្នុងរាជធានីភ្នំពេញ មុននឹងលោកក្លាយជាសមាជិកក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋលេខាធិការ ក្នុងឆ្នាំ២០០៧។ លោក នួន ផារ័ត្ន ក៏ធ្លាប់ចូលរួមចំណែកក្នុងការងារផ្នែកច្បាប់នៅសាលាក្តីខ្មែរក្រហមដែរ តាមរយៈតួនាទីជាប្រធានក្រុមអ្នកច្បាប់នៃការិយាល័យសហចៅក្រមស៊ើបអង្កេត៕
Tag:
នួន ផារ័ត្ន
ឃួង ស្រេង
អភិបាលរងភ្នំពេញ
© រក្សាសិទ្ធិដោយ thmeythmey.com
