អាជ្ញាកណ្តាលដែលធ្លាប់កាត់ក្តីនៅកម្ពុជា រងការរើសអើងជាតិសាសន៍ក្រោយជំនួប Chelsea-Inter Milan

កីឡាអន្តរជាតិ

អន្តរជាតិ

អាជ្ញាកណ្តាលដែលធ្លាប់កាត់ក្តីនៅកម្ពុជា រងការរើសអើងជាតិសាសន៍ក្រោយជំនួប Chelsea-Inter Milan

02, Aug 2017 , 4:06 pm

រូបភាព

លោកអាជ្ញាកណ្តាល Sukhbir Singh ពេលកាត់ក្តីនាជំនួប កម្ពុជា-ជប៉ុន វគ្គជម្រុះ AFC U23

ដោយ: ទេព ពិទូរ្យ

លោកអាជ្ញាកណ្តាល Sukhbir Singh ត្រូវបានរិះគន់ និងរើសអើងពូជសាសន៍តាមប្រព័ន្ធអ៊ីនធឺណិតក្រោយកាត់ក្តីការប្រកួតរវាង Chelsea និង Inter Milan ពាន ICC កំដៅសាច់ដុំមុនបើករដូវកាលថ្មីក្នុងប្រទេសសិង្ហបុរី កាលពីថ្ងៃ២៩ ខែកក្កដាកន្លងទៅ។ អាជ្ញាកណ្តាលជនជាតិសិង្ហបុរីរូបនេះ ក៏ធ្លាប់មកកាត់សេចក្តីការប្រកួតរវាងក្រុមបាល់ទាត់ជម្រើសជាតិកម្ពុជា និងជប៉ុន នៃវគ្គជម្រុះពាន AFC ក្រោមអាយុ២៣ឆ្នាំផងដែរ។

បើតាមការចុះផ្សាយរបស់ Sky Sports អង្គភាពប្រឆាំងការរើសអើងជាតិសាសន៍ Kick It Out ដែលមានមូលដ្ឋាននៅប្រទេសអង់គ្លេស កំពុងស៊ើបអង្កេតរកមុខអ្នកដែលរំលោភសិទ្ធិ និងរើសអើងជាតិសាសន៍ចំពោះអាជ្ញាកណ្តាលសិង្ហបុរីលោក Sukhbir Singh នៅលើអ៊ីនធឺណិត។

Singh ត្រូវបានរិះគន់ជុំវិញការកាត់សេចក្តីដោយផ្តល់បាល់ពិន័យ១១ម៉ែត្រទៅឲ្យខ្សែប្រយុទ្ធ Stefan Jovetic របស់ក្រុម Inter Milan ដែលរារាំងដោយខ្សែការពារ Cesar Azpilicueta របស់ Chelsea និងមួយគ្រាប់ទៀតដែលជាបាល់ offside របស់ Michy Batshuayi ក្នុងការប្រកួតដែល Inter Milan យកឈ្នះក្រុមលោក Antonio Conte ២-១។

អាជ្ញាកណ្តាលដែលមានសញ្ជាតិដើមឥណ្ឌា វ័យ៣៣ឆ្នាំរូបនេះ ក៏ធ្លាប់មកកម្ពុជាដើម្បីកាត់ក្តីក្នុងការប្រកួតវគ្គជម្រុះពូល J ដែលក្រុមកម្ពុជា ចាញ់ ជប៉ុន ២-០ នៃព្រឹត្តិការណ៍ AFC U23 Championship 2018 នៅពហុកីឡដ្ឋានជាតិអូឡាំពិក កាលពីថ្ងៃទី ២១ ខែកក្កដា កន្លងទៅផងដែរ៕