ថៃ៖ ខឹងអាជ្ញាធរអត់ធ្វើផ្លូវ អ្នកភូមិនាំគ្នាដាំស្រូវកណ្តាលផ្លូវ

អន្តរជាតិ

ថៃ៖ ខឹងអាជ្ញាធរអត់ធ្វើផ្លូវ អ្នកភូមិនាំគ្នាដាំស្រូវកណ្តាលផ្លូវ

18, Jul 2017 , 7:39 pm

រូបភាព

ដោយ: ធីតា

អ្នកភូមិនៅស្រុក Loeng Nok Tha ខេត្ត Yasothon ភាគឦសានរបស់ប្រទេសថៃ កាលពីសប្តាហ៍មុន បាននាំគ្នាក្រោកទាំងព្រឹកព្រហាមដើម្បីដាំស្រូវលើផ្លូវបែកភក់ដែលខូចខាតទាំងស្រុង។ បើតាមការផ្សាយរបស់កាសែត Khaosod English នេះជាទង្វើតវ៉ារបស់អ្នកភូមិប្រឆាំងនឹងអាជ្ញាធរដែនដីដែលមិនអើពើ ជួសជុលផ្លូវ។

អ្នកភូមិតំណាងជាង២០គ្រួសារ បានអះអាងថា នារយៈពេលជាង៣០ឆ្នាំមកនេះ ពួកគាត់បានដាក់សំណូមពររាប់ភ្លេច ទៅកាន់អាជ្ញាធរខេត្ត Yasothon ដើម្បីជួសជុលផ្លូវនៅក្នុងស្រុក Leong Nok Tha ដែលរងការខូចខាត ជាពិសេសបែកភក់ពេញ នៅពេលមានភ្លៀងម្តងៗ ប៉ុន្តែអាជ្ញាធរបានតបវិញថា គ្មានថវិកាគ្រប់គ្រាន់ ហើយក្រោយមកបំភ្លេចចោល។

តាមសម្តីដែលដកស្រង់ដោយ Khaosod English អ្នកភូមិម្នាក់ឈ្មោះ Josaifa Khunsut បានអះអាងថា៖ «អ្នកភូមិជាច្រើនត្រូវប្រើប្រាស់ផ្លូវនេះ ដោយយើងទាំងអស់គ្នាជួបការពិបាកយ៉ាងខ្លាំងក្នុងការធ្វើដំណើរ ជាពិសេសរដូវភ្លៀង»។

អ្នកភូមិបានបញ្ជាក់ឲ្យដឹងថា ផ្លូវដ៏កខ្វក់នេះ មានប្រវែងប្រមាណ៣គីឡូម៉ែត្រ ហើយជម្រៅធ្លាក់ដល់ទៅជាង៣០សង់ទីម៉ែត្រជាពិសេសនៅរដូវវស្សា។

ការសម្រេចចិត្តដាំស្រូវនៅលើផ្លូវនេះ ធ្វើឡើងក្នុងគោលបំណងដាស់សតិអារម្មណ៍អាជ្ញាធរដែនដីឲ្យគិតគូរហេដ្ឋារចនាសម្ព័ន្ធមូលដ្ឋាន ជាពិសេសអ្នកភូមិរំពឹងថា ករណីនេះ នឹងបានដឹងលឺដល់លោកនាយករដ្ឋមន្ត្រីថៃ ប្រាយុទ្ធ ចាន់អូចា៕