ជាតិ
សង្គមជាតិ
បង្ក្រាបបទល្មើសគំរាមប្រាក់ជាថ្នូរមិនទម្លាយវីដេអូអាក្រាត តែបែរជារកឃើញថាជនល្មើសជាអ្នកទោសកំពុងជាប់ឃុំ
× ស្នងការនគរបាលខេត្តកណ្តាល បានរកឃើញអ្នកទោសម្នាក់ មានជាប់ពាក់ព័ន្ធនឹងករណីគំរាមប្រាក់តាមបណ្តាញសង្គម ជាថ្នូរនឹងការមិនទម្លាយវីដេអូអាក្រាតរបស់ជនរងគ្រោះ។ បើតាម លោក អ៊ាវ ចំរើន ស្នងការនគរបាលខេត្តកណ្តាល សំណុំរឿងនេះ បានបញ្ជូនទៅតុលាការខេត្តកណ្តាលរួចរាល់ហើយ នៅថ្ងៃទី១៩ ខែកក្កដា។
ក្រោយទទួលពាក្យបណ្តឹង ជុំវិញករណីគំរាមទារប្រាក់៥ពាន់ដុល្លារ ជាថ្នូរនឹងការមិនបង្ហោះវីដេអូ ស្នងការនគរបាលខេត្ត កណ្តាល បានស្រាវជ្រាវ និងរកឃើញថា ជនល្មើស ដែលជាប់ពាក់ព័ន្ធនឹងករណីគំរាមទារប្រាក់នេះ គឺជាអ្នកទោស ដែលកំពុងជាប់ឃុំនៅក្នុងពន្ធនាគារខេត្តព្រៃវែង។
លោក អ៊ាវ ចំរើន ស្នងការនគរបាលខេត្តកណ្តាល បានថ្លែងតាមទូរសព្ទប្រាប់សារព័ត៌មានថ្មីៗថា នគរបាល បានរៀបចំសំណុំរឿង និងបញ្ជូនទៅកាន់តុលាការហើយ នៅថ្ងៃទី១៩ ខែកក្កដានេះ បន្ទាប់ពីស្រាវជ្រាវអស់រយៈពេលច្រើនថ្ងៃមក។
ទាក់ទងនឹងករណីនេះ លោក អ៊ាវ ចំរើន បានសរសេរទំព័រហ្វេសប៊ុករបស់ខ្លួន ដោយផ្អែកតាមចម្លើយសារភាពរបស់ជនល្មើសថា ជនល្មើស ឈ្មោះ យ៉ែម ប្រុស មានទោសត្រូវជាប់ពន្ធនាគារចំនួន១០ឆ្នាំ បទប្លន់នៅក្នុងខេត្តកំពត និងខេត្តតាកែវ ហើយបានអនុវត្តទោសតាំងពីឆ្នាំ២០១០។ អ្នកទោសនេះ ត្រូវបានផ្ទេរពីពន្ធនាគារខេត្តកំពត មកកាន់ពន្ធនាគារខេត្តព្រៃវែង ជាទីកន្លែងដែលរូបគេ អាចចេញបន្ទប់ឃុំឃាំង និងអាចប្រើកុំព្យូទ័រ និងទូរស័ព្ទដៃផ្ទាល់ខ្លួន ដោយមានការអនុញ្ញាតពីអនុប្រធានពន្ធនាគារខេត្តព្រៃវែង លោក អ៊ុំ រ៉ាយឿង។ នេះបើតាមទំព័រហ្វេសប៊ុកលោកស្នងការខេត្តកណ្តាលដដែល។
ផ្អែកតាមចម្លើយសារភាព ជនល្មើសបានប្រើហ្វេសប៊ុក និងLine ដើម្បីសុំស្នេហ៍នារីរងគ្រោះ រហូតដល់នាងព្រមស្រឡាញ់។ បន្តមកទៀត ជនល្មើសបានលួងលោម បញ្ចុះបញ្ចូលជនរងគ្រោះ រហូតដល់ឆាជាវីដេអូអាក្រាត រួចជនល្មើសលួចថតទុក ដើម្បីគំរាមប្រាក់។
យ៉ាងណាមុននឹងរកមុខជនល្មើសឃើញ ជនរងគ្រោះធ្លាប់បានផ្ញើប្រាក់ ជាង៥០០ដុល្លាររួចហើយឲ្យជនល្មើស ហើយមានមន្ត្រីពន្ធនាគារ ជាអ្នកទៅដកប្រាក់នោះមកឲ្យជនល្មើស។ ស្នងការខេត្តកណ្តាល បានឲ្យដឹងទៀតថា ក្រៅពីនារីរងគ្រោះ សមត្ថកិច្ច ក៏បានរកឃើញមានវីដេអូអាក្រាតរបស់ជនរងគ្រោះ ៥ទៅ៦នាក់ផ្សេងទៀតដែរនៅក្នុងកុំព្យូទ័រជនល្មើស។ យ៉ាងណាក៏ដោយ លោក អ៊ាវ ចំរើន បានប្រាប់ជនរងគ្រោះផ្សេងទៀតកុំបារម្ភ ដោយលោក នឹងសុំការអនុញ្ញាតពីព្រះរាជអាជ្ញារដើម្បីបំផ្លាញវីដេអូទាំងនោះចោល៕
Tag:
អ៊ាវ ចំរើន
អ្នកទោស
គំរាមប្រាក់
© រក្សាសិទ្ធិដោយ thmeythmey.com