ជាតិ
នយោបាយជាតិ
លោក លឺ ឡាយស្រេង ចូលរួមរំឮកអ្នកស្លាប់ នៅថ្ងៃ៥-៦ កក្កដា ជាមួយCNRP
× ភ្នំពេញ៖ គណបក្សសង្គ្រោះជាតិ បានរៀបចំពិធីរំឮកវិញ្ញាណក្ខន្ធអ្នកស្លាប់បាត់បង់ជីវិតនៅក្នុងព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧នៅទីស្នាក់ការគណបក្សនៅព្រឹកនេះ។ ព្រឹត្តិការណ៍នោះ គឺជាការបាញ់ប្រហារគ្នានៅកណ្ដាលទីក្រុងភ្នំពេញ រវាងកងកម្លាំងគណបក្សហ្វ៊ុនស៊ិនប៉ិច និងកម្លាំងរបស់គណបក្សប្រជាជនកម្ពុជា។
គណបក្សសង្គ្រោះជាតិ តែងតែរៀបចំពិធីរំឮកវិញ្ញាណក្ខន្ធនេះ ជារៀងរាល់ឆ្នាំ។ ហើយនៅក្នុងពិធីរំឮកវិញ្ញាណក្ខន្ធ ដែលរៀបចំដោយគណបក្សសង្គ្រោះជាតិនេះ គេសង្កេតឃើញមានវត្តមានអតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច គឺលោក លឺ ឡាយស្រេង ក៏បានចូលរួមរំឮកវិញ្ញាណក្ខន្ធអ្នកស្លាប់នោះ ក្នុងទីស្នាក់ការគណបក្សសង្គ្រោះជាតិដែរ។
ការប៉ះទង្គិចគ្នានៅក្នុងព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧ រវាងកងកម្លាំងគាំទ្រនាយករដ្ឋមន្ត្រី ហ៊ុន សែន និងកងកម្លាំងសម្ដេចក្រុមព្រះនរោត្តម រណឬទ្ធិ កាលណោះ ត្រូវបានគណបក្សហ្វ៊ុនស៊ិនប៉ិច អះអាងថា កងយោធាគណបក្សខ្លួន ជាង៦០នាក់បានស្លាប់បាត់បង់ជីវិត ក្នុងនោះក៏មាន លោក ហូ សុ ខ, ក្រូច យឿម, ជា ឫទ្ធីឈុត, លោក លី សេងហុង លោក ចៅ សម្បត្តិ លោក ម៉ែន ប៊ុនថន លោក សុខ វីរៈ លោក ថ្លាំង ចាន់សុវណ្ណារិទ្ធ លោក ហូវ សម្បត្តិ និងលោក សៅ សុផល ជាដើម៕
Tag:
លី ឡាយស្រេង
ហ្វ៊ុនស៊ិនប៉ិច
CNRP
© រក្សាសិទ្ធិដោយ thmeythmey.com