ជាតិ
នយោបាយជាតិ
តុលាការកំពូល ប្រកាសសាលដីកាលោក គឹម សុខ ទាំង២សំណុំរឿងនៅថ្ងៃពុធនេះ
× ភ្នំពេញ៖ តុលាការកំពូល នឹងប្រកាសសាលដីកា២ផ្សេងគ្នា លើសំណុំរឿង លោក គឹម សុខ នៅព្រឹកថ្ងៃពុធ ទី ៥ ខែកក្កដានេះ។ សាលដីកាទាំង២ គឺការសុំឲ្យលោក គឹម សុខ រស់នៅក្រៅពន្ធនាគារបណ្តោះអាសន្ន និងការសុំឲ្យកោះហៅដើមបណ្តឹង ចូលតទល់ជាមួយចុងចោទ នៅក្នុងតុលាការ។
កាលពីពេលកន្លងទៅ តុលាការកំពូល បានបើកសវនាការលើបណ្តឹងសារទុក្ខចំនួន២ របស់លោក គឹម សុខ អ្នកវិភា គនយោបាយ ដែលកំពុងជាប់ឃុំ ដោយសារតែបណ្តឹងរបស់សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។
តាមការកំណត់ នៅព្រឹកថ្ងៃពុធ ទី៥ ខែកក្កដានេះ តុលាការកំពូល នឹងប្រកាសសាលដីកា លើបណ្តឹងសារទុក្ខទាំង២ របស់លោក គឹម សុខ។ លោក ជូង ជូងី មេធាវីរបស់លោក គឹម សុខ បានប្រាប់សារព័ត៌មានថ្មីៗថា សាលដីកាទាំងពីរនោះ គឺទី១ ការសុំឲ្យលោក គឹម សុខ រស់នៅក្រៅពន្ធនាគារបណ្តោះអាសន្ន និងរឿងទី២ ការសុំឲ្យកោះហៅដើមបណ្តឹង (សម្តេច ហ៊ុន សែន) ចូលតទល់ជាមួយចុងចោទ (លោក គឹម សុខ) នៅក្នុងតុលាការ។
លោក ជូង ជូងី មិនសន្និដ្ឋានជាមុនឡើយ ថាតើការតវ៉ារបស់លោក នឹងជោគជ័យ ឬបរាជ័យ។ លោក និយាយដូច្នេះថា៖«ខ្ញុំមិនពិចារណាទេ ថាលទ្ធផលនៃការប្រកាសសាកដីកាយ៉ាងម៉េច។ ទាល់តែប្រកាសសិន ទើបខ្ញុំអាចដឹងបាន ថាត្រូវធ្វើអ្វីបន្តទៀត»។
យ៉ាងណាក៏ដោយ បើតាមមេធាវីរូបនេះ លោកកំពុងរវល់ការងារនៅតាមខេត្ត មិនបានចូលរួមស្តាប់ការប្រកាសសាលដីកាបានទេ ប៉ុន្តែសមត្ថកិច្ច អាចនាំខ្លួនលោក គឹម សុខ ទៅកាន់តុលាការកំពូល ដើម្បីស្តាប់ការប្រកាសសាលដីកានៅព្រឹកថ្ងៃពុធនេះ។
កន្លងមក លោក ជូង ជូងី បានដាក់បណ្តឹងទាំង២ខាងលើ ទៅកាន់សាលាឧទ្ធរណ៍រួចហើយ។ ប៉ុន្តែ បរាជ័យ លោកក៏បន្តដាក់បណ្តឹងដដែលនេះ ទៅកាន់តុលាការកំពូល។
សម្តេច ហ៊ុន សែន បានដាក់ពាក្យប្តឹងលោក គឹម សុខ អ្នកវិភាគនយោបាយ ពីបទ «បរិហារកេរ្តិ៍ជាសាធារណៈ» និងបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» កាលពីខែកុម្ភៈ ឆ្នាំ២0១៧ ។ លោក គី តិច មេធាវីរបស់សម្តេច ហ៊ុន សែន បញ្ជាក់ថាមូលហេតុនៃការដាក់ប្តឹងនេះ ដោយសារតែលោក គឹម សុខ បាននិយាយថា គណបក្សប្រជាជនកម្ពុជា នៅពីក្រោយខ្នងអំពើឃាតកម្ម លោក កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គមដ៏ល្បីល្បាញ កាលពីខែកក្កដា ឆ្នាំ២0១៦ ។
លោក គឹម សុខ នៅរងបណ្តឹងរបស់សម្តេច ហ៊ុន សែន មួយផ្សេងទៀត។ អង្គហេតុ ដែលនាំឲ្យលោក គឹម សុខ រងបណ្តឹងជាលើកទី២ គឺដោយសារតែលោក និយាយថា ប្រព័ន្ធមួយ ដែលស្ថិតនៅក្រោមរដ្ឋាភិបាលបច្ចុប្បន្ន មានការសម្លាប់មនុស្ស ហើយរកមុខឃាតកមិនឃើញ។ រហូតមកដល់ពេលនេះ លោក គឹម សុខ បានជាប់ឃុំក្នុងពន្ធនាគារព្រៃស អស់រយៈពេលជិតកន្លះឆ្នាំហើយ៕
Tag:
គឹម សុខ
ហ៊ុន សែន
តុលាការ
© រក្សាសិទ្ធិដោយ thmeythmey.com