កីឡាជាតិ
ជាតិ
NOCC ធ្វើការកែទម្រង់វេបសាយឲ្យមានស្តង់ដា ដើម្បីផ្តល់ព័ត៌មានរហ័សនិងទាន់ហេតុការណ៍
× គណៈកម្មាធិការជាតិអូឡាំពិកកម្ពុជា(NOCC)បាននិងកំពុងធ្វើការកែទម្រង់គេហទំព័រផ្លូវការ www.nocc.org.kh របស់ខ្លួនឲ្យមានតាមស្តង់ដាអន្តរជាតិ ដើម្បីផ្តល់ព័ត៌មានទាន់ហេតុការណ៍ពីព្រឹត្តិការណ៍ក្នុងស្រុក និងក្រៅស្រុក។ លើសពីនេះ NOCC នឹងបង្កើត APP ដែលអាចប្រើតាមរយៈទូរសព្ទស្មាតហ្វូនទៀតផង។ ទម្រង់ថ្មីនេះ នឹងដាក់ឲ្យប្រើប្រាស់ជាផ្លូវការនៅសប្តាហ៍ក្រោយ។
អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានបញ្ជាក់ថា NOCC នឹងធ្វើការកែទម្រង់គេហទំព័ររបស់ខ្លួនឲ្យក្លាយជាគេហទំព័រមានបច្ចេកវិទ្យាទំនើប និងស្របតាមស្តង់ដាអន្តរជាតិ ដែលអាចផ្តល់ព័ត៌មានភ្លាមៗពីការប្រកួតផ្សេងៗទាំងព្រីត្តិការណ៍ជាតិ និងអន្តរជាតិ។ សម្រាប់ការកែទម្រង់វេបសាយថ្មីនេះ ដោយមានការសហការពីអ្នកជំនាញមកពីប្រទេសអ៊ីស្លង់ និងអង់គ្លេស ដោយមានការគាំទ្រពីអង្គការសាមគ្គីអូឡាំពិកអន្តរជាតិ។
លោកបានបន្តថា ក្រោយទម្រង់ថ្មីនៃគេហទំព័រ www.nocc.org.kh ដាក់ឲ្យប្រើប្រាស់ជាផ្លូវការនៅសប្តាហ៍ក្រោយ NOCC នឹងបង្កើត APP ដែលអាចប្រើប្រាស់នៅលើទូរស័ព្ទស្មាតហ្វូន ដើម្បីបង្កលក្ខណងាយស្រួលអ្នកប្រើប្រាស់ទៀតផង។ កម្មវិធី APP ដែល NOCC គ្រោងបង្កើតនេះ នឹងចេញជារូបរាងមុនការប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី នាខែសីហា។
«យើងនឹងធ្វើការកែទម្រង់ប្រព័ន្ធផ្សាយរបស់យើងឲ្យមានលក្ខណទំនើបដោយភ្ជាប់ជាមួយ APP។ យើងគ្រាន់តែក្លិចទៅលើ APP ដែលនៅលើស្មាតហ្វូន យើងនឹងចូលក្នុងវេបសាយរបស់ NOCC ដែលមានព័ត៌មានទាន់ហេតុ និងព្រឹត្តិការណ៍ផ្សេងៗនៅទីនោះតែម្តង។ លើសពីនេះយើងនឹងឃើញស្ថិតិផ្សេងៗពីការប្រកួតភ្លាមៗផងដែរ»។ នេះជាការលើកឡើងរបស់លោក វ៉ាត់ ចំរើន៕
© រក្សាសិទ្ធិដោយ thmeythmey.com