សេដ្ឋកិច្ចអន្តរជាតិ
អន្តរជាតិ
រដ្ឋមន្ត្រីទេសចរណ៍ម៉ាឡេស៊ី ថា«ភាពរាក់ទាក់ វប្បធម៌ និងធម្មជាតិ» ជាគន្លឹះស្រូបទេសចរមកអាស៊ាន រដ្ឋមន្រ្តីក្រសួងទេសចរណ៍ និងវប្បធម៌ម៉ាឡេស៊ី(រូបកណ្ដាល)
× ម៉ាឡេស៊ី៖ រដ្ឋមន្ត្រីក្រសួងទេសចរណ៍ និងវប្បធម៌របស់ប្រទេសម៉ាឡេស៊ី លោក YB Dato’ Seri Mohamed Nazri bin Abdul Aziz បានជំរុញប្រជាជាតិអាស៊ានយកចិត្តទុកដាក់ពី«ភាពស្វាមគមន៍ (Hospitality) វប្បធម៌ និងសម្បត្តិធម្មជាតិ ដែលជាកត្តាចម្បង ដើម្បីទាក់ទាញភ្ញៀវទេសចរសក ល មកទស្សនាតំបន់អាស៊ាន។
រដ្ឋមន្ត្រីទេសចរណ៍ម៉ាឡេស៊ីរូបនេះ បានលើកឡើងបែបនេះ នាឱកាសលោកធ្វើជាអធិបតីក្នុងសន្និសីទកាសែតបើកកម្មវិធី Asean media bloggers tourism hunt ២០១៧ នៅទីក្រុងកូឡាឡាំពួ នៅថ្ងៃទី ១១ខែកក្កដា។
«បើយើងដើរកម្សាន្តក្នុងតំបន់អាស៊ាន យើងមានអារម្មណ៍ថាគ្មានអ្វីខុសប្លែកគ្នាទេ។ ប្រជាជនមានភាពរួសរាយរាក់ទាក់ ដែលនោះហើយកត្តាចម្បងដើម្បីទាក់ទាញភ្ញៀវទេសចរ»។ នេះជាគូសបញ្ជាក់របស់លោករដ្ឋមន្ត្រីម៉ាឡេ។
ជាមួយគ្នានឹងភាពរួសរាយរាក់ទាក់ វប្បធម៌ដ៏សម្បូរបែបក៏ជាកត្តាដ៏សំខាន់ដើម្បីស្រូបយកអ្នកទស្សនាជុំវិញពិភពលោកមកតំបន់អាស៊ាន។ រដ្ឋមន្ត្រីទេសចរណ៍ម៉ាឡេស៊ីថ្លែងដូចនេះថា៖«បើទោះយើងជាអាស៊ានតែមួយ ប៉ុន្តែយើងមានវប្បធម៌ដ៏សម្បូរបែប។ បើយើងទៅកម្ពុជា មីយ៉ានម៉ា ថៃជាដើម យើងឃើញភាពសម្បូរបែបទាំងនោះ ដូចជាម្ហូបអាហារ តន្ត្រី ជាអាទិ៍»។
«ខ្ញុំគិតថាអ្វីទាំងនេះ រួមទាំងសម្បត្តិធម្មជាតិយ៉ាងស្រស់ស្អាតនៅគ្រប់ទីកន្លែង យើងគួរតែពង្រឹងបន្ថែម ដើម្បីទាញយកលំហូរភ្ញៀវទេសចរពិភពលោក»។ នេះជាការថ្លែងជំរុញរបស់ លោក YB Dato’ Seri Mohamed ដល់បណ្ដាប្រជាជាតិអាស៊ាន។
ភ្ញៀវទេសចរសរុបក្នុងតំបន់អាស៊ានមានចំនួនជាង ១០៤លាននាក់ កាលពីឆ្នាំ២០១៥ ដែលក្នុងនោះជិត ៥០ភាគរយជាអ្នកទេសចរក្នុងតំបន់។ នេះបើតួលេខពីវេទិកាសេដ្ឋកិច្ចពិភពលោក៕
© រក្សាសិទ្ធិដោយ thmeythmey.com