បទយកការណ៍ / បទសម្ភាសន៍
រៀនចប់បរិញ្ញាបត្រធ្វើការសិន និងរៀនបន្តអនុបណ្ឌិតភ្លាមមួយណាល្អជាង?
×
និស្សិតកំពុងរៀននៅមហាវិទ្យាល័យមួយចំនួន កំពុងពិបាកចិត្ត។ ពួកគេមិនមែនបារម្ភខ្លាចរកការងារមិនបានធ្វើទេ ប៉ុន្តែពិបាកសម្រេចថា តើរៀនចប់បរិញ្ញាបត្រ គួរតែធ្វើការសន្សំបទពិសោធន៍សិន ឬត្រូវបន្តរៀនថ្នាក់អនុបណ្ឌិតភ្លាមតែម្តង។ និស្សិតខ្លះខ្លាចថា បើរៀនចប់ធ្វើការសិន ខ្លាចខាតពេល អាយុកាន់តែច្រើនរៀនលែងចូល ឬគ្មានពេលរៀន នៅពេលមានគ្រួសារ ខណៈនិស្សិតខ្លះគិតថាធ្វើការដើម្បីសន្សំពិសោធន៍ និងរកប្រាក់ផង មុនបន្តការសិក្សាទៀត។ និស្សិតខ្លះទៀត ជ្រើសយកការរៀនអនុបណ្ឌិតបណ្តើរ និងធ្វើការបណ្តើរ។
ជុំវិញរឿងនេះលោក ហឿន សំនៀង នាយករងខុទ្ទកាល័យរដ្ឋមន្ត្រីក្រសួងសាធារណការ យល់ថានិស្សិតរៀនចប់គួរតែធ្វើការសិន។ ផ្អែកតាមបទពិសោធន៍ផ្ទាល់ខ្លួន ដែលបានបញ្ចប់ថ្នាក់អនុបណ្ឌិតនៅសាកលវិទ្យាល័យហាវើដ សហរដ្ឋអាមេរិក លោក ហឿន សំនៀង បន្តថា ការធ្វើការសិនមុនបន្តការសិក្សានេះ នឹងធ្វើឲ្យនិស្សិតទទួលបានបទពិសោធន៍ ទំនាក់ទំនង ស្គាល់ច្បាស់ពីសង្គម និងធ្វើឲ្យនិស្សិតងាយស្រួលយល់ ពីមេរៀនថ្នាក់អនុបណ្ឌិត។
លោកបានធៀបការរៀនថ្នាក់បរិញ្ញាបត្រ និងអនុបណ្ឌិតថា ថ្នាក់បរិញ្ញាបត្រ បានបង្ហាត់មូលដ្ឋានគ្រឹះ និងទ្រឹស្តី ដល់មនុស្សក្មេងខ្ចី រីឯរៀនថ្នាក់អនុបណ្ឌិត ប្រៀបដូចជាការហ្វឹកហាត់បន្ថែមសម្រាប់មនុស្សដែលមានបទពិសោធន៍ ដែលធ្លាប់បានអនុវត្តទ្រឹស្តីដែលបានរៀននៅថ្នាក់បរិញ្ញាបត្រ។ លោក ហឿន សំនៀងថ្លែងដូច្នេះថា៖«បើយើងរៀនតែទ្រឹស្តី មិនយល់ទេ។ ក្មេងពេកនឹងមិនយល់ទ្រឹស្តីពិត នៅក្នុងពិសោធន៍ថ្នាក់អនុបណ្ឌិត។ នៅស្រុកគេ និស្សិតរៀនចប់បរិញ្ញាបត្រ ចូលធ្វើការ ៣ឆ្នាំ ទៅ៤ឆ្នាំ សិន ទើបគេរៀនថ្នាក់អនុបណ្ឌិត»។
សម្រាប់ លោក សំនៀង ធ្វើការសិនមុនរៀនបន្តថ្នាក់អនុបណ្ឌិតជាមនុស្សជោគជ័យខ្ពស់ ហើយការលើកឡើងដែលថា ខ្លាចពេលមានគ្រួសាររវល់ និងអាយុច្រើនរៀនលែងចូល ជាការគិតមិនបានឆ្ងាយ និងគ្រប់ជ្រុងជ្រោយ។
