ជាតិ
គ.ជ.ប៖ ពលរដ្ឋចុះឈ្មោះបោះឆ្នោតថ្មីមានជាង ១.៤ លាននាក់
× ភ្នំពេញ៖ អ្នកចុះឈ្មោះបោះឆ្នោតថ្មី មាន ១,៤១២,១៤៩ នាក់។ នេះបើតាមតារាងស្ថិតិប៉ាន់ស្មានរបស់ គណៈកម្មាធិការជាតិរៀបចំការបោះឆ្នោត(គ.ជ.ប) ដែលបានប្រកាសនៅថ្ងៃទី១៥ ខែសីហានេះ។
លោក ទេព នីថា អគ្គលេខាធិការ គ.ជ.ប បានថ្លែងថា អ្នកចុះឈ្មោះបោះឆ្នោតថ្មីទាំងនេះ គឺជាអ្នកយុវជន ដែលគ្រប់អាយុបោះឆ្នោត អ្នកផ្លាស់ប្តូរទីលំនៅ និងអ្នកមិនទាន់បានចុះឈ្មោះបោះឆ្នោតកាលពីការបោះឆ្នោះឃុំ/សង្កាត់។ ការថ្លែងរបស់ លោក ទេព នីថា ធ្វើឡើងនៅទីស្តីការ គ.ជ.ប ក្នុងពិធីប្រកាសស្តីពី ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតឆ្នាំ២០១៧។
លោកបញ្ជាក់យ៉ាងដូច្នេះថា៖«ធម្មតាក្នុងមួយឆ្នាំ កំណើនយុវជនគ្រប់អាយុចុះឈ្មោះបោះឆ្នោតមានប្រមាណ៣០ម៉ឺននាក់ ចំនួនអ្នកផ្លាស់ប្តូរទីលំនៅចេញ និងពលរដ្ឋដែលមិនបានចុះឈ្មោះកាលឆ្នាំ២០១៦ ដែលនៅសល់ជាង១លាននាក់»។
ដោយឡែក ពាក់ព័ន្ធកាលបរិច្ឆេទនៃការចុះឈ្មោះបោះឆ្នោតជាតិវិញ ត្រូវបាន លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានថ្លែងថា កាលបរិច្ឆេទនៃការចុះឈ្មោះសម្រាប់ការបោះឆ្នោតជាតិឆ្នាំ២០១៨ នឹងប្រព្រឹត្តទៅរយៈពេល៧០ថ្ងៃ ពោល គឺចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆកា ឆ្នាំ២០១៧។
បើតាមស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មានរបស់គជប ពលរដ្ឋខ្មែរមានសរុប ១៥,៨៨៣,២៥០ នាក់ ពលរដ្ឋដែលមានអាយុ១៨ឆ្នាំឡើងទៅមានចំនួន ៩,៧៨៨,២៣៩ នាក់ អ្នកត្រៀមលុបឈ្មោះចេញមាន ៨០,២៦៣នាក់ ខណៈការិយាល័យបោះឆ្នោតមានសរុប ២៣,៤៧០៕
Tag:
បោះឆ្នោត
បញ្ជីឈ្មោះ
គជប
© រក្សាសិទ្ធិដោយ thmeythmey.com