Pacquiao ទៅដល់អូស្ត្រាលីត្រៀមប៉ះ Jeff Horn ចុងសប្តាហ៍នេះ

កីឡាអន្តរជាតិ

អន្តរជាតិ

Pacquiao ទៅដល់អូស្ត្រាលីត្រៀមប៉ះ Jeff Horn ចុងសប្តាហ៍នេះ

27, Jun 2017 , 8:19 am

រូបភាព

ដោយ: ទេព ពិទូរ្យ

ស្តេចប្រដាល់អាស៊ី Manny Pacquiao បានធ្វើដំណើរទៅដល់ប្រទេសអូស្ត្រាលីហើយដើម្បីត្រៀមឡើងសង្វៀនប្រកួតជាមួយអ្នកប្រដាល់មិនស្គាល់ចាញ់ Jeff Horn នៅថ្ងៃទី២ ខែកក្កដា ចុងសប្តាហ៍នេះ។

បើតាមការចុះផ្សាយរបស់ Rappler កំពូលអ្នកប្រដាល់សញ្ជាតិហ្វីលីពីន ដែលមានរហស្សនាមថា “Pacman” នឹងឡើងការពារខ្សែក្រវាត់ WBO របស់ខ្លួនជាមួយអ្នកប្រដាល់អូស្ត្រាលី Jeff Horn នាកីឡដ្ឋាន Suncorp Arena ស្ថិតនៅក្រុង Brisbane ប្រទេសអូស្ត្រាលី ដែលអាចផ្ទុកទស្សនិកជនបានដល់ទៅជាង៥ម៉ឺននាក់។

ម្ចាស់ជើងឯកខ្សែក្រវាត់៨ស្ថាប័នវ័យ៣៨ឆ្នាំដែលមានប្រវត្តិប្រកួត៥៩ដងចាញ់៦ដងនិងស្មើ២ដងនេះ បានធ្វើដំណើរចេញពីស្រុកកំណើតរបស់គេនៅទីក្រុង General Santos ប្រទេសហ្វីលីពីន ឆ្ពោះទៅទីក្រុង Brisbane ហើយបន្តការហ្វឹកនៅទីនោះតាំងពីថ្ងៃសៅរ៍ ទី២៤ ខែមិថុនាមកម្លេះ។

Pacguiao និងភរិយាធ្វើដំណើរទៅដល់ក្រុងBrisbane ប្រទេសអូស្ត្រាលី

ចំណែកអ្នកប្រដាល់សញ្ជាតិអូស្ត្រាលី វ័យ២៩ឆ្នាំនេះ Jeff Horn ធ្លាប់ឡើងវាយ១៦ដង ឈ្នះ១៥ និងស្មើម្តង។ អ្នកប្រដាល់មិនដែលចាញ់រួបនេះ ចាប់ផ្តើមក្លាយជាអ្នកប្រដាល់អាជីពនៅឆ្នាំ២០០៦ និងធ្លាប់ជាអត្តពលិកនាការប្រកួតអូឡាំពិកឆ្នាំ២០១២ នៅក្រុងឡុងដ៍ផងដែរ។

សម្រាប់ការប្រកួតលើកនេះ Horn ជឿជាក់ថានឹងអាចរក្សាកំណត់ត្រាមិនដែលចាញ់របស់គេ និងដណ្តើមខ្សែក្រវាត់ពី Pacquiao បានក្នុងនាមជាម្ចាស់ផ្ទះ ដែលស្ថិតក្រោមក្រសែភ្នែកទស្សនិកជនរាប់ម៉ឺននាក់នោះ៕