ជាតិ
នយោបាយជាតិ
គ.ជ.ប គ្មានយន្តការរៀបចំកន្លែងចុះឈ្មោះតាមព្រំដែនឡើយ
× ភ្នំពេញ៖ គណៈកម្មាធិការរៀបចំការបោះឆ្នោត (គ.ជ.ប) មិនមានយន្តការរៀបចំការិយាល័យចុះឈ្មោះបោះឆ្នោត នៅតាមបន្ទាត់ព្រំដែន សម្រាប់ពលរដ្ឋចំណាកស្រុកក្រៅប្រទេសឡើយ។ ការប្រកាសរបស់ គ.ជ.ប នេះ ស្របពេលដំណើរការចុះឈ្មោះបោះឆ្នោតថ្មី នឹងប្រព្រឹត្តទៅចាប់ពីថ្ងៃទី១ កញ្ញា ដល់ថ្ងៃទី ៩ វិច្ឆិកាខាងមុខនេះ សម្រាប់ការបោះឆ្នោតថ្នាក់ជាតិ ឆ្នាំ២០១៨ ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បាននិយាយថា មូលហេតុដែល គ.ជ.ប សម្រេចមិនរៀបចំការិយាល័យចុះឈ្មោះតាមព្រំដែននេះ ដោយសារតែវាមានភាពចម្រូងចម្រាសចំនួន៣ គឺទី១ បញ្ហាច្បាប់ ទី២ ភាពអយុត្តិធម៌សម្រាប់ការចុះឈ្មោះបោះឆ្នោត និងទី៣ បញ្ហាមិនឯកភាពគ្នារបស់អ្នកនយោបាយ។
ត្រង់ចំណុចនេះលោក ហង្ស ពុទ្ធា បានពន្យល់ប្រាប់សារព័ត៌មានថ្មីៗ យ៉ាងដូច្នេះថា៖«បើសិនជា គ.ជ.ប រៀបចំការចុះឈ្មោះតាមបន្ទាត់ព្រំដែនកម្ពុជានោះ វាគឺបង្ហាញពីភាពរើសអើសដល់ពលរដ្ឋខ្មែរ ដែលរស់នៅប្រទេសដទៃទៀត ដូចជានៅម៉ាឡេស៊ី កូរ៉េ និងប្រទេសដទៃទៀត។ ហើយបើយើងសម្រួលការចុះឈ្មោះតាមបណ្ដាទូតនៅក្រៅប្រទេសវិញ វាបង្ហាញថា គ.ជ.ប អនុវត្តផ្ទុយពីច្បាប់បោះឆ្នោត ព្រោះច្បាប់មិនបានអនុញ្ញាតឲ្យធ្វើបែបនេះ។ ចំណុចមួយទៀតបញ្ហាចុះឈ្មោះនេះ គណបក្សនយោបាយមានអាសនទាំងពីរជជែកគ្នាតាំងពីយូរហើយ ប៉ុន្តែមិនមានចំណុចឯកភាពគ្នាទេលើបញ្ហានេះ ដូច្នេះយើងមិនអាចរៀបចំបានឡើយ»។
តែយ៉ាងណាលោក ហង្ស ពុទ្ធា អំពាវនាវឲ្យពលរដ្ឋដែលមិនទាន់មានឈ្មោះក្នុងបញ្ជីបោះឆ្នោត ទាំងនៅក្នុង និងក្រៅប្រទេស គប្បីចំណាយពេលវេលាចុះឈ្មោះបោះឆ្នោតទាំងអស់គ្នា ។ បើតាមអ្នកនាំពាក្យ គ.ជ.ប រូបនេះ ពលរដ្ឋកម្ពុជា ដែលមានអាយុចាប់ពី១៨ឆ្នាំ ឡើងទៅ ហើយមិនទាន់ចុះបោះឆ្នោតសម្រាប់ការបោះឆ្នោតជ្រើសរើសតំណាងរាស្ត្រ នាអាណត្តិទី៦ នៅឆ្នាំ២០១៨ មានចំនួន២លាននាក់ ក្នុងចំណោមពលរដ្ឋដែលមានសិទ្ធិបោះឆ្នោត៩លាននាក់។ លោកបន្ថែមថា ពលរដ្ឋដែលមិនទាន់ចុះឈ្មោះបោះឆ្នោតនោះ ដោយសារតែ ពលរដ្ឋចំណាកស្រុក ទៅរស់នៅនិងធ្វើការនៅក្រៅប្រទេស និងពលរដ្ឋនៅក្នុងប្រទេស ដែលទើបគ្រប់អាយុបោះឆ្នោត។
សម្រាប់ពលរដ្ឋដែលបានចុះឈ្មោះបោះឆ្នោតរួចហើយ កាលពីអំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ កន្លងទៅ គឺអាចទៅបោះឆ្នោតជ្រើសរើសតំណាងរាស្ត្រ នាពេលខាងមុខតែម្តង ដោយពួកគេ មិនចាំបាច់ទៅចុះឈ្មោះម្តងទៀតឡើយ។ ប៉ុន្តែវាលើកលែងតែពលរដ្ឋដែលមានឈ្មោះបោះឆ្នោតហើយ បានផ្លាស់ប្តូរទីលំនៅថ្មីប៉ុណ្ណោះ ដែលតម្រូវឲ្យមានការចុះឈ្មោះបោះឆ្នោតជាថ្មីម្ដងទៀត។ នេះបើតាមលោក ហង្ស ពុទ្ធា ដែលបានបន្ថែមដូច្នេះ៖«បើពួកគាត់ផ្លាស់ប្ដូរកន្លែងរស់នៅថ្មីនោះ ពួកគាត់ត្រូវចុះឈ្មោះនៅកន្លែងថ្មី ដើម្បីអាចបោះឆ្នោតនៅកន្លែងនោះបាន។ ប៉ុន្តែបើពួកគាត់មិនចង់ចុះឈ្មោះបោះឆ្នោតថ្មីទេ ពួកគេត្រូវតែមកបោះឆ្នោតនៅទីកន្លែងរស់នៅចាស់ក៏បានដែរ»។
រដ្ឋាភិបាល បានកំណត់យកថ្ងៃទី២៩ ខែកក្កដា ឆ្នាំ២០១៨ ជាកាលបរិច្ឆេទនៃការបោះឆ្នោតថ្នាក់ជាតិ។ ប៉ុន្តែ គ.ជ.ប មិនទាន់កំណត់ថា ការបោះឆ្នោតថ្នាក់ជាតិឆ្នាំ២០១៨ នេះ នឹងត្រូវចំណាយថវិកាអស់ប៉ុន្មាននោះទេ៕
Tag:
ហង្ស ពុទ្ធា
គ.ជ.ប
បោះឆ្នោត
© រក្សាសិទ្ធិដោយ thmeythmey.com