ជាតិ
នយោបាយជាតិ
លោក សួន សេរីរដ្ឋា ត្រូវបានសមត្ថកិច្ចចាប់ខ្លួន លោក សួន សេរីរដ្ឋា ត្រូវបានសមត្ថកិច្ចចាប់ខ្លួន។ រូបពីគេហទំព័រអគ្គស្នងការនគរបាលជាតិ
×
អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ បានប្រាប់សារព័ត៌មានថ្មីៗយ៉ាងខ្លីថា សមត្ថកិច្ច បានចាប់ខ្លួនលោក សួន សេរីរដ្ឋា ប្រធានគណបក្សអំណាចខ្មែរ នៅថ្ងៃទី ១៣ ខែសីហា។
នៅមុននេះបន្តិច គេហទំព័ររបស់អគ្គស្នងការនគរបាលជាតិ ក៏បានស្រង់សម្តីលោក គៀត ច័ន្ធថារិទ្ធ ចុះផ្សាយជុំវិញការចាប់ខ្លួនប្រធានបក្សអំណាចខ្មែរនេះដែរ។ អ្នកនាំពាក្យរូបនេះ បានបញ្ជាក់ថា សមត្ថកច្ចចាប់ខ្លួន លោក សួន សេរីរដ្ឋា ពីបទល្មើសព្រហ្មទណ្ឌជាក់ស្តែង ដោយសារលោក សួន សេរីរដ្ឋា សរសេរនៅលើគណនីហ្វេសប៊ុករបស់លោក «ញុះញង់ដល់កម្លាំងកងទ័ព មិនឲ្យស្តាប់បទបញ្ជា ដែលធ្វើឲ្យប៉ះពាល់ដល់កិច្ចការការពារជាតិ»។
គេហទំព័រឈ្មោះ sereyratha.info ដែលជាទំនងជាគេហទំព័របស់លោក សេរីរដ្ឋា បានស្រង់សំណេរទាំងស្រុងរបស់លោកប្រធានគណបក្សអំណាចខ្មែរដែលអត្ថាធិប្បាយ ជុំវិញរឿងបញ្ជូនទ័ពទៅកាន់ទឹកដីខេត្តស្ទឹងត្រែង នៅពេលដែលកងទ័ពឡាវចូលមកកម្ពុជា យកមកចុះផ្សាយបន្ត។ គេហទំព័រនេះ បានដាក់ចំណងជើងយ៉ាងនេះថា« បើសង្គ្រាមកើតឡើងជាមួយប្រទេសឡាវមែន កូនខ្មែរ កងទ័ពជាតិ នឹងស្លាប់យ៉ាងវេទនា ហើយមេទ័ពចោរនឹងឡើងបុណ្យប្រមូលលុយ សប្បាយស្រីញីយ៉ាងគគ្រឹកគគ្រេង»។ ចំណងជើងនេះ ក៏ត្រូវបានគេហទំព័រប៉ូលិស Screenshot យកមកចុះផ្សាយជាមួយនឹងការលើកឡើងរបស់អ្នកនាំពាក្យអគ្គស្នងការនគរបាលជាតិដែរ។
គេហទំព័រនេះ
sereyratha.info បានដកស្រង់ទាំងស្រុងនូវសំណេររបស់លោក សួន សេរីរដ្ឋា យ៉ាងនេះថា៖«ពេលសង្គ្រាមកើតឡើងជាមួយនឹងប្រទេសឡាវនោះ លទ្ធផលវាហ្នឹងមិនខុសពីសង្គ្រាមដែលកើតឡើងជាមួយនឹងប្រទេសសៀមទេ! កូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង ! ។ ពីព្រោះកន្លងមក ដូចយើងដឹងហើយ សង្គ្រាមដែលកើតឡើងជាមួយនឹងប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ ។ ចំណែកឯពួកមេៗពាក់ផ្កាយ និងកូនលោកធំៗដែលនៅជួរក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ជាមួយស្រីកំដរ ក៏ឡើងបុណ្យឡើងផ្កាយដែរ»។
មាត្រា ៤៧១ នៃក្រមព្រហ្មទណ្ឌ បានចែងពីបទ ញុះញង់កុំឲ្យយោធិនស្តាប់បង្គាប់។ មាត្រានេះ បានចែងថា អំពើញុះញង់ដោយផ្ទាល់ កុំឲ្យយោធិនស្តាប់បង្គាប់ ដើម្បីធ្វើឲ្យខូចខាតការការពារជាតិ ត្រូវផ្តន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យពី ៤ លានរៀលទៅ ១០ លានរៀល។ ចំណែកមាត្រា ៤៧២ បានចែងពីបទ ធ្វើឲ្យខូចទឹកចិត្តកងទ័ព។ មាត្រានេះ បានកណត់ថា អំពើចូលរួមក្នុងការធ្វើឲ្យខូចទឹកចិត្តកងទ័ព ដើម្បិធ្វើឲ្យខូចខាតការការពារជាតិ ត្រូវផ្តន្ទាទោសដាក់ពន្ធានគារពី ២ ឆ្នាំ ទៅ ៥ ឆ្នាំ និងពិន័យពី ៤ លានរៀលទៅ ១០ លានរៀល៕
© រក្សាសិទ្ធិដោយ thmeythmey.com