ប្រធានាធិបតីប្រេស៊ីលជាប់ចោទករណីពុករលួយ ក្រោយចូលកាន់តំណែងជិតមួយឆ្នាំ

អន្តរជាតិ

ប្រធានាធិបតីប្រេស៊ីលជាប់ចោទករណីពុករលួយ ក្រោយចូលកាន់តំណែងជិតមួយឆ្នាំ

27, Jun 2017 , 11:32 am

រូបភាព

ប្រធានាធិបតីប្រេស៊ីល Michel Temer (រូបភាព Xinhua)

ដោយ: តន ចាន់រិទ្ធារ៉ា

រដ្ឋអាជ្ញាកំពូលប្រេស៊ីល នៅថ្ងៃទី២៦ ខែមិថុនា បានចោទប្រកាន់ផ្លូវការលើប្រធានាធិបតីប្រេស៊ីល លោក Michel Temer ជុំវិញការទទួលសំណូករាប់លានដុល្លារពីក្រុមហ៊ុនឯកជនមួយ។ សំណុំរឿងពុករលួយនេះ បានទៅដល់ដៃតុលាការកំពូលហើយ ហើយសមាជិកសភានឹងបោះឆ្នោតសម្រេចឲ្យមានការបើកសវនាការកាត់ក្ដីលោក Temer ឬអត់។ នៅពេលនេះ ប្រជាប្រិយភាពលោក Temer ធ្លាក់ចុះយ៉ាងខ្លាំង ខណៈស្ថិរភាពនយោបាយកំពុងឈានទៅរកភាពមិនច្បាស់លាស់នោះ។

លោក Rodrigo Janot រដ្ឋអាជ្ញាកំពូលប្រេស៊ីល បានបញ្ជូនសំណុំរឿងពុករលួយរបស់ប្រធានាធិបតី Michel Temer ទៅកាន់តុលាការកំពូលហើយដោយបានចោទលោក Temer លើករណីពុករលួយទទួលសំណូក។ រដ្ឋអាជ្ញាសហព័ន្ធរូបនេះនិយាយថា លោកប្រធានាធិបតី Temer បានបោកប្រាស់ប្រជាជនប្រេស៊ីល និងជំពាក់លុយប្រជាជនរាប់លានដុល្លារ ដែលជាសំណងសម្រាប់ការទទួលលុយសំណូកពីក្រុមហ៊ុនមួយ។

លោក Temer ទើបកាន់តំណែងប្រធានាធិបតីនេះបានជិតមួយឆ្នាំប៉ុណ្ណោះ បន្ទាប់ពីអតីតប្រធានាធិបតី Dilma Rousseff ត្រូវបានទម្លាក់ពីតំណែងរួចមក។ ប៉ុន្តែលោក Temer ផ្ទាល់ មិនសូវមានប្រជាប្រិយភាពក្នុងចំណោមប្រជាជនប្រេស៊ីលឡើយ។ ជាមួយការចោទប្រកាន់ខាងលើ ច្បាប់ប្រេស៊ីលកំណត់ឲ្យរដ្ឋសភាបោះឆ្នោតសម្រេចបើកផ្លូវឲ្យតុលាការកំពូលកាត់ក្ដីលោក Temer ឬក៏ផ្អាកត្រឹមនេះ។

សមាជិកសភាដែលជាសម្ព័ន្ធមិត្តរបស់លោកប្រធានាធិបតីមានជំនឿចិត្តក្នុងការប្រមូលបានសំឡេងគ្រប់គ្រាន់ជួយលោក Temer ឲ្យផុតពីការកាត់ទោស ព្រោះគេត្រូវការសំឡេងពីរភាគបីនៃចំនួនសមាជិកសភាទាំងអស់ដើម្បីកាត់ទោសលោក Temer ។ ប៉ុន្តែសមាជិកសភាទាំងនោះ ទំនងជាមិនអាចការពារលោក Temer បានយូរដែរ ដ្បិតប្រជាជនប្រេស៊ីលមិនសូវពេញចិត្តការដឹកនាំរបស់លោកឡើយ បូករួមទាំងបញ្ហាពុករលួយបែបនេះទៀត។

បើតាមទីភ្នាក់ងារព័ត៌មាន Reuters លោក Temer ត្រូវបានចោទថាជាប់ទាក់ទងអំពើពុករលួយជាមួយក្រុមហ៊ុនវេចខ្ចប់សាច់ធំជាងគេរបស់ពិភពលោក JBS SA ។ មន្ត្រីក្រុមហ៊ុននិយាយថា លោក Temer បានទទួលសំណូកពីក្រុមហ៊ុនដើម្បីដោះស្រាយបញ្ហាពន្ធ បន្ធូរបន្ថយលក្ខខណ្ឌខ្ចីប្រាក់ពីធនាគាររដ្ឋ និងបញ្ហាមួយចំនួនទៀត។ មិនត្រឹមតែយកលុយផ្ទាល់ខ្លួនឡើយ លោក Temer ក៏រងការចោទប្រកាន់ថាបានយកលុយទៅឲ្យបក្សរបស់លោកទៀតផង។

តាមពិតទៅ មិនត្រឹមតែលោក Temer ឡើយ សូម្បីតែសមាជិកគណៈរដ្ឋមន្ត្រីច្រើនទៀត ក៏កំពុងរងការចោទប្រកាន់ដែរ ហើយខ្លះទៀតត្រូវបានកាត់ទោសរួចហើយ។ រឿងអាស្រូវពុករលួយនេះ បានបង្អាក់ឱកាសកែទម្រង់សេដ្ឋកិច្ចរបស់លោក Temer ទៀតផង។ ករណីបង្ហាញច្បាស់ពីអំពើពុករលួយជីកឬសជ្រៅក្នុងបរិបទនយោបាយប្រេស៊ីល ដែលអ្នកនយោបាយទទួលប្រាក់ពីអ្នកជំនួញដើម្បីផ្ដល់ការងាយស្រួលសម្រាប់ការរកស៊ីរបស់ពួកគេវិញ។

រដ្ឋអាមរិកខាងត្បូងប្រេស៊ីលរងគ្រោះខ្លាំង ហើយនយោបាយប្រទេសនេះកាន់តែច្របូកច្របល់ដោយសារបញ្ហាពុករលួយរបស់អ្នកនយោបាយកំពូលៗ។ ដូចឃើញស្រាប់អតីតប្រធានាធិបតីប្រេស៊ីលលោកស្រី Dilma Rousseff ត្រូវបាត់បង់តំណែងដោយសារតែបញ្ហាពុករលួយដែរ។ គេមិនដឹងថា ប្រធានាធិបតីបច្ចុប្បន្ននឹងត្រូវគេដកហូតតំណែងទៀតឬអត់ ប៉ុន្តែការបោះឆ្នោតប្រធានាធិបតីជាផ្លូវការនឹងត្រូវរៀបចំនៅខែតុលាឆ្នាំ ២០១៨ ខាងមុខ៕