តំណាងរាស្ត្របក្សកាន់អំណាច ផ្តើមធ្វើច្បាប់មិនឲ្យទណ្ឌិតធ្វើសកម្មភាពជាមួយបក្សនយោបាយ

ជាតិ

នយោបាយជាតិ

តំណាងរាស្ត្របក្សកាន់អំណាច ផ្តើមធ្វើច្បាប់មិនឲ្យទណ្ឌិតធ្វើសកម្មភាពជាមួយបក្សនយោបាយ

03, Jul 2017 , 6:26 pm

រូបភាព

លោក សុខ ឥសាន តំណាងរាស្ត្រនិងជាអ្នកនាំពាក្យគណបក្សជាជនកម្ពុជា។ រូបថត CPP

ដោយ: ម៉ៅ សុផា

ភ្នំពេញ៖ តំណាងរាស្ត្រគណបក្សប្រជាជនកម្ពុជា កំពុងពិភាក្សាលើសំណើរបស់សម្តេច ហ៊ុន សែន ដែលសុំឲ្យបន្ថែមខ្លឹមសារថ្មី ចូលទៅក្នុងច្បាប់ស្តីពី គណបក្សនយោបាយ ។ លោក សុខ ឥសាន តំណាងរាស្ត្រនិងជាអ្នកនាំពាក្យគណបក្សជាជនកម្ពុជា បានប្រាប់សារព័ត៌មានថ្មីៗយ៉ាងដូច្នេះ តាមប្រព័ន្ធទូរសព្ទ នៅថ្ងៃទី៣ ខែកក្កដា ឆ្នាំ២0១៧នេះ។

លោក សុខ ឥសាន អះអាងថា ការពិភាក្សាត្រូវបានបញ្ចប់សព្វគ្រប់ហើយ ហើយសំណើសុំឲ្យបន្ថែមខ្លឹមសារថ្មី ចូលទៅក្នុងច្បាប់ស្តីពីគណបក្សនយោបាយ នឹងត្រូវបញ្ចូនទៅកាន់រដ្ឋសភា។ ប៉ុន្តែ លោកមិនទាន់អាចបញ្ជាក់បាននោះទេ ថាសំណើនេះ នឹងត្រូវដាក់ទៅកាន់រដ្ឋសភានៅពេលណា។ អ្នកនាំពាក្យគណបក្សប្រជាជនកម្ពុជារូបនេះ និយាយដូច្នេះថា៖«ឲ្យតែពិភាក្សាគ្នាចប់ គឺយើងបញ្ជូនទៅរដ្ឋសភាហើយ។ ប្រហែលជាពេលឆាប់ៗនេះ»។

ដោយលើកហេតុផលថា កំពុងតែស្ថិតក្នុងដំណាក់កាលនៃការពិភាក្សា លោក សុខ ឥសាន មិនលើកឡើងពីខ្លឹមសារថ្មី ដែលនឹងត្រូវដាក់ចូលទៅក្នុងច្បាប់ស្តីពីគណបក្សនយោបាយ ឡើយ។ ទោះលោក សុខ ឥសាន មិនបានលើកឡើងក៏ដោយ ប៉ុន្តែខ្លឹមសារថ្មី ដែលចង់ដាក់ចូលទៅក្នុងច្បាប់ស្តីពីគណបក្សនយោបាយ ទំនងជាមិនខុសពីសំណើររបស់សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា នោះទេ។

ក្នុងពិធីរម្លឹកខួប៦៦ឆ្នាំ នៃការបង្កើតគណបក្សប្រជាជនកម្ពុជា ដែលរៀបចំឡើងកាលពីថ្ងៃទី២៨ ខែមិថុនា ឆ្នាំ២0១៧ សម្តេច ហ៊ុន សែន បានស្នើឲ្យរដ្ឋសភា ធ្វើវិសោធនកម្មសាជាថ្មី លើច្បាប់ស្តីពី គណបក្សនយោបាយ ដោយបន្ថែមខ្លឹមសារថា ទណ្ឌិតឬអ្នកទោស មិនអាចយកខ្លួនទៅភ្ជាប់ជាមួយគណបក្សនយោបាយ ដើម្បីធ្វើសកម្មភាពឡើយ។

សូមបញ្ជាក់ថា នៅដើមឆ្នាំ២0១៧នេះ សម្តេច ហ៊ុន សែន បានស្នើឲ្យរដ្ឋសភា កែប្រែច្បាប់ស្តីពីគណបក្សនយោបាយម្តងរួចទៅហើយ ដោយមិនអនុញ្ញាតឲ្យអ្នកទោស ធ្វើជាប្រធានគណបក្ស ឬក៏ជាសមាជិកគណៈកម្មាធិការនាយកក្នុងគណបក្សណាមួយ៕