បទវិភាគ
យុវជនគួរចៀសវាង ធ្វើការងារស្ម័គ្រចិត្ត តាមៗគ្នា ដើម្បីតែសប្បាយ ភ្លេចរៀនសូត្រ និងភ្លេចគោលដៅ
× បច្ចុប្បន្នយុវជនបានចាប់អារម្មរណ៍ និងចូលរួមយ៉ាងសកម្ម ទៅលើការងារស្ម័គ្រចិត្តដើម្បីអភិវឌ្ឍសមត្ថភាពផ្ទាល់ខ្លួន និងជួយសង្គម។ ពួកគេបានលះបង់ទាំងកម្លាំងកាយ កម្លាំងចិត្ត និងថវិកាផ្ទាល់ខ្លួន ព្រោះតែស្រលាញ់សង្គម និងយល់ពីតម្លៃនៃការចូលរួមជួយសង្គម។ ប៉ុន្តែការចូលរួមជ្រុលពេក ភ្លេចការសិក្សា និងមិនអភិវឌ្ឍនសមត្ថភាពខ្លួនឯងឲ្យប្រសើរ ដែលធ្វើឲ្យការចូលរួមជួយសង្គមរបស់ពួកគេនៅមានកម្រិត និងមិនអាចជួយសង្គមបានយូរអង្វែង។ តើការធ្វើការងារស្ម័គ្រចិត្តបែបណា ទើបយុវជនមានអនាគតល្អ និងជួយសង្គមបានវែងឆ្ងាយ?
នាពេលបច្ចុប្បនេះ យុវជនខ្មែរ ដែលធ្វើការងារស្ម័គ្រចិត្តបានកើនឡើង គួរឲ្យកត់សម្គាល់។ អ្នកធ្វើការងារស្ម័គ្រចិត្តក្រោមហេតុផលជួយសង្គមទាំងនោះ មានបែបផែនផ្សេងៗគ្នា។ តែយ៉ាងណា គេអាចបែងចែកអ្នកស្ម័គ្រចិត្តទាំងនោះជាបីប្រភេទសំខាន់ៗដូចតទៅ៖
អ្នកស្ម័គ្រចិត្តប្រភេទទី១ គឺអ្នកស្ម័គ្រចិត្តតាមគ្នា និងដើម្បីតែសប្បាយ។ អ្នកស្ម័គ្រចិត្តប្រភេទនេះ ពេលចូលរួមធ្វើសកម្មភាពការងារសង្គមផ្សេងៗ ពួកគេមិនបានកំណត់ពីការរំពឹងទុក នូវអ្វីដែលខ្លួនបានរៀនសូត្រ និងឈ្វេងយល់ពីរបៀបធ្វើការងារអ្វីនោះទេ សំខាន់ឲ្យតែខ្លួនមានពេលទំនេរ ហើយមិត្តភក្តិខ្លួនហៅចូលរួម និងគិតថា សប្បាយទើបពួកគេចូលរួម។ ចំណែកការទទួលខុសត្រូវការងារវិញ ក៏មិនសូវធ្វើបានល្អនោះដែរ ព្រោះពួកគេ យល់ថាការងារដែលខ្លួនកំពុងធ្វើជាការងារស្ម័គ្រចិត្ត គ្មាននណាត្រួតពីលើទេ។ ការចូលរួមធ្វើការងារស្ម័គ្រចិត្តបែបនេះ ធ្វើឲ្យពួកគេខាតពេលវេលា គ្មានគោលដៅពិតប្រាកដ និងក្រោយពីបញ្ចប់ការងារទៅ មិនសូវបានរៀនសូត្រច្រើនពីការងារសង្គមដែលខ្លួនបានចូលរួមនោះទេ។
អ្នកស្ម័គ្រចិត្តប្រភេទទី២ គឺអ្នកស្ម័គ្រចិត្តភ្លេចការសិក្សា និងគោលដៅរបស់ខ្លួន។ អ្នកស្ម័គ្រចិត្តប្រភេទនេះ តែងព្យាយាមចូលរួមការងារស្ម័គ្រចិត្តជានិច្ច ស្របតាមចំណង់ចំណូលចិត្ត និងវិស័យដែលខ្លួនស្រលាញ់។ បើនិយាយពីធ្វើការងារវិញនោះ ពួកគេបានចូលរួមយ៉ាងសកម្ម ដោយមិនត្រឹមតែធ្វើការងារខ្លួនឯងបានល្អប៉ុណ្ណោះទេ ថែមទាំងជួយការងារអ្នកដទៃទៀតផង។ ការចូលរួមបែបនេះ បានធ្វើឲ្យរូបគេបានរៀនសូត្រយ៉ាងច្រើនពីការងារ និងធ្វើឲ្យអ្នកធ្វើការជាមួយគ្នាស្រលាញ់ និងចូលចិត្ត។ ប៉ុន្តែបញ្ហាត្រង់ថា ដើម្បីធ្វើការងារបានល្អ ពីព្រោះតែទឹកចិត្តស្រលាញ់សង្គម បានជំរុញឲ្យពួកគេធ្វើការងារសង្គម ដោយមិនសូវខ្វល់ពីសុខភាព ភ្លេចការសិក្សា និងគោលដៅជីវិតដែលខ្លួនបានកំណត់ ព្រោះស្ម័គ្រចិត្តជ្រុល និងជាប់ចិត្តនឹងការងារសង្គម។ ការស្ម័គ្រចិត្តដោយមិនសូវខ្វល់ពីការអភិវឌ្ឍសមត្ថភាពខ្លួនឯងបន្ថែមបែបនេះ បានធ្វើឲ្យការចូលរួមជួយសង្គមរបស់ពួកគេនៅមានកម្រិត និងមិនបានជួយសង្គមបានវែងឆ្ងាយទេ ព្រោះសមត្ថភាពអ្នកស្ម័គ្រចិត្តទាំងនោះនៅមានកម្រិត។
អ្នកស្ម័គ្រចិត្តស្របគោលដៅ និងបន្តអភិវឌ្ឍសមត្ថភាពខ្លួនឯង ដោយមិនបោះបង់។ នេះជាភេទអ្នកស្ម័គ្រចិត្តទី៣។ អ្នកស្ម័គ្រចិត្តប្រភេទនេះ ពួកគេបានកំណត់នូវការរំពឹងទុកច្បាស់ អំពីអ្វីដែលខ្លួន ចង់ចេះចង់ដឹង និងគួរបំពេញបន្ថែម ក្នុងការងារស្ម័គ្រចិត្តទៅលើវិស័យដែលខ្លួនពេញចិត្ត ស្របតាមជំនាញសិក្សា និងគោលដៅដែលបានកំណត់។ មួយវិញទៀតរូបគេបានបែងចែកពេលវេលាយ៉ាងល្អ រវាងការសិក្សា និងការងារសង្គម ដោយមិនឲ្យប៉ះពាល់ដល់ការសិក្សារៀនសូត្រ និងសុខភាពនោះទេ។ ហើយថ្វីដ្បិតតែនេះ ជាការងារស្ម័គ្រចិត្តក្តី ប៉ុន្តែពួកគេធ្វើការងារដូចជា អ្នកទទួលប្រាក់ខែច្រើនអ៊ីចឹង ព្រោះពួកគេយល់ពីតម្លៃ ការងារសង្គម ដែលធ្វើពួកគេទទួលបានសមត្ថភាព ទំនាក់ទំនង របៀបធ្វើការងារ ភាពជាអ្នកដឹកនាំ និងស្គាល់សង្គមច្បាស់ជាងមុន ដែលទាំងនេះ ជាជំហានក្នុងការសម្រេចគោលដៅទៅថ្ងៃអនាគត។ អ្នកចិត្តស្ម័គ្របែបនេះ ជាបុគ្គលដែលមានទស្សនៈវែងឆ្ងាយ និងជួយសង្គមបានច្រើន ព្រោះគេបានអភិវឌ្ឍសមត្ថភាពខ្លួនឯងជាបន្តបន្ទាប់ ដែលធ្វើឲ្យពួកគេទទួលបានឱកាសល្អជាច្រើន និងបានបន្តធ្វើសកម្មភាពជួយសង្គមបានធំ និងវែងឆ្ងាយ។
ជារួមការចូលរួមការងារស្ម័គ្រចិត្តសង្គម វាមិនខុសនោះទេ។ តិចឬច្រើន វាតែងតែមានផលប្រយោជន៍សម្រាប់អ្នកធ្វើ និងសង្គមជាដើមដោយវាអាស្រ័យលើកការគិត និងការធ្វើសកម្មភាពរបស់ផ្ទាល់ខ្លួនម្នាក់ៗ ។ អ្នកស្ម័គ្រចិត្តសម័យថ្មី ត្រូវតែជាអ្នកស្ម័គ្រចិត្តប្រភេទទី៣ ជាមនុស្សដែលមានទស្សនៈវិស័យវែងឆ្ងាយ និងជួយសង្គមបានច្រើន។ ផ្ទុយពីអ្នកស្ម័គ្រចិត្ត ប្រភេទទី១ និងទី២ ដែលធ្វើការងារស្ម័គ្រចិត្តព្រោះតែចង់សប្បាយ តាមគ្នា មិនខ្វល់ពីសុខភាព ភ្លេចការសិក្សា វង្វេងគោលដៅ ដែលមានលទ្ធភាពជួយសង្គមតិច ពីព្រោះសមត្ថភាពមានកម្រិត។ ដូច្នេះយុវជនដែលកំពុងតែស្ម័គ្រ និងគ្រោងធ្វើការងារស្ម័គ្រចិត្ត ត្រូវគិតឲ្យច្បាស់ថា ខ្លួនចង់ធ្វើជាអ្នកស្ម័គ្រចិត្តប្រភេទណា?
© រក្សាសិទ្ធិដោយ thmeythmey.com