ជាតិ
រយៈពេល៦ខែ សមត្ថកិច្ច បង្ក្រាបអំពើជួញដូរមនុស្សនិងផ្លូវភេទ ជាង៦0ករណី របាយការណ៍ពីការជួញដូរមនុស្សនិងអាជីវកម្មផ្លូវភេទ ត្រូវអគ្គស្នងការនគរបាលជាតិ ផ្សព្វផ្សាយក្នុងកិច្ចប្រជុំស្តីពី «ការបូកសរុបសភាពការណ៍ ការងាររក្សាសន្តិសុខ សណ្តាប់ធ្នាប់សង្គម ប្រចាំឆមាសទី១ និងទិសដៅការងារ ឆមាសទី២ ឆ្នាំ២០១៧»។
× ភ្នំពេញ៖ ចាប់តាំងពីខែមករា ដល់ខែមិថុនា ឆ្នាំ២0១៧នេះ សមត្ថកិច្ច បានបង្ក្រាបអំពើជួញដូរមនុស្សចំនួន១៥ករណី និងអាជីវកម្មផ្លូវភេទ ចំនួន៤៨ករណី។ នេះបើតាមរបាយការណ៍របស់អគ្គស្នងការនគរបាលជាតិ។ នៅព្រឹកថ្ងៃចន្ទនេះ អគ្គស្នងការនគរបាលជាតិ បានបើកកិច្ចប្រជុំ ដើម្បី «បូកសរុបសភាពការណ៍ ការងាររក្សាសន្តិសុខ សណ្តាប់ធ្នាប់សង្គម ប្រចាំឆមាសទី១ និងទិសដៅការងារ ឆមាសទី២ ឆ្នាំ២0១៧»។
របាយការណ៍របស់អគ្គស្នងការនគរបាលជាតិ បានឲ្យដឹងថា ក្នុងប្រតិបត្តិការនៃការបង្ក្រាបអំពើជួញដូរមនុស្សទាំង១៥ករណី សមត្ថកិច្ច បានចាប់ជនល្មើសចំនួន២២នាក់ (ជនបរទេស ៦នាក់) និងបានរំដោះជនរងគ្រោះចំនួន៤២នាក់។ ផ្អែកលើរបាយការណ៍ដដែល សមត្ថកិច្ច បានរំដោះជនរងគ្រោះចំនួន១0២នាក់ទៀត ដែលរងគ្រោះដោយសារអាជីវកម្មផ្លូវភេទទាំង៤៨ករណី ដោយចាប់បានជនល្មើសចំនួន៥0នាក់ (ជនបរទេស ១នាក់)។
ប្រភេទបទល្មើសថ្មីចំនួន២ទៀត ទាក់ទងនឹងការជួញដូរមនុស្សនិងអាជីវកម្មផ្លូវភេទ ដែលទើបនឹងកើតមាន ក្នុងប្រទេសប្រទេសកម្ពុជា ក៏ត្រូវបានសមត្ថកិច្ច បង្ក្រាបដែរ។ បទល្មើសទាំង២នោះគឺ ការជួលស្ត្រីឲ្យពរពោះជំនួស ក្នុងតម្លៃពី ១0ម៉ឺនដុល្លារ ទៅ១២ម៉ឺនដុល្លារ និងការជួញដូរសរីរាង្គ។
នៅក្នុងរបាយការណ៍ ដែលផ្សព្វផ្សាយនៅថ្ងៃនេះ អគ្គស្នងការនគរបាលជាតិ បានលើកឡើងដូច្នេះថា៖«ការជួញដូរមនុស្សនិងអាជីវកម្មផ្លូវភេទ គឺជាប្រភេទបទល្មើស ដែលនៅតែបន្តកើតមាន និងមានភាពស្មុគស្មាញ ដោយពិបាកក្នុងការទប់ស្កាត់»៕
Tag:
ជួញដូរមនុស្សនិងផ្លូវភេទ
© រក្សាសិទ្ធិដោយ thmeythmey.com