តុលាការ ពន្យារពេលប្រកាសទោស លោក គឹម សុខ

ជាតិ

តុលាការ ពន្យារពេលប្រកាសទោស លោក គឹម សុខ

26, Jul 2017 , 5:10 pm

រូបភាព

ដោយ: ថ្មីៗ

ភ្នំពេញ៖ លោក គឹម សុខ អ្នកវិភាគនយោបាយ ត្រូវបានសមត្ថកិច្ច ដឹកទៅកាន់សាលាដំបូងរាជធានីភ្នំពេញ ដើម្បីចូលរួមសវនាការ នៅរសៀលថ្ងៃទី២៦ ខែកក្កដា ឆ្នាំ២0១៧នេះ។ ប៉ុន្តែ ក្រោយបញ្ចប់សវនាការ ចៅក្រមជំនុំជម្រះ ពុំបានប្រកាសសាលក្រមភ្លាមៗនោះទេ ដោយលើកពេលទៅប្រកាសនៅថ្ងៃទី១0 ខែសីហា ឆ្នាំ២0១៧ ឯណោះវិញ។

លោក គឹម សុខ បានរងបទចោទ «បរិហារកេរ្តិ៍ជាសាធារណៈ» និងបទ «ញុះញង់ ឲ្យមានភាពវឹកវរដល់សន្តិសុខសង្គម» ដែលប្តឹងដោយសម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា។ លោក គឹម សុខ បានជាប់ឃុំ តាំងពីអំឡុងខែកុម្ភៈ ឆ្នាំ២0១៧មកម្ល៉េះ ក្រោយសម្តេច ហ៊ុន សែន ពឹងមេធាវី ឲ្យដាក់ពាក្យប្តឹង។

បើតាមលោក គី តិច ដែលជាមេធាវីរបស់សម្តេច ហ៊ុន សែន ការប្តឹងនេះ គឺដោយសារតែលោក គឹម សុខ បានចោទថាគណបក្សប្រជាជនកម្ពុជា នៅពីក្រោយខ្នងនៃអំពើឃាតកម្មលើលោក កែម ឡី ដែលជាអ្នកវិភាគនយោបាយ និងជាអ្នកស្រាវជ្រាវខាងការអភិវឌ្ឍសង្គមដ៏ល្បីល្បាញ។ នៅក្នុងពាក្យបណ្តឹងនេះ សម្តេច ហ៊ុន សែន បានទារសំណងជំងឺចិត្តចំនួន៥០ម៉ឺនដុល្លារ ពីលោក គឹម សុខ។

លោក គឹម សុខ នៅរងពាក្យបណ្តឹងមួយទៀត ពីសម្តេច ហ៊ុន សែន។ បណ្តឹងលើកទីពីរនេះ គឺពាក់ព័ន្ធនឹងការលើកឡើងរបស់ គឹម សុខ ដែលចោទថា ប្រព័ន្ធមួយ ស្ថិតនៅក្រោមការគ្រប់គ្រងរបស់រដ្ឋាភិបាលបច្ចុប្បន្ន មានការសម្លាប់មនុស្ស ហើយរកឃាតកមិនឃើញ។ សម្រាប់បណ្តឹងនេះ សម្តេច ហ៊ុន សែន ទារសំណងជំងឺចិត្តពីលោក គឹម សុខ ២៥០០ដុល្លារអាមេរិក។ ប៉ុន្តែ រហូតមកដល់ពេលនេះ តុលាការ មិនទាន់ចាត់វិធានការលើបណ្តឹងជាលើកទីពីររបស់សម្តេច ហ៊ុន សែន នៅឡើយទេ៕