ជាតិ
សង្គមជាតិ
ទឺកជំនន់ទន្លេមេគង្គ បន្តហក់ឡើងដល់កម្ពស់ជាង ១០ម៉ែត្រ នៅស្រុកថាឡាបរិវ៉ា់ត់
× នៅល្ងាចថ្ងៃទី ២៧ កក្កដា ទឹកជំនន់ទន្លេមេគង្គ បានបន្តហក់ឡើងដល់កម្ពស់ ១០, ៤៨ ម៉ែត្រ។ ស្ថានភាពបែបនេះ ធ្វើឲ្យលិចលង់ចូលលំនៅដ្ឋាន ប្រជាពលរដ្ឋរស់នៅក្នុងអន្លង់ឈើទាល ឃុំព្រះរំកិល ស្រុកថាឡាបរិវ៉ា់ត់ (ជាប់ព្រំប្រទល់ឡាវ) ដោយសារទឹកជំនន់ទន្លេមេគង្គ។
បើតាមទំព័រហ្វេសប៊ុកផ្លូវការរបស់ក្រសួងធនធាន និងឧតុនិយម ទឹកជំនន់ទន្លេមេគង្គ បានលិចលង់ចូលលំនៅដ្ឋានប្រជាពលរដ្ឋនៅស្រុកថាឡាបរិវ៉ាត់ ខេត្តស្ទឹងត្រែង នាល្ងាចថ្ងៃទី ២៧ កក្កដា។ ហើយកាលពីពេលថ្មីៗនេះ រដ្ឋបាលខេត្តស្ទឹងត្រែង បានប្រាប់ប្រជាពលរដ្ឋនៅទូទាំងខេត្តទាំងអស់ ឲ្យប្រុងប្រយ័ត្ននឹងជំនន់ទន្លេមេគង្គផងដែរ។
ជាមួយគ្នានេះ ក្រសួងធនធានទឹក និងឧតុនិយម បានជូនដំណឹងថា ចាប់ពីថ្ងៃទី ២៨ កក្កដា តទៅ កម្ពស់ទឹកទន្លេមេគង្គស្ទឹងត្រែង នឹងឡើងដល់កម្រិតប្រកាសឲ្យពលរដ្ឋប្រុងប្រយ័ត្ន គឺកម្ពស់ ១០,៧០ម៉ែត្រ។ ក្រសួងធនធានទឹក និងឧតុនិយម ក៏បានអំពាវនាវដល់អាជ្ញាធរដែនដី ប្រជាពលរដ្ឋរស់នៅតាមដងទន្លេមេគង្គ ត្រូវបង្កើនការប្រុងប្រយ័ត្នខ្ពស់បំផុត។ ជាពិសេស អ្នកធ្វើដំណើរតាមជលយានគ្រប់ប្រភេទ ត្រូវយកចិត្តទុកដាក់បញ្ហានេះ ដើម្បីចៀសវាងគ្រោះថ្នាក់ផ្សេងៗ។
សូមបញ្ជាក់ថា បច្ចុប្បន្នកម្ពុជា កំពុងទទួលរងនូវឥទ្ធិពលព្យុះទី៨ សុនកា ដែលស្ថិតនៅក្បែរកោះហៃណាំដោយមានកម្លាំងខ្យល់៦៤គីឡូម៉ែតក្នុងមួយម៉ោង។ ព្យុះនេះ បំបែកខ្លួនជាពីរផ្នែក ១ផ្នែកនឹងរំកិលខ្លួនទៅដល់ឆ្នេរវៀតណាមទៅដល់តំបន់អាងទន្លេមេគង្គ និងផ្នែកទី២ធ្វើដំណើរត្រឡប់ទៅទិសឦសានវិញ។ ឥទ្ធិពលរបស់ខ្យល់ព្យុះសុនកានេះនឹងធ្វើឲ្យមានភ្លៀងធ្លាក់ច្រើននៅតំបន់ផ្ទៃរងទឹកភ្លៀងរបស់ទន្លេមេគង្គក្នុង្រទេសថៃ និងឡាវ ការធ្លាក់ភ្លៀងនេះនឹងបង្កឲ្យទឹកទន្លេ ហក់ឡើងជាថ្មីម្ដងទៀត៕
Tag:
ទឹកជំនន់ទន្លេមេគង្គ
ស្ទឹងត្រែង
© រក្សាសិទ្ធិដោយ thmeythmey.com