ការទាញយកថាមពលខ្យល់បែបទំនើប នឹងសាកល្បងដំណើរការនៅតាមឆ្នេរស្កុតលែន

អន្តរជាតិ

ការទាញយកថាមពលខ្យល់បែបទំនើប នឹងសាកល្បងដំណើរការនៅតាមឆ្នេរស្កុតលែន

25, Jul 2017 , 9:02 am

រូបភាព

ដោយ: ថ្មីៗ

ប្រទេសស្កុតលែន ជាប្រទេសនៅទ្វីបអឺរ៉ុបដែលមានការរីកចម្រើនក្នុងការទាញយកថាមពលបៃតងពីធម្មជាតិ។ ស្កុតលែន បានផលិតតួប៊ីនជំនាន់ថ្មីម្យ៉ាងដែលអាចដាក់អោយដំណើរការក្នុងជំរៅទឹកជ្រៅ និងអាចទាញយកថាមពល រួមទាំងទ្រាំទ្រនឹងកំហូចបានល្អជាងតួប៊ីនជំនាន់មុនៗ។

Peterhead Wind Farm ឬ Hywind មានលទ្ធភាពក្នុងការទាញយកថាមពលពីខ្យល់ និងបំភ្លឺផ្ទះប្រជាជនបានប្រមាណ២ម៉ឺនខ្នង។ នេះបើយោងតាមការស្រាវជ្រាវរបស់អ្នកជំនាញ។ ក្រុមហ៊ុនដែលផលិតតួប៊ីនខ្យល់អគ្គីសនីនេះមានឈ្មោះថា Statoil ហើយពួកគេរំពឹងថាបច្ចេកវិទ្យាថ្មីនេះនឹងមានលទ្ធភាពក្នុងការទាញយកអគ្គីសនីបានច្រើនជាងប្រភេទតួបីនជំនាន់មុនៗ។

គោលការណ៍ចំបងក្នុងការអភិឌ្ឍ និងវិនិយោគទៅលើកិច្ចការនេះគឺដើម្បីកាត់បន្ថយតម្លៃ និងការចំណាយលើថាមពលអគ្គីសនីរបស់អ្នកប្រើប្រាស់ទូទៅ និងជួយបញ្ឈប់ការប្រើប្រាស់ឥន្ធនដែលបញ្ចេញឧស្ម័នផ្ទះកញ្ចក់ទៅលើបរិយាកាសដូចជាប្រេងកាត ឧស្ម័នធម្មជាតិឬធ្យូងថ្ម។

ក្នុងថ្ងៃអនាគត តួប៊ីនអគ្គីសនីធំៗ ទាំងនេះអាចនឹងដាក់អោយដំណើរការតាមបណ្តោយឆ្នេរជ្រៅៗខាងលិចប្រទេសអាមេរិក និងប្រទេសជប៉ុន។ ការបំពាក់តួប៊ីនដែលមានកំពស់១៧៥មែត្រ និងទំងន់១១៥០០តោនទៅលើឆ្នេរសមុទ្រនេះបានធ្វើឡើងក្រោមជំនួយរបស់ក្រុមហ៊ុនវិនិយោគមួយឈ្មោះថា Masdar របស់ទីក្រុង Abu Dhabi និងប្រទេសអង់គ្លេស។
បើយោងតាមសារពត៌មានBBC ក្រុមហ៊ុន Statoil នឹងដំឡើងតួប៊ីនប្រភេទចុងក្រោយអោយបាន៥គ្រឿងក្នុងរយៈពេលដ៏ខ្លីខាងមុខនេះ៕

(ដោយ៖ គី ចំណារ)