បក្សខ្មែររួបរួមជាតិ គួរត្រៀមអ្នកជំនួសលោក ញឹក ប៊ុនឆៃ ដើម្បីការពារគណបក្សកុំឲ្យរំលាយ

ជាតិ

បក្សខ្មែររួបរួមជាតិ គួរត្រៀមអ្នកជំនួសលោក ញឹក ប៊ុនឆៃ ដើម្បីការពារគណបក្សកុំឲ្យរំលាយ

09, Aug 2017 , 12:08 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ប្រធានគណបក្សខ្មែររួបរួមជាតិលោក ញឹក ប៊ុនឆៃ ត្រូវបានតុលាការចោទប្រកាន់ចំនួន២ករណី ពាក់ព័ន្ធនឹងបទល្មើសគ្រឿងញៀន កាលពី១០ឆ្នាំមុន។ បញ្ហាក្តីក្ដាំនេះ បានធ្វើឲ្យគណបក្សខ្មែររួបរួមជាតិ ប្រឈមនឹងការបាត់បង់ឱកាសប្រជែងសន្លឹកឆ្នោតថ្នាក់ជាតិ ឆ្នាំ២០១៨។ ប៉ុន្តែត្រង់បញ្ហានេះគណបក្សខ្មែររួបរួមជាតិ គួរតែត្រៀមអ្នកជំនួសតំណែងលោក ញឹក ប៊ុនឆៃ ដើម្បីបន្តដំណើរការគណបក្ស ក្នុងការចូលរួមប្រជែងការបោះឆ្នោតនាពេលខាងមុខ។

អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មិនអាចសន្និដ្ឋានបានពីជោគវាសនារបស់គណបក្សខ្មែររួបរួមជាតិនោះទេ។ លោក ហង្ស ពុទ្ធា គ្រាន់តែអាចលើកទឡ្ហីករណ៍តាមតថភាពជាក់ស្ដែង ចំនួន២ ជុំវិញបញ្ហាគណបក្សខ្មែររួបរួមជាតិនេះ។ ទឡ្ហីករណ៍ទី១ ត្រូវបានលោក ហង្ស ពុទ្ធា ពន្យល់តាមផ្លូវច្បាប់ថា គណបក្សខ្មែររួបរួមជាតិ អាចចូលរួមប្រកួតប្រជែងការបោះឆ្នោតឆ្នាំ២០១៨បាន ដរាបណាលោក ញឹក ប៊ុនឆៃ មិនជាប់ឈ្មោះជាទណ្ឌិត។ ចំណែកទឡ្ហីករណ៍ទី២ បើលោក ញឹក ប៊ុនឆៃ ជាប់ឈ្មោះជាទណ្ឌិត ល្គឹកណាមានអ្នកជំនួសតំណែងលោក ញឹក ប៊ុនឆៃ ដឹកនាំគណបក្ស។

ថ្លែងប្រាប់សារព័ត៌មានថ្មីៗ អ្នកនាំពាក្យ គ.ជ.បរូបនេះ បានបញ្ជាក់ដូច្នេះថា៖«គ.ជ.ប គឺជាស្ថាប័នអនុវត្តច្បាប់ប៉ុណ្ណោះ។ ដូច្នេះពាក់ព័ន្ធនឹងករណីលោក ញឹក ប៊ុនឆៃ ដែលត្រូវបានតុលាការចោទប្រកាន់ពាក់ព័ន្ធបទល្មើសគ្រឿងញៀននេះ វាមិនទាន់មានការសម្រេចជាផ្លូវការទេ ហើយលោក ញឹក ប៊ុនឆៃ នៅតែជាជនសង្ស័យ។ ប៉ុន្តែបើសិនជាករណីនេះ ឈានដល់តុលាការកំពូលសម្រេចកាត់ទោសលោក ញឹក ប៊ុនឆៃ ជាផ្លូវការ នោះគាត់មានឈ្មោះជាទណ្ឌិត ដូចនេះគណបក្សខ្មែររួបរួមជាតិ មិនអាចចូលរួមបោះឆ្នោតបានទេ ព្រោះដោយសារខុសពីច្បាប់ស្តីពីគណបក្សនយោបាយ»។

លោក ហង្ស ពុទ្ធា បន្តពន្យល់ដូច្នេះថា៖« បើលោក ញឹក ប៊ុនឆៃ សម្រេចលាលែងចេញពីតំណែង ដើម្បីទុកឲ្យគណៈកម្មានាយកបក្សគាត់ ជ្រើសរើសអ្នកថ្មីជំនួសគាត់ដឹកនាំគណបក្សខ្មែររួបរួមជាតិនោះ គណបក្សនេះនៅតែអាចចូលរួមការបោះឆ្នោតបានជាធម្មតា»។

ជុំវិញបញ្ហានេះសារព័ត៌មានថ្មីៗ មិនទាន់អាចទាក់ទងអ្នកនាំពាក្យគណបក្សខ្មែររួបរួមជាតិ លោក រុណ មាត្រា ដើម្បីសុំការអត្ថាធិប្បាយពីដំណោះស្រាយបញ្ហារបស់គណបក្សនៅឡើយទេ។

ប៉ុន្តែអ្វីដែលគួរឲ្យកត់សម្គាល់នោះឃើញថា គណបក្សខ្មែររួបរួមជាតិ បានសម្រេចពន្យាពេលសមាជគណបក្សខ្លួន ក្រោយពេលលោក ញឹក ប៊ុនឆៃ ត្រូវបានសមត្ថកិច្ចឃាត់ខ្លួន។ ជាងនេះទៀតសមាជិកគណបក្សខ្មែររួបរួមជាតិមួយចំនួន បានចេញពីគណបក្សទៅចូលរួមជាមួយគណបក្សប្រជាជនកម្ពុជា និងគណបក្សហ្វ៊ុនស៊ិនប៉ិច ជាដើម។

កាលពីថ្ងៃទី៦ សីហា តុលាការបានសម្រេចចោទប្រកាន់លោក ញឹក ប៊ុនឆៃ ប្រធានគណបក្សខ្មែររួបរួមជាតិ ចំនួនពីរករណី ពាក់ព័ន្ធសំណុំរឿងបទល្មើសគ្រឿងញៀន កាលពី១០ឆ្នាំមុន។ តុលាការបានចោទលោក ញឹក ប៊ុនឆៃ ពីបទ សមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន កាលពីឆ្នាំ២០០៧ ។ សំណុំនេះត្រូវបានបញ្ជូនទៅចៅក្រមស៊ើបសួរ ដើម្បីចាត់វិធានការបន្តស្របតាមច្បាប់ និងនីតិវិធីជាធរមាន៕