រថយន្ត
ក្រុមហ៊ុនស្កុតឡេនដំណើរការរថយន្តដែលប្រើជីវឥន្ធនៈចេញពីស្រាវីស្គី
× ការបង្កើតថ្មីមិនមានទីកំណត់ឡើយ។ សហគ្រាសមួយនៅស្កុតឡែន បានបង្ហាញភាពជោគជ័យរបស់ខ្លួនក្នុងការដំណើរការរថយន្តចាក់ស្រាវីស្គី ជំនួសប្រេងសាំង និងម៉ាស៊ូត។ នេះបើតាមការផ្សាយរបស់សារព័ត៌មាន BBC Scotland។
ក្រុមហ៊ុន Celtic Renewables ដែលកើតចេញពីការផ្តួចផ្តើមរបស់សាកលវិទ្យាល័យ Edinburgh Napier University ក្រោមកិច្ចសហការជាមួយសហគ្រាសស្រាវីស្គី Tullibardine Distillery បានទទួលជោគជ័យលើការសាកល្បងរថយន្តដំណើរការស្រាវីស្គី ជំនួសប្រេងសាំង និងម៉ាស៊ូត។
សាស្ត្រាចារ្យ Martin Tangney ស្ថាបនិកក្រុមហ៊ុន Celtic Renewables បានអះអាងថា ក្រៅពីប្រេងប្រេងសាំង ឬម៉ាស៊ូត គេអាចប្រើប្រាស់ជីវឥន្ទនៈ ដែលទទួលបានតាមរយៈកំសួល ដូចជាករណីស្រាវីស្គី ដែលមានកាកសំណល់ធញ្ញជាតិ ជាដើម។
កាលពីថ្ងៃទី៧ ខែកក្កដា ឆ្នាំ២០១៧ កន្លងមក ក្រុមហ៊ុន Celtic Renewables បានដាក់សាកល្បងដំណើររថយន្ត Ford Focus មួយគ្រឿង ឲ្យដើរដោយឥទ្ធិពលស្រាវីស្គី។ ទោះបីជាយ៉ាងណាក៏ដោយ ថ្នាក់ដឹកនាំក្រុមហ៊ុន បានអះអាងថា សមាសធាតុស្រាវីស្គីរួមចំណែកប្រមាណ១០ភាគរយប៉ុណ្ណោះ ដើម្បីឲ្យរថយន្តដំណើរការទៅមុខ ត្រូវមានការចូលរួមពីសមាសធាតុផ្សំនៃជីវឥន្ទនៈជាច្រើនទៀត។
លោក Martin Tangney និងលោក Mark Simmers ដែលជានាយកប្រតិបត្តិ បានអះអាងថា ការបំលែងបែបនេះ មិនត្រូវឲ្យរថយន្តកែប្រែម៉ាស៊ីននោះឡើយ។
យោងតាម BBC Scotland ក្រុមហ៊ុន Celtic Renewables បានទទួលជំនួយហិរញ្ញវត្ថុពីរដ្ឋាភិបាលក្នុងរង្វង់ទឹកប្រាក់ប្រមាណ១២លានដុល្លារដើម្បីតម្លើងរោងចក្រនៅក្រុង Gramgemouth ហើយវានឹងចាប់ផ្តើមប្រតិបត្តិការពេញលេញនៅឆ្នាំ២០១៩ ។
គេជឿជាក់ថា ជីវឥន្ទនៈដែលកើតចេញពីស្រាវីស្គី នឹងក្លាយជាឧស្សហកម្មដ៏មានសក្តានុពលមួយនៅប្រទេសស្កុតឡេន នាពេលអនាគត ប៉ុន្តែប្រទេសដែលផលិតស្រាវីស្គីមួយចំនួនដូចជា ជប៉ុន ឥណ្ឌា និងអាមេរិកជាដើមនោះ នឹងក្លាយជាដៃគូដ៏សំខាន់៕
© រក្សាសិទ្ធិដោយ thmeythmey.com