អន្តរជាតិ
នាយករដ្ឋមន្ត្រីម៉ាឡេស៊ី ចង់ឲ្យភាសាម៉ាឡេក្លាយជាភាសាផ្លូវការរបស់អាស៊ាន នាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ ក្នុងកិច្ចប្រជុំអាស៊ានកន្លងមក (រូបភាព Reuters)
× នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ (Najib Razak) បានបង្ហាញបំណងចង់ឲ្យភាសាបាហាសាម៉េឡាយូ (Bahasa Melayu) ក្លាយជាភាសាផ្លូវការរបស់អាស៊ានជំនួសភាសាអង់គ្លេសនៅត្រឹមឆ្នាំ២០៥០ ។ ភាសាបាហាសាម៉េឡាយូ ឬម៉ាឡេ ជាអម្បូរភាសាមួយដែលត្រូវបានប្រើប្រាស់យ៉ាងទូលំទូលាយនៅម៉ាឡេស៊ី ឥណ្ឌូណេស៊ី ព្រុយណេ និងសិង្ហបុរី និងផ្នែកខ្លះនៅភាគខាងត្បូងថៃផងដែរ។
«ខណៈយើងស្ថិតនៅលើផ្លូវឆ្ពោះទៅកាន់ឆ្នាំ២០៥០ ខ្ញុំចង់ឃើញភាសាម៉ាឡេ ឬបាហាសាម៉េឡាយូ ក្លាយជាភាសាផ្លូវការ និងចម្បងនៅអាស៊ាន ក៏ដូចជាត្រូវបានប្រើប្រាស់ទូលំទូលាយលើឆាកអន្តរជាតិ។» នេះគឺជាសម្ដីរបស់នាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ នៅថ្ងៃទី២៥ ខែកក្កដា ដែលផ្សាយដោយសារព័ត៌មានម៉ាឡេស៊ី The Star ។ លោក ណាជីប អះអាងថា ភាសាម៉ាឡេត្រូវបានប្រើប្រាស់ដើម្បីបង្រួបបង្រួម និងធានាពីសន្តិភាព និងសុខដុមរមនីយកម្មនៅក្នុងប្រទេសពហុសាសន៍។
បច្ចុប្បន្ននេះ ភាសាទាក់ទងផ្លូវការរវាងសមាជិកអាស៊ានទាំង១០ គឺភាសាអង់គ្លេស ដូចមានចែងក្នុងធម្មនុញ្ញរបស់អាស៊ាន។ ទន្ទឹមគ្នានោះ គេឃើញមានភាសាយ៉ាងតិច១០ទៀតដែលត្រូវបានប្រើប្រាស់នៅរដ្ឋសមាជិកដូចជា ភាសាភូមា, ភាសាថៃ, ភាសាខ្មែរ, ភាសាឡាវ, ភាសាវៀតណាម, ភាសាតាកាឡុក, ភាសាតាមិល, ភាសាចិន និងភាសាម៉ាឡេ។ នេះមិនទាន់គិតដល់ភាសាតូចដែលប្រើប្រាស់ដោយជនជាតិភាគតិចផង។
អ្វីគួរឲ្យកត់សម្គាល់នោះ ភាសាម៉ាឡេនេះ ក៏មិនមែនជាភាសាផ្លូវរបស់ម៉ាឡេស៊ី ទោះជាភាសានេះមានអ្នកប្រើប្រាស់ច្រើនក៏ដោយ។ រដ្ឋាភិបាលម៉ាឡេស៊ីសម្រេចជ្រើសរើសភាសាអង់គ្លេសជាភាសាផ្លូវការ និងប្រើប្រាស់ក្នុងការទំនាក់ទំនងផ្សេងៗ។ ប៉ុន្តែក្រុងគូឡាឡាំពួបានដាក់កំហិតឲ្យនិស្សិតបរទេសទាំងរៀនភាសាបាហាសាម៉េឡាយូនេះ ពេលពួកគេកំពុងស្នាក់នៅរៀនសូត្រលើទឹកដីម៉ាឡេស៊ី។ ចំណែកឯភាសាចិន និងភាសាតាមិល ក៏ត្រូវបានប្រើប្រាស់ដោយសហគមន៍ជនភាគតិចចិន និងឥណ្ឌាដែរ។
ទោះជាភាសាម៉ាឡេមានអ្នកប្រើប្រាស់ដល់ទៅជាង២៩០លាននាក់មែន ប៉ុន្តែភាសានេះក៏មានលក្ខណៈខុសគ្នាទៅតាមប្រទេសនីមួយៗទៅទៀត។ ជាក់ស្ដែងភាសាបាហាសាឥណ្ឌូណេស៊ី និងបាហាសាម៉ាឡេស៊ី ដែលសុទ្ធតែមានប្រភពមកពីភាសាម៉ាឡេនេះ មិនមានការប្រើប្រាស់ដូចគ្នាឡើយ។ ភាពខុសគ្នាមានភាគច្រើនលើការបញ្ចេញសំឡេង ការប្រើប្រាស់ពាក្យ និងកម្ចីពាក្យគ្នាទៅវិញទៅមកជាដើម។
គេមិនទាន់ដឹងថា បំណងរបស់នាយករដ្ឋមន្ត្រីម៉ាឡេស៊ីរូបនេះ នឹងត្រូវយកទៅពិភាក្សាជាមួយមេដឹកនាំអាស៊ានទាំង៩ផ្សេងទៀត ឬយ៉ាងណាឡើយ។ ប៉ុន្តែការផ្លាស់ប្ដូរភាសាផ្លូវការដែលត្រូវបានកំណត់រួចស្រេចក្នុងច្បាប់កំពូលរបស់អាស៊ាន មិនមែនជារឿងងាយស្រួលឡើយ។ គេត្រូវប្រើប្រាស់ពេលវេលាច្រើនដើម្បីសិក្សាពីផលប៉ះពាល់ និងអត្ថប្រយោជន៍សិន ដ្បិតភាសាអង់គ្លេសត្រូវបានប្រើប្រាស់អស់ពេលជាយូរមកហើយ៕
Tag:
ម៉ាឡេស៊ី
អាស៊ាន
ណាជីប រ៉ាហ្សាក់
© រក្សាសិទ្ធិដោយ thmeythmey.com