ទឹកទន្លេមេគង្គក្រចេះ និងស្ទឹងត្រែង នឹងឡើងដល់កម្រិតប្រកាសប្រុងប្រយ័ត្ន

ជាតិ

ទឹកទន្លេមេគង្គក្រចេះ និងស្ទឹងត្រែង នឹងឡើងដល់កម្រិតប្រកាសប្រុងប្រយ័ត្ន

26, Jul 2017 , 2:43 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ កម្ពស់ទឹកទន្លេមេគង្គ ក្រចេះ និងស្ទឹងត្រែង នឹងឡើងដល់កម្រិតប្រកាសឲ្យពលរដ្ឋប្រុងប្រយ័ត្ន ចាប់ពីថ្ងៃទី ២៨ កក្កដា តទៅ ។ ស្ថានភាពទឹកជំនន់ទន្លេមេគង្គ នៅខេត្តក្រចេះ អាចនឹងឡើងដល់កម្រិតកម្ពស់ ២២,០០ ម៉ែត្រ និងទឹកទន្លេមេគង្គស្ទឹងត្រែង អាចនឹងមានកម្ពស់ ១០,៧០ម៉ែត្រ ។

ក្រសួងធនធានទឹក និងឧតុនិយម បានចេញសេចក្ដីជូនដំណឹង ស្ដីពីស្ថានភាពទឹកជំនន់ទន្លេមេគង្គ នៅថ្ងៃទី ២៦ កក្កដានេះថា កម្ពស់ទឹកឡើងខ្ពស់នេះ នឹងហូរចូលទៅតាមព្រែក និងតំបន់ទំនាបនានា នៅផ្នែកខាងក្រោមកាន់តែច្រើន ដែលអាចឲ្យតំបន់មួយចំនួនទទួលរងការជន់លិចផងដែរ ។

បន្ថែមពីលើនេះក្រសួងធនធានទឹក បានឲ្យដឹងថា នៅថ្ងៃទី២៦ កក្កដានេះ ទឹកអាងតាម៉ុក ស្ថិតក្នុងឃុំអន្លង់វែង ស្រុកអន្លង់វែង ខេត្តបន្ទាយមានជ័យ បានហក់ឡើងលើសកម្រិតប្រកាសឲ្យប្រុងប្រយ័ត្នហើយ។ បើតាមក្រសួង ទឹកក្នុងអាងតាម៉ុកនេះ មានកំពស់ ៣,៤០ ម៉ែត្រ ដែលកំពុងជន់ហូរកាត់ពីលើស្ពាន ។

ក្រសួងធនធានទឹក និងឧតុនិយម ក៏បានអំពាវនាវដល់អាជ្ញាធរដែនដី ប្រជាពលរដ្ឋរស់នៅតាមដងទន្លេមេគង្គ ទន្លេសាប ទន្លេបាសាក់ ត្រូវបង្កើនការប្រុងប្រយ័ត្នខ្ពស់បំផុត។ ជាពិសេស អ្នកធ្វើដំណើរតាមជលយានគ្រប់ប្រភេទ ត្រូវយកចិត្តទុកដាក់បញ្ហានេះ ដើម្បីចៀសវាងគ្រោះថ្នាក់ផ្សេងៗ៕