អន្តរជាតិ
ប្រធានាធិបតីតួកគី៖ បស្ចិមប្រទេសឈប់សង្ឃឹមដាក់សម្ពាធលើតួកគីបានទៀតទៅ ប្រធានាធិបតីតួកគី រៃស៊ីប តៃយីប អ៊ែដូហ្កាន់ ថ្លែងទៅកាន់ការជួបជុំមួយក្នុងរដ្ឋធានីអង់ការ៉ា (រូបភាព Xinhua)
× រយៈពេលចុងក្រោយ ទំនាក់ទំនងរវាងតួកគី និងបស្ចិមប្រទេស ជាពិសេសអឺរ៉ុប មិនសូវល្អឡើយ និងរួមរឹតដោយបញ្ហាប្រទាំងប្រទើស។ ប្រធានាធិបតីតួកគី រៃស៊ីប តៃយីប អ៊ែរដូហ្កាន់ (Recep Tayyip Erdogan) នៅថ្ងៃទី២៥ ខែកក្កដា បាននិយាយថា តួកគីនឹងមិនធ្វើតាមការទាមទាររបស់បស្ចិមប្រទេសទៀតឡើយ។ លោក អ៊ែរដូហ្កាន់ និយាយបែបនេះ មុនពេលមន្ត្រីតួកគីជួបពិភាក្សាជាមួយមន្ត្រីអឺរ៉ុប ដែលបានរំឭកតួកគីពីរឿងការពារសិទ្ធិមនុស្ស និងគោលការណ៍ប្រជាធិបតេយ្យ។
ចាប់ពីពេលនេះទៅ លោកខាងលិចឈប់រំពឹងតួកគីថាធ្វើតាមបញ្ជារបស់ខ្លួនទៀតទៅ។ នេះជាការប្រកាសរបស់ប្រធានាធិបតីតួកគី រៃស៊ីប តៃយីប អ៊ែរដូហ្កាន់ ដោយប្រើប្រាស់ឈ្មោះលោកខាងលិច តែចង់សំដៅសហភាពអឺរ៉ុប។ តួកគី និងអឺរ៉ុប កំពុងមើលមុខគ្នាមិនត្រូវ បន្ទាប់រដ្ឋសមាជិកអឺរ៉ុបខ្លះ ជាពិសេសអាល្លឺម៉ង់ ហាមរដ្ឋមន្ត្រីតួកគីជួបជុំជាមួយអ្នកគាំទ្រ ហើយតួកគីក៏រឹតត្បិតមន្ត្រីអាល្លឺម៉ង់ចូលសួរទុក្ខងទ័ពនៅមូលដ្ឋាន Incirlik ។
ក្នុងជំនួបជាមួយសមាជិកសភារបស់បក្សលោកនៅថ្ងៃទី២៥ ខែកក្កដា លោក អ៊ែរដូហ្កាន់ និយាយថា លោកខាងលិចចង់ឲ្យតួកគីធ្វើតាមការទាមទាររបស់ពួកគេ ដោយមិនចាំបាច់សួរនាំអ្វីទាំងអស់ ប៉ុន្តែតួកគីបែបនោះ មិនមានទៀតទេ។ នេះជាការលើកឡើងរបស់លោក អ៊ែរដូហ្កាន់ ដែលផ្សាយដោយទីភ្នាក់ងារព័ត៌មាន AP ។ លោក អ៊ែរដូហ្កាន់ ក៏ឆ្លៀតពេលនោះរិះគន់អ្នកដែលថ្កោលទោសការចាប់ខ្លួនអ្នកការពារសិទ្ធិមនុស្សពីសំណាក់អាជ្ញាធរតួកគីផងដែរ។
ជាមួយការព្រមានអឺរ៉ុបជុំវិញការលូកលាន់កិច្ចការផ្ទៃក្នុងតួកគី លោក អ៊ែរដូហ្កាន់ បានហៅសកម្មជនសិទ្ធិមនុស្សជាភ្នាក់ងារពិសេសដែលបញ្ជូនចូលតួកគីដើម្បីអុកឡុក។ ដោយសំដៅដល់អឺរ៉ុប លោកសង្កត់ធ្ងន់ថា៖ «អ្នករារាំងប្រធានាធិបតីតួកគី និងរដ្ឋមន្ត្រីតួកគីពីការថ្លែងសុន្ទរកថាក្នុងប្រទេសអ្នក។ ប៉ុន្តែភ្នាក់ងារចារកម្មរបស់អ្នក ចូលក្នុងទឹកដីតួកគី ហើយបំបែកបំបាក់តួកគី»។ លោក ក៏ប្រកាសសងសឹកនឹងសកម្មភាពទាំងឡាយដែលបំពានអធិបតេយ្យតួកគីទៀតផង។
សូមបញ្ជាក់ថា អាល្លឺម៉ង់ ជាប្រទេសអឺរ៉ុបដែលចេញប្រឆាំងតួកគីជាងគេក្នុងចំណោមសមាជិកផ្សេងទៀត។ ទំនាក់ទំនងទ្វេភាគីរវាងសមាជិកបក្សសម្ព័ន្ធយោធាណាតូទាំងពីរកាន់តែអាក្រក់ឡើង ចាប់តាំងពីខែមីនា បន្ទាប់ពីរដ្ឋជាច្រើននៅអាល្លឺម៉ង់ហាមប្រាមការរៀបចំការជួបជុំគាំទ្រការកែប្រែរដ្ឋធម្មនុញ្ញនៅតួកគីដែលផ្ដល់អំណាចច្រើនឲ្យលោក អ៊ែរដូហ្កាន់ ។ ជាការឆ្លើយតប តួកគីក៏ហាមសមាជិកអាល្លឺម៉ង់ចូលសួរសុខទុក្ខទាហានអាល្លឺម៉ង់នៅតួកគីវិញ។
សង្គ្រាមពាក្យសម្ដីរវាងតួកគី និងអាល្លឺម៉ង់ ក៏ចេះតែកើតឡើងជាបន្តបន្ទាប់។ កាលពីកិច្ចប្រជុំ G-20 នៅទីក្រុង Hamburg អាល្លឺម៉ង់ក៏បដិសេធរៀបចំការជួបជុំរបស់លោក អ៊ែរដូហ្កាន់ ជាមួយអ្នកគាំទ្រម្ដងទៀត ដែលធ្វើឲ្យតួកគីអន់ចិត្តយ៉ាងខ្លាំង។ ដោយខឹងអាល្លឺម៉ង់ផង មិនសប្បាយចិត្តពាក្យរិះគន់របស់អឺរ៉ុបផង តួកគីក៏ប្រកាន់ជំហរលែងចង់ក្លាយជាសមាជិកសហភាពអឺរ៉ុបទៅទៀត ដោយអះអាងថា អាចរស់បានដោយខ្លួនឯង៕
Tag:
តួកគី
រៃស៊ីប តៃយីប អ៊ែរដូហ្កាន់
អឺរ៉ុប
© រក្សាសិទ្ធិដោយ thmeythmey.com