កីឡាអន្តរជាតិ
អន្តរជាតិ
Mourinho៖ Pogba មានកម្រិតលេងដូច Messi, Neymar និង Ronaldo ដែរ
× លោក Jose Mourinho បានសរសើរ Paul Pogba ថាមានកម្រិតលេងដូចគ្នានឹងកីឡាករ Lionel Messi, Cristiano Ronaldo និង Neymar ដែរនៅពេលបច្ចុប្បន្ននេះ។ លោកលើកឡើងដូចច្នេះបន្ទាប់ពីខ្សែបម្រើបារាំងរូបនេះបង្ហាញខ្លួនយ៉ាងល្អនាជំនួបរវាង Manchester United និង Barcelona នៃការប្រកួតពាន International Champions Cup នៅថ្ងៃទី២៧ ខែកក្កដា លើទឹកដីអាមេរិក។
អ្នកចាត់ការទូទៅសញ្ជាតិព័រទុយហ្គាល់ បានដឹកនាំក្រុម Manchester United បរាជ័យលើកដំបូងនៃពាន ICC ក្រោយ Neymar ស៊ុត១គ្រាប់ជួយ Barcelona ឈ្នះ ១-០ ក្នុងការប្រកួតកំដៅសាច់ដុំមុនបើករដូវកាលថ្មី។ ទោះចាញ់ការប្រកួតនេះមែន ប៉ុន្តែ Pogba បានបង្ហាញទម្រង់លេងដ៏គួឲ្យចាប់អារម្មណ៍សម្រាប់ក្រុមយក្សនៃក្របខ័ណ្ឌ Premier League មួយនេះ ដោយទទួលបានការសរសើរពីគ្រូបង្វឹកលោក Mourinho ថាមានកម្រិតលេងដូច Mnessi Ronaldo និង Neymar អ៊ីចឹងដែរ។
អ្នកចាត់ការដែលមានរហស្សនាម The Special One បានលើកឡើងពីចំនុចពិសេសរបស់ខ្សែបម្រើវ័យ២៤ឆ្នាំនេះថា៖«Pogba ជាកីឡាករមានភាពស្វាហាប់នៅលើទីលាន ជាមួយនឹងជំនឿចិត្តខ្ពស់ក្នុងការគ្រប់គ្រងបាល់ និងបញ្ជូនបាល់ទៅឲ្យមិត្តរួមក្រុមច្បាស់ ទោះមិនសូវរកគ្រាប់បាល់បានច្រើនក៏ដោយ»។
សូមបញ្ជាក់ថា Pogba ត្រូវបានលោក Mourinho នាំយកមកកាន់ទឹកដី Old Trafford ពី Juventus ក្នុងតម្លៃកំណត់ត្រាកាលពីរដូវកាល ២០១៦-២០១៧ និងជួយក្រុមម្ចាស់ជើងឯក Premier League ២០សម័យកាល ឈ្នះពាន EFL Cup និងពានលំដាប់ទី២អឺរ៉ុប EUFA Europa League ថែមទៀតផងក្នុងរដូវកាលដំបូងរបស់គេ៕
Tag:
បាល់ទាត់
Jose Mourinho
Paul Pogba
Manchester United
© រក្សាសិទ្ធិដោយ thmeythmey.com