លោក ហុយ សម្បត្តិ គ្រូបង្រៀននៅសាកលវិទ្យាល័យមួយ ក៏យល់ស្របនឹងការលើកឡើងរបស់លោក សំនៀងដែរ។ គ្រូបង្រៀនរូបនេះបន្ថែមថា ពេលចប់ថ្នាក់បរិញ្ញាបត្រ និស្សិតភាគច្រើន ក៏មិនដឹងថា គាត់មានចំណាប់អារម្មរណ៍ និងទេពកោសល្យផ្នែកអ្វីឲ្យប្រាកដដែរ ប៉ុន្តែនៅពេលដែលពួគាត់ចំណាយ ពេល១ឆ្នាំ ទៅ២ឆ្នាំ ធ្វើការសិន ទើបអាចរកឃើញអ្វីដែលគាត់ស្រលាញ់ និងចូលចិត្ត។ លោក ហុយ សម្បត្តិ ក៏លើកទឹកចិត្តឲ្យនិស្សិត រៀនបណ្តើរ ធ្វើការបណ្តើរដែរ ប៉ុន្តែត្រូវឲ្យមានតុល្យភាពរវាង ការរៀន និងធ្វើការព្រមទាំងមានទំនួលខុសត្រូវខ្ពស់លើកិច្ចការទាំង២នេះ។
គ្រូបង្រៀនរូបនេះ ក៏មើលឃើញពីសក្តានុពលរបស់យុវជនខ្មែរនាសម័យបច្ចុប្បន្នដែរថា ពួកគេពូកែៗច្រើន និងក៏មានឱកាសច្រើនដែរ ទទួលបានអាហារូបករណ៍ទៅសិក្សាបន្តនៅបរទេស។ បញ្ហានៅត្រង់ថា ពួកគេខ្លះមានវ័យក្មេង ខ្វះបទពិសោធន៍ ប៉ុន្តែការរំពឹងខ្ពស់ ពោលពួគគាត់ចង់បានតំណែងខ្ពស់ និងប្រាក់បៀវត្សច្រើនពេលរៀនចប់។
អ្នកស្រី ណារិទ្ធ ណារឺមិ អ្នកគ្រប់គ្រងទូទៅក្រុមហ៊ុន CDL HR ដែលជាក្រុមហ៊ុនជ្រើសរើសធនធានមនុស្សលើកឡើងផ្ទុយបន្តិច។ អ្នកស្រី ណារិទ្ធ ណារឺមិ និយាយថា ការរៀនសូត្រ មិនចាំបាច់ទាល់តែចូលមហាវិទ្យាល័យទេ ឬរៀនបន្តថ្នាក់អនុបណ្ឌិតទេ ប៉ុន្តែវាអាស្រ័យលើការតាំងចិត្ត ថាយើងចង់ធ្វើអ្វី? ក្តីសុបិនរបស់យើងជាអ្វី? ត្រង់ន័យនេះ មិនមែនមានន័យថា ការបន្តរៀនបណ្ឌិតមិនល្អនោះទេ ប៉ុន្តែយើងមានសមត្ថភាពធ្វើការងារជាក់ស្តែង។ អ្នកគ្រប់គ្រងទូទៅក្រុមហ៊ុន CDL HRរូបនេះបន្តថា ការងារជាអ្នកបង្រៀនមនុស្ស។
ជារួម រៀនចប់ធ្វើការសិន ឬបន្តការសិក្សាអនុបណ្ឌិតភ្លាម អាស្រ័យលើខ្លួនយើងផ្ទាល់ ជាអ្នកសម្រេច។ រៀនចប់រួចធ្វើការងារសិន ធ្វើឲ្យយើងមានបទពិសោធន៍ការងារ ទំនាក់ទំនង និងស្គាល់សង្គមច្បាស់ និងជាទុនដែលនាំឲ្យស្គាល់ខ្លួនឯងកាន់តែច្បាស់ ព្រមទាំងងាយស្រួលសម្រេចចិត្ត រើសជំនាញអ្វីនៅថ្នាក់អនុបណ្ឌិត។ រៀនចប់បរិញ្ញាបត្រភ្លាម រៀនបន្តភ្លាម ក៏ម្យ៉ាងប្រសិនបើយើងមានធនធានគ្រប់គ្រាន់ និងចង់ស្រវាយកចំនេះដាក់ក្នុងខ្លួនឲ្យច្រើនសិនមុនចេញធ្វើការ។ ប៉ុន្តែពេលចប់អនុបណ្ឌិត ហើយធ្វើការក្នុងតំណែងណាមួយ និស្សិតអាចស្ទើរបទពិសោធន៍ មិនសូវយល់ពីបរិបទសង្គម៕
© រក្សាសិទ្ធិដោយ thmeythmey.com