ម៉ារ៉ាតុនចក្រភពខ្មែរ៖ ចិន ជប៉ុន និងម៉ាឡេស៊ី ចុះឈ្មោះចូលរួមច្រើនក្នុងចំណោមអត្តពលិកបរទេស

កីឡាជាតិ

ជាតិ

ម៉ារ៉ាតុនចក្រភពខ្មែរ៖ ចិន ជប៉ុន និងម៉ាឡេស៊ី ចុះឈ្មោះចូលរួមច្រើនក្នុងចំណោមអត្តពលិកបរទេស

12, Jul 2017 , 5:02 pm

រូបភាព

លោក វ៉ាត់ ចំរើន អគ្គលេខាធិការ NOCC ថ្លែងក្នុងសន្និសីទសារព័ត៌មានស្តីពីទិវារត់ប្រណាំងម៉ារ៉ាតុនចក្រភពខ្មែរលើកទី៤

ដោយ:

អត្តពលិកមកពីប្រទេសចិនបានឈរលំដាប់ទី១ក្នុងចំណោមអត្តពលិកបរទេសទាំង៥១ប្រទេស ដែលបានចុះឈ្មោះចូលរួមទិវារត់ប្រណាំងម៉ារ៉ាតុនចក្រភពខ្មែរនាខែសីហា នៅលើទឹកដីអង្គរខេត្តសៀមរាប។ គិតត្រឹមថ្ងៃទី១២ ខែកក្កដា ព្រឹត្តិការណ៍នេះទទួលបានអ្នកចុះឈ្មោះចូលរួមប្រមាណជាជាង៣ពាន់នាក់ ក្នុងនោះអត្តពលិកបរទេសមានប្រមាណជា១,៥០០នាក់ ដែលមកពី៥១ប្រទេសទូទាំងពិភពលោក។ ថ្នាក់ដឹកនាំកីឡារំពឹងថា ឆ្នាំនេះអ្នកចូលរួមនឹងកើនឡើងពី៥ទៅ១០ភាគរយបើធៀបទៅនឹងឆ្នាំមុន។

បើយោងតាមអគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ចំនួនអ្នកចុះឈ្មោះចូលរួមព្រឹត្តិការណ៍រត់ប្រណាំងម៉ារ៉ាតុនចក្រភពខ្មែរបានកើនឡើងជាង៣ពាន់នាក់ហើយគិតត្រឹមថ្ងៃទី១២ ខែកក្កដា ឆ្នាំ២០១៧ នេះ។ ក្នុងនោះអត្តពលិកកម្ពុជាមានចំនួន១,៧៥៥នាក់ និងអត្តពលិកបរទេសមានចំនួន១,៥០០នាក់។ ក្នុងចំណោមអត្តពលិកបរទេសទាំងនេះ ចិន ឈរលំដាប់ទី១ ជប៉ុនលំដាប់ទី២ និងម៉ាឡេស៊ីលំដាប់ទី៣ ក្នុងចំណោម៥១ប្រទេសដែលបានចុះឈ្មោះចូលរួម។

ពាក់ព័ន្ធនឹងការឈរលេខ១របស់ចិន លោក វ៉ាត់ ចំរើន បានពន្យល់ថា ដោយសារគណៈកម្មារៀបចំការប្រកួតបានពឹងទីស្នាក់នៅចិនជួយផ្សព្វផ្សាយព័ត៌មាននៅទីនោះ។ ម្យ៉ាងទៀត ចិនជាគោលដៅទេសចរណ៍ទី១ និងសំខាន់ជាងគេក្នុងចំណោមប្រទេសនៅលើពិភពលោករបស់ផែនការក្រសួងទេសចរណ៍។

«ក្រសួងទេសចរណ៍បានដាក់គោលដៅនៅឆ្នាំ២០២០ ធ្វើយ៉ាងណាទាក់ទាញភ្ញៀវទេសចរណ៍ចិនឲ្យបាន២០លាននាក់។ ក្នុងយុទ្ធសាស្ត្ររបស់ក្រសួងទេសចរណ៍នេះដែរ ក៏បានដាក់បញ្ចូលវិស័យកីឡានៅក្នុងនោះផងដែរ។ បញ្ហានេះអាចជាកត្តាដែលធ្វើឲ្យអត្តពលិកចិនមានការកើនឡើងខ្លាំងជាងគេ»។ នេះជាការលើកឡើងរបស់ លោក វ៉ាត់ ចំរើន ដែលបានបន្ថែមថា ការផ្តោតចិនជាគោលដៅទេសចរណ៍ដោយសារចិនជាប្រទេសមានសេដ្ឋកិច្ចរីកចម្រើន និងមានប្រជាជនច្រើនជាងគេលើពិភពលោក។

ប្រធានគណៈកម្មការរៀបចំព្រឹត្តិការណ៍ម៉ារ៉ាតុនចក្រភពខ្មែររូបនេះបានបន្ថែមថា ព្រឹត្តិការណ៍ម៉ារ៉ាតុនចក្រភពខ្មែររៀបចំឡើងក្នុងគោលបំណងធំៗ៣ គឺដើម្បីទាក់ទាញភ្ញៀវទេសចរណ៍ជាតិ និងអន្តរជាតិឲ្យមកទស្សនាតំបន់ទេចរណ៍ប្រវត្តិសាស្ត្រអង្គរក្នុងរដូវខ្សត់ភ្ញៀវទេចរណ៍, ដើម្បីប្រមូលថវិកាជួយដល់មន្ទីរពេទ្យកុមារ និងអង្គការមនុស្សធម៌នានា និងដើម្បីបំផុសចលនាការពារបរិស្ថានក្នុងបរិវេណរតំបន់ទេសចរណ៍ប្រវត្តិស្តាស្រមួយនេះ។

លោកបានបន្ថែមទៀតថា ព្រឹត្តិការណ៍ម៉ារ៉ាតុនចក្រភពខ្មែរដែលធ្វើឡើងនៅថ្ងៃទី៦ ខែសីហា ខាងមុខ មាន៤ប្រភេទវិញ្ញាសាចូលរួម គឺវិញ្ញាសាម៉ារ៉ាតុន, ពាក់កណ្តាលម៉ារ៉ាតុន, រត់ចម្ងាយ១០គីឡូម៉ែត្រ និងរត់បែបកម្សាន្តចម្ងាយ៣គីឡូម៉ែត្រ។ គិតត្រឹមថ្ងៃទី១២ ខែកក្កដា អ្នកចុះឈ្មោះចូលរួមវិញ្ញសាម៉ារ៉ាតុនមានជាង៥០០នាក់, វិញ្ញាសាពាក់កណ្តាលម៉ារ៉តុនជាង៦០០នាក់, ១០គីឡូម៉ែត្រជិត៥០០នាក់ និង៣គីឡូម៉ែត្រមានជាង១ពាន់នាក់។

តែយ៉ាងណា ចំនួននេះអាចមានការប្រែប្រួល ព្រោះការចុះឈ្មោះមិនទាន់បិទបញ្ជីនោះទេសម្រាប់អត្តពលិកកម្ពុជា ពោលគឺបិទតែសម្រាប់បរទេសតែប៉ុណ្ណោះ។ លោក វ៉ាត់ ចំរើន រំពឹងថា នៅឆ្នាំនេះចំនួនអ្នកចុះឈ្មោះចូលរួមព្រឹត្តិការណ៍ម៉ារ៉ាតុនចក្រភពខ្មែរនឹងមានការកើនឡើងពី៥ទៅ១០ភាគរយដោយធៀបទៅនឹងឆ្នាំមុនដែលមានតែជិត៣ពាន់នាក់៕