ជាតិ
សេដ្ឋកិច្ច
មជ្ឈមណ្ឌលផ្ដល់ព័ត៌មានអាជីវកម្ម លើកដំបូងនៅកម្ពុជា ត្រូវបានសម្ពោធ មជ្ឈមណ្ឌលសេវាអាជីវកម្ម
× ភ្នំពេញ៖ «មជ្ឈមណ្ឌលសេវាកម្មអាជីវកម្ម» ដែលត្រូវបានបង្កើតឡើងដំបូងគេនៅកម្ពុជា ត្រូវបានសម្ពោធឲ្យប្រើប្រាស់ នៅថ្ងៃទី៣ខែសីហានេះ ដើម្បីឆ្លើយតបនឹងតម្រូវការព័ត៌មាន និងសេវាកម្មផ្សេងទាក់ទងនឹងដំណើរការអាជីវកម្មនៅកម្ពុជា។
ការបង្កើតមជ្ឈមណ្ឌលនេះឡើង ត្រូវបានផ្ដួចផ្ដើមដោយសមាគមសហគ្រិនវ័យក្មេងកម្ពុជា (YEAC) រួមទាំងធនាគារអភិវឌ្ឍន៍អាស៊ី (ADB) និងរដ្ឋាភិបាលអូស្ត្រាលី ដែលជាអ្នកផ្ដល់មូលនិធិ និងជំនួយបច្ចេកទេស តាមរយៈគម្រោងអភិវឌ្ឍន៍អាជីវកម្មប្រចាំតំបន់ទន្លេមេគង្គ (MBI) ។ ប៉ុន្តែចាប់ពីពេលដាក់សម្ពោធតទៅ មជ្ឈមណ្ឌលសេវាកម្មអាជីវកម្ម (BIC) នឹងត្រូវស្វែងមូលនិធិដោយខ្លួនឯង ដើម្បីនិរន្តរភាពរបស់ខ្លួន។
BIC ជាមជ្ឈមណ្ឌលប្រមូលផ្ដុំទិន្នន័យ និងចែកចាយតាមរយៈវេបសៃយ៍ ពាក់ព័ន្ធនឹងដំណើរការ អាជីវកម្ម។ មជ្ឈមណ្ឌលនេះក៏ផ្ដល់ព័ត៌មានអំពីតម្រូវការ និងឱកាសទីផ្សារ ព្រមទាំងចែកចាយព័ត៌មានព្រឹត្តការណ៍ពាណិជ្ជកម្មផ្សេងៗ។ វេបសៃយ៍របស់មជ្ឈមណ្ឌល (www.bizinfo.center) ដែលបើកជាសាធារណដោយឥតគិតថ្លៃនេះ នឹងដំណើរការពេញលេញនៅខែតុលាខាងមុខនេះ។
នៅដើមឆ្នាំក្រោយ មជ្ឈមណ្ឌលនេះនឹងបង្កើតផ្នែកមួយទៀតសម្រាប់ផ្ដល់ព័ត៌មានសេវាកម្ម ដែលមជ្ឈមណ្ឌលនឹងដើរតួជាអ្នកតភ្ជាប់រវាងសហគ្រាសដែលត្រូវការសេវា និងក្រុមហ៊ុនផ្ដល់សេវាផ្សេង ដូចជា សេវាផ្នែកពន្ធ ច្បាប់ គណនេយ្យ ធនធានមនុស្សជាដើម។ នេះបើតាមលោក ស៊ឹម ចាន់គីរីរ័ត្ន ប្រធានគណៈកម្មាការសហគ្រាសធុនតូច និងមធ្យមនៃសមាគម YEAC ។ លោកបញ្ជាក់ថា ចំពោះសេវានេះ មជ្ឈមណ្ឌលនឹងគិតប្រាក់ពីអតិថិជន។ មជ្ឈមណ្ឌលក៏នឹងមានផ្ដល់សេវាត្រួតពិនិត្យលើការបំពេញបែបទរបស់សហគ្រាសផងដែរ៕
Tag:
មជ្ឈមណ្ឌលសេវាកម្មអាជីវកម្ម
© រក្សាសិទ្ធិដោយ thmeythmey.com