ពីនេះ ពីនោះ
តើពាក្យ ខារាអូខេ(Karaoke) មានប្រវត្តិមកពីណា? និងមានន័យដូចម្តេច?
× ខារាអូខេ តាមសំនៀងភាសាខ្មែរ ឬការ៉ាអុកិ (Karaoke) តាមភាសាជប៉ុន កំពុងពេញនិយមទាំងនៅកម្ពុជា និងនៅសកលលោក ប៉ុន្តែសម្រាប់នៅកម្ពុជា មនុស្សភាគច្រើន ពុំបានដឹង ឬយល់អត្ថន័យ នៃពាក្យខារាអូខេ ការ៉ាអុកិនេះទេ។
ខារាអូខេ ឬការ៉ាអុកិ គឺជាពាក្យពីរម៉ាត់នៃភាសាជប៉ុន ផ្សំចូលគ្នា គឺការ៉ា និងអុកិ។ ភាសាជប៉ុន ពាក្យថា ការ៉ា មានន័យថា ទទេ ឬគ្មាន។ ចំណែកពាក្យថា អុកិ មកពីភាសាបារាំង ថា អ័គកេះ ដែលខ្មែរយើងហៅថា តន្ត្រី ឬភ្លេង។ ដូច្នេះ ពាក្យថា ខារាអូខេ ឬការ៉ាអុកិ មានន័យ ថា កម្មវិធី ដែលមានតែតន្ត្រី ឬភ្លេងទទេ។ ប្រសិនបើយើងទៅការ៉ាអុកិ មានន័យថា យើងទៅ ច្រៀង ចម្រៀង ដែលមានតែភ្លេង ឬតន្ត្រីទទេ។ ប៉ុន្តែ សម្រាប់នៅកម្ពុជា ឬនៅប្រទេស ផ្សេងៗ មួយចំនួនទៀត ពេលទៅខារាអូខេ ឬការ៉ាអុកិ គឺទៅដើម្បីបានឱប ស្ទាបអង្អែល បានកេះកៀវ នារីក្មេងៗ ឬអាចឈានដល់សេវាផ្លូវភេទផងដែរ។ នៅកម្ពុជា បើគេនិយាយថា ទៅខារាអូខេ មិនមែនទៅច្រៀងកម្សាន្តបំបាត់អផ្សុកទេ តែគោលដៅគេគឺទៅឱបស្រី នៅក្នុងបន្ទប់ខារាអូខេ។
ការ៉ាអុកិ(Karaoke) ឬខារាអូខេ ត្រូវបានបង្កើតឡើងដោយលោកដាយស៊ូកិ អ៊ីណូអិ (DAISUKE INOUE) ជនជាតិជប៉ុន កាលពីអំលុងឆ្នាំ១៩៧០ ហើយនៅឆ្នាំ១៩៧១ កម្មវិធីនេះ ចាប់ផ្តើមល្បីល្បាញខ្លាំងនៅទីក្រុងកូបេ និងនៅរដ្ឋកាលីហ្វ័រញ៉ា សហរដ្ឋអាមេរិក។
លោកដាយស៊ូកិ អ៊ីណូអិ ជាក្រុមតន្ត្រីមួយប្រចាំក្លឹបកម្សាន្ត នៅទីក្រុងអូសាកា ប្រទេសជប៉ុន។ លោកពុំមែនជាអ្នកជំនាញខាងតន្ត្រីទេ តែលោកបង្កើតជាខារាអូខេ ឬការ៉ាអុកិ នេះ គឺធ្វើទៅតាមសំណើ របស់ប្រធានក្រុមហ៊ុនម្នាក់ ដែលគេមិនបង្ហាញឈ្មោះ ចង់ច្រៀងលេងម្នាក់នៅពេលខ្លួនអផ្សុក។ ប្រធានក្រុមហ៊ុនេះ ស្នើឲ្យលោកដាយស៊ូកិ អ៊ីណូអិ ប្រគុំតន្ត្រី ក្នុងក្លឹប ដើម្បីគាត់ច្រៀងម្នាក់ឯង។ លោកដាយស៊ូកិ អ៊ីណូអិ មានអារម្មណ៍ថា ប្រសិនបើគេអាច ច្រៀងម្នាក់ឯងបាន ម្តេចក៏យើងមិនរកវិធី បំពាក់បច្ចេកវិជ្ជាថ្មី ទៅម៉ាស៊ីនចាក់ថាស ហើយ ច្រៀងតែម្នាក់ឯង ចខាងក្រៅក្លឹបទៅ?។ ចាប់ពីពេលនោះមកលោក និងសហការី បានបង្កើតបន្ទប់សម្រាប់ច្រៀងជាឯកជន ចំនួន១១បន្ទប់ ដោយបំពាក់គ្រឿងបរិក្ខា មានកាស្សែត មានអំភ្លី និងចាប់ផ្តើមចុះកិច្ចសន្យាជួលម៉ាស៊ីនចាក់តាមរង្គសាល ក្នុងទីក្រុងកូបេ នៅឆ្នាំ១៩៧១។
លោកអ៊ីណូអិ បានធ្វើឲ្យការខ្មាសអៀនរបស់ប្រជាជនជប៉ុន ដែលមិនហ៊ានច្រៀង មានការផ្លាស់ប្តូរ ចាម់ពីពេលនោះមក ហើយពិភពលោកទាំងមូល ក៏ទទួលយកកម្មវិធីរបស់លោកទៅធ្វើអាជីវកម្មដោយសេរី ប៉ុន្តែ ប្រហែលដោយសារបញ្ហាកម្មសិទ្ធិបញ្ញា សព្វថ្ងៃ លោកស្ទើរតែពុំមានអ្វីសោះ។ ឯក្រុមហ៊ុន ខារាអូខេ ដែលលោកប្រគល់ឲ្យប្អូនប្រុស របស់លោកគ្រប់ គ្រងនោះ បានបិទទ្វារទៅហើយ។ លោកអ៊ីណូអិ និយាយថា ខ្ញុំជាអ្នកបង្កើត ជាម៉ែឪ ខារាអូខេ តែឥឡូវខ្ញុំបានបោះបង់ វាចោលហើយ៕
© រក្សាសិទ្ធិដោយ thmeythmey.com