រដ្ឋមន្ត្រីបរិស្ថានបារាំងចង់ឲ្យប្រទេសគ្មានរថយន្តប្រើសាំង និងម៉ាស៊ូត ចាប់ពីឆ្នាំ២០៤០

រថយន្ត

អន្តរជាតិ

10, Jul 2017 , 7:19 pm

រូបភាព

លោក Nicolas Hulot‏ អតីតសកម្មជនបរិស្ថាន ដែលបច្ចុប្បន្នជាទេសរដ្ឋមន្ត្រី និងជារដ្ឋមន្ត្រីបរិស្ថានបារាំង

ដោយ: តន ចាន់រិទ្ធារ៉ា

បារាំង នឹងហាមឃាត់ការលក់យានយន្តប្រើប្រាស់ប្រេងសាំង និងម៉ាស៊ូតនៅឆ្នាំ២០៤០ ដែលជាផ្នែកនៃការប្រយុទ្ធប្រឆាំងបម្រែបម្រួលបរិស្ថានពិភពលោក។ មិនត្រឹមតែហាមឃាត់ការលក់ឡានឡើយ សូម្បីតែគម្រោងផលិតឡានប្រើប្រាស់ប្រេងសាំង ធ្យូងថ្ម ឬហ្គាស ក៏ត្រូវហាមឃាត់ផងដែរ។ រដ្ឋមន្ត្រីបរិស្ថានថ្មី Nicolas Hulot ជាអ្នកប្រកាសគម្រោងហាមឃាត់នេះ ដោយអនុលោមតាមការប្ដេជ្ញាចិត្តរបស់ប្រធានាធិបតី អេម៉ានុយអែល ម៉ាក្រុង ។

បារាំងបានចូលរួមក្នុងយុទ្ធនាការហាមឃាត់ការប្រើប្រាស់យានយន្តប្រើប្រេង និងម៉ាស៊ូត ដោយបញ្ចប់ការលក់យានយន្តប្រើថាមពលឥន្ធនៈទាំងនេះនៅត្រឹមឆ្នាំ២០៤០ ។ នេះជាមហិច្ឆតារបស់បារាំងក្នុងការអនុវត្តតាមកិច្ចព្រមព្រៀងទីក្រុងប៉ារីសស្ដីពីបម្រែបម្រួលអាកាសធាតុ ទោះជាគ្មានវត្តមានអាមេរិកក៏ដោយ។ ប្រធានាធិបតីបារាំង អេម៉ានុយអែល ម៉ាក្រុង ប្រកាសហើយថា បារាំងនឹងកាពារកិច្ចព្រមព្រៀងនេះ ក្នុងគោលដៅប្រែក្លាយពិភពលោកនេះឲ្យអស្ចារ្យម្ដងទៀត។

រដ្ឋមន្ត្រីបរិស្ថានថ្មី Nicolas Hulot បានប្រកាសពីគម្រោងហាមឃាត់នេះនៅថ្ងៃទី៦ ខែកក្កដា ដោយចាត់ទុកវិធានការនេះជាបដិវត្តន៍មួយ ព្រោះជាមហិច្ឆតាដ៏ធំ និងមិនងាយសម្រេចបានឡើយ។ បើតាមសារព័ត៌មាន France 24 លោក Hulot ក៏បានចាត់ទុកផែនការនេះជារឿងដ៏លំបាកសម្រាប់ក្រុមហ៊ុនផលិតឡានទាំងឡាយ ប៉ុន្តែបានអះអាងថា ឧស្សាហកម្មយានយន្តមានសមត្ថភាពគ្រប់គ្រាន់ក្នុងការផ្លាស់ប្ដូរទិសដៅរបស់ខ្លួន។

ជាមួយនឹងគ្នា រដ្ឋាភិបាលបារាំង ក៏បន្តការគាំទ្រក្រុមហ៊ុនផលិតឡានប្រើប្រាស់ថាមពលអគ្គីសនី និងថាមពលដែលបន្កផលប៉ះពាល់តិចដល់បរិស្ថាន ក៏ដូចជាអង្គការក្រៅរដ្ឋាភិបាលដែលចូលរួមក្នុងការប្រយុទ្ធប្រឆាំងបម្រែបម្រួលអាកាសធាតុផងដែរ។ នៅថ្ងៃទី៥ ខែកក្កដា ក្រុមហ៊ុនផលិតឡាន Volvo បានប្រកាសថាខ្លួននឹងឈប់ផលិតប្រើប្រាស់ប្រេងឥន្ធនៈ ហើយងាកមកផលិតឡានប្រើប្រាស់អគ្គីសនីជំនួសវិញចាប់ពីឆ្នាំ២០១៩ តទៅ។

ដោយឡែកក្រុមហ៊ុនផលិតឡានផ្សេងទៀតដូចជា Peugeot, Citroën និង Renault ជាដើម ក៏ស្ថិតក្នុងលេខខ្ពស់ក្នុងបញ្ជីក្រុមហ៊ុនដែលផលិតឡានបញ្ចេញឧស្ម័នកាបូនិចតិចជាងគេផងដែរ។ យ៉ាងណាមិញ បើតាមសារព័ត៌មាន Telegraph ឡានដែលប្រើប្រាស់ប្រេងសាំង និងម៉ាស៊ូត នៅមានអត្រាខ្ពស់ដដែលក្នុងទីផ្សាយយានយន្ត។ ឡានប្រើប្រាស់ឥន្ធនៈទាំងនេះមានចំនួនដល់ទៅ៩៥ភាគរយលើទីផ្សារ ខណៈឡានប្រើអគ្គីសនីមានចំនួន១,២ភាគរយ និងជាង៣ភាគរយទៀត គឺប្រើម៉ាស៊ីនចម្រុះ។

ទន្ទឹមគ្នានោះដែរ ក្នុងគោលដៅការពារបរិស្ថាន បារាំងក៏នឹងឈប់ផលិតថាមពលប្រើប្រាស់ធ្យូងថ្ម ដែលស្មើនឹង៥ភាគរយនៃតម្រូវថាមពលទូទាំងប្រទេសនៅត្រឹមឆ្នាំ២០២២ ក៏ដូចជាកាត់ការប្រើប្រាស់ថាមពលនុយក្លេអ៊ែរ ដែលមានចំនួន៧៥ភាគរយនៃតម្រូវទាំងអស់នៅត្រឹមឆ្នាំ២០២៥ ដែរ។ គម្រោងទាំងនេះ សុទ្ធតែជាការប្ដេជ្ញាចិត្តរបស់ប្រធានាធិបតី ម៉ាក្រុង ដែលចង់ដើរតួនាំមុខគេក្នុងការប្រយុទ្ធប្រឆាំងការឡើងកម្ដៅពិភពលោក ព្រមទាំងបម្រែបម្រួលអាកាសធាតុផង៕