ជាតិ
សេដ្ឋកិច្ច
រដ្ឋាភិបាលបន្ថែមកញ្ចប់ថវិកាសម្រាប់ផ្ដល់ឥណទានទិញស្រូវឲ្យដល់ ៥០លានដុល្លារ
× ភ្នំពេញ៖ បើទោះបីការប្រើប្រាស់កញ្ចប់ថវិកាពិសេសដែលរដ្ឋាភិបាលបានបញ្ចេញពីឆ្នាំមុនមានចំនួនតិចតួចយ៉ាងណាក្ដី ប៉ុន្តែរដ្ឋាភិបាលនៅតែបន្តបន្ថែមទុន ២៣លានដុល្លារទៀត ដើម្បីបម្រុងសម្រាប់ការប្រមូលទិញស្រូវពីកសិករដោយសហគ្រាសរោងម៉ាស៊ីនកិនស្រូវ ក្នុងរដូវប្រមូលផលឆ្នាំនេះ។ នេះបើតាមការឲ្យដឹងរបស់លោក កៅ ថាច អគ្គនាយកធនាគារអភិវឌ្ឍន៍ជនបទ (RDB) ។
លោក កៅ ថាច បានថ្លែងប្រាប់សារព័ត៌មានថ្មីៗ នៅថ្ងៃទី៩ខែសីហាថា រដ្ឋាភិបាល ក្នុងពេលថ្មីៗនេះ បានសម្រេចទម្លាក់កញ្ចប់ថវិកាចំនួន ២៣លានដុល្លារអាមេរិកបន្ថែមទៀតលើកញ្ចប់ថវិកា ២៧លានដុល្លារដែលមានស្រាប់ ហើយ RDB កំពុងអនុវត្តថវិកាទាំងនេះ។ លោកបន្ថែមថា កញ្ចប់ថវិកានេះ នឹងត្រូវផ្ដល់ឥណទានជូនរោងម៉ាស៊ីនកិនស្រូវ ដោយគិតអត្រាការប្រាក់ ៥ភាគរយក្នុងមួយឆ្នាំ និងយកស្រូវជាវត្ថុធានាក្នុងលក្ខខណ្ឌដូចមុន។ លោកបញ្ជាក់ថា ថវិកានេះសម្រាប់ផ្ដល់ឥណទានប្រមូលទិញស្រូវប៉ុណ្ណោះ ឯឥណទានសម្រាប់ធ្វើឃ្លាំង ឡសម្ងួត រដ្ឋាភិបាលមានកញ្ចប់ថវិកាដោយឡែកផ្សេងទៀត។
កញ្ចប់ថវិកា ២៧លានដុល្លារលើកមុន ត្រូវបានផ្ដល់កម្ចីតែចំនួន ៣,៥លានដុល្លារប៉ុណ្ណោះ ដែលគិតអត្រាការប្រាក់ ៧ភាគរយក្នុងមួយឆ្នាំ។ តែយ៉ាងណារដ្ឋាភិបាលបានបន្ថែមថវិកាឲ្យដល់ចំនួនសរុប ៥០លានដុល្លារ។ ការបន្ថែមនេះ ត្រូវបាន លោក កៅ ថាច ឲ្យដឹងថា តម្រូវការប្រាក់កម្ចីទិញស្រូវរដូវប្រមូលផលឆ្នាំនេះនឹងកើនឡើងច្រើនជាងឆ្នាំមុន។ លោកបញ្ចាក់ដូច្នេះថា៖«យើងប៉ាន់ស្មានថានឹងមានអ្នកខ្ចីច្រើន។ ឆ្នាំមុនខ្ចីតិចដោយសារមានសម្ពាធពីទីផ្សារខាងក្រៅ តែឆ្នាំនេះទីផ្សារទំនងជាមានលំនឹង ដូចនេះអ្នកហ៊ានទិញស្តុកទុកនឹងមានច្រើន ដែលពួកគាត់នឹងត្រូវការទុនបន្ថែមច្រើន»។
ថ្មីៗនេះរដ្ឋាភិបាលបានចុះកិច្ចព្រមព្រៀងមួយនាំចេញអង្ករទៅប្រទេសបង់ក្លាដេសចំនួន ២៥ម៉ឺនតោនក្នុងឆ្នាំនេះ ក្នុងចំណោមទំហំសរុបមួយលានតោនសម្រាប់រយៈពេល៥ឆ្នាំ។ នេះជាទីផ្សារធំថ្មីមួយទៀត បន្ទាប់កម្ពុជាមានទីផ្សារចិនដែលរដ្ឋាភិបាលទាំងពីបានព្រមព្រៀងនាំចេញក្នុងបរិមាណ ២០ម៉ឺនតោនក្នុងឆ្នាំ២០១៧ និង ៣០ម៉ឺនតោនក្នុងឆ្នាំ២០១៨ ។
កញ្ចប់ថវិកា ៥០លានដុល្លារនេះ ក្នុងពេលថ្មីនេះ ត្រូវបានប្រើប្រាស់ក្នុងវិស័យពោតជាបណ្ដោះអាសន្នដើម្បីសង្គ្រោះតម្លៃពោត តែឥឡូវថវិកានេះត្រូវបានបង្វិលទៅវិស័យស្រូវវិញ៕
© រក្សាសិទ្ធិដោយ thmeythmey.com