សមាជិកសភាចិនស្នើអត្តពលិកកុំដាក់ដៃលើទ្រូងឆ្វេងដូចអាមេរិកពេលគោរពភ្លេងជាតិ

កីឡាអន្តរជាតិ

អន្តរជាតិ

សមាជិកសភាចិនស្នើអត្តពលិកកុំដាក់ដៃលើទ្រូងឆ្វេងដូចអាមេរិកពេលគោរពភ្លេងជាតិ

27, Jun 2017 , 3:01 pm

រូបភាព

ដោយ: ទេព ពិទូរ្យ

សមាជិកសភាចិនបានស្នើឲ្យហាមក្រុមកីឡាករបាល់ទាត់ជម្រើសជាតិចិនយកដៃដាក់លើទ្រូងខាងឆ្វេងនៅពេលគោរភ្លេងជាតិ ដោយលើកហេតុផលថាការដាក់ដៃនេះស្មើនឹងការគោរពទៅដល់សហរដ្ឋអាមេរិក។

បើតាមសារព័ត៌មានចិន CGTN ចុះផ្សាយនៅថ្ងៃទី២៦ មិថុនានេះ លោក Chen Guoling ដែលជាសមាជិកគណៈកម្មាធិការអចិន្ត្រៃយ៍នៃសភាប្រជាជនចិន បានអំពាវនាវឲ្យមានការដាក់បម្រាមលើការដាក់ដៃលើដើមទ្រូងខាងឆ្វេង ឬលើបេះដូងនៅពេលគោរពភ្លេងជាតិនៅក្នុងប្រទេសចិន។ ការស្នើនេះដោយសារលោកយល់ឃើញថា ជាទង្វើដែលមិនអាចទទួលយកបានព្រោះនេះជាសញ្ញាដែលកើតចេញពីសហរដ្ឋអាមេរិកតាំងពីឆ្នាំ១៩៤២ និងជាការគោរពរបស់ប្រជាជនអាមេរិកទៅវិញ។

«មនុស្សវ័យកណ្តាលជាច្រើនតែងតែដាក់ដៃស្តាំនៅលើបេះដូងរបស់ពួកគេនៅពេលគោរពភ្លេងជាតិ ហើយជាពិសេសនោះគឺអ្នកលេងកីឡាតែម្តង។ យើងមិនអាចទទួលយកបានទេព្រោះនេះជារបៀបគោរពរបស់ប្រជាជនអាមេរិកដែលបង្កើតឡើងកាលពីឆ្នាំ១៩៤២។ ជនជាតិអាមេរិករួមទាំងក្រុមកីឡាកររបស់ពួកគេធ្វើបែបនេះ [យកដៃដាក់លើទ្រូងខាងឆ្វេង] គឺដើម្បីគោរពដល់សហរដ្ឋអាមេរិក»។ នេះជាការលើកឡើងរបស់លោក Chen Guoling។

លើសពីនេះទៅទៀត លោក Chen ក៏បានស្នើដល់សភាចិនដើម្បីពិភាក្សាលើសេចក្តីព្រាងច្បាប់ស្តីពីការគោរពភ្លេងជាតិរបស់ចិននេះថែមទៀតផង៕