ពីនេះ ពីនោះ
សំរាម ចិញ្ចើមថ្នល់ អសន្តិសុខ រង់ចាំលោកអភិបាលថ្មី
× កំណាព្យបទ ព្រហ្មគីតិ
ដោយប៉ាកកាខ្មៅ
-រឿងនេះកើតយូរឆ្នាំ តាមស្មេរចាំមិនមែនថ្មី
ចៅហ្វាយប្តូរពីរបី រាស្ត្រប្រុសស្រីនៅតែខ្វល់។
-ធូលីស្បោងប្លាស្ទិក តែងរំលេចនៅតាមថ្នល់
ត្រូវភ្លៀងផ្អូមបែកវ៉ល់ រុយច្របល់ជ្រួលជប់លៀង។
-ពេលខ្យល់ខ្វល់ដីហុយ បែកក្លិនស្អុយពេលមេឃភ្លៀង
សំរាមកើបមិនទៀង ផ្លូវត្រង់វាងរួមចង្អៀត។
-ចិញ្ចើមគេយកអស់ ដាក់របស់លក់ព្រោងព្រាត
ឡានធំនៅប្រជ្រៀត បើកបរទៀតម៉ោងហាមឃាត់។
-បង្កគ្រោះតាមផ្លូវ គ្រប់រដូវនៅតែភ្លាត់
ទប់ស្កាត់ថាតែមាត់ ធ្វើជាឃាត់យកតែមុខ។
-គ្រឿងញៀនឈ្មួញលួចច្នៃ ចោរបានដៃចេញវាយលុក
ឆក់ប្លន់បង្កទុក្ខ ខ្លះជាប់គុកមិនរាងចាល។
-កង្វល់រាស្ត្រច្រើនណាស់ លោកដឹងច្បាស់អភិបាល
ទោះស្មេរមិនដំណាល អភិបាលលោកជ្រាបហើយ។
-ត្រូវចុចចំបញ្ហា ព្រោះវេលាមិនយូរឡើយ
បោះឆ្នោតកៀកបង្កើយ ស្រាយរួចហើយរឿងអីចាញ់?
© រក្សាសិទ្ធិដោយ thmeythmey.com