ជាតិ
នយោបាយជាតិ
សកម្មជនបក្សប្រឆាំង១១រូប ដែលជាប់ទោសពី៧ទៅ២០ឆ្នាំ ត្រូវបាននាំខ្លួនទៅកាន់សាលាឧទ្ធរណ៍
× ភ្នំពេញ៖ សមត្ថកិច្ច បាននាំមន្ត្រីបក្សប្រឆាំង១១រូប ដែលកំពុងជាប់ពន្ធនាគារ ទៅកាន់សាលាឧទ្ធរណ៍នៅព្រឹកថ្ងៃទី៣0 ខែមិថុនា ឆ្នាំ២0១៧នេះ ដើម្បីចូលរួមសវនាការ។ ការបើកសវនាការរបស់សាលាឧទ្ធរណ៍នាព្រឹកនេះ គឺធ្វើឡើងតាមសំណើររបស់ក្រុមមេធាវី ដែលការពារក្តីឲ្យមន្ត្រីបក្សប្រឆាំងទាំង១១រូប។
ក្រុមមេធាវី បានបន្តប្តឹងទៅកាន់សាលាឧទ្ធរណ៍ ដើម្បីសុំប្រឆាំងនឹងនីតិវិធីរបស់សាលាដំបូងរាជធានីភ្នំពេញ ដែលបានបើកសវនាការកាត់ទោសមន្ត្រីបក្សប្រឆាំងទាំង១១រូប ឲ្យជាប់ពន្ធនាគារពី៧ទៅ២0ឆ្នាំ។ សាលាដំបូងរាជធានីភ្នំពេញ បានបើកសវនាការ កាត់ទោសមន្ត្រីបក្សប្រឆាំងទាំង១១នាក់ ដោយគ្មានវត្តមានរបស់មេធាវី។
ត្រង់ចំណុចនេះហើយ ដែលក្រុមមេធាវីទាំងនោះ អះអាងថា ការកាត់ទោសលើមន្ត្រីបក្សប្រឆាំងទាំង១១រូប គឺមិនត្រឹមត្រូវតាមនីតិវិធី។ ពួកគេ ធ្លាប់បញ្ជាក់ថា ការបើកសវនាការ លើសំណុំរឿងឧក្រិដ្ឋ មិនអាចធ្វើឡើង ដោយអវត្តមានរបស់មេធាវីឡើយ។
សូមបញ្ជាក់ថា លោក មាជ សុវណ្ណារ៉ា រួមទាំងសកម្មជនបក្សប្រឆាំងជាង១០នាក់ទៀត ត្រូវបានសាលាដំបូងរាជធានីភ្នំពេញ ចោទថា បានចូលរួម និងដឹកនាំធ្វើកុបកម្មប្រឆាំងអាជ្ញាធរសាធារណៈ នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕
© រក្សាសិទ្ធិដោយ thmeythmey.com