ជាតិ
កូនក្រពើត្រី៩ក្បាលបានញាស់ ក្រោយរកឃើញលើកដំបូងនៅ១០ឆ្នាំចុងក្រោយ នៅប្រព័ន្ធព្រែកស្រែអំបិល រូបភាពពីហ្វេសប៊ុកអង្គការ WCS
× កូនក្រពើត្រីដែលជាប្រភេទជិតុតពូជបំផុត នៅលើសាកលលោក ចំនួន ៩ក្បាល បានញាស់ដោយជោគជ័យនៅក្នុងមជ្ឈមណ្ឌលអភិរក្សប្រភេតសត្វល្មូន ខេត្តកោះកុង។ សំបុកពងក្រពើត្រីទាំងនេះ មានសរុប១៩ពង ត្រូវបានរកឃើញកាលពីចុងខែមិថុនាកន្លងទៅ នៅប្រព័ន្ធព្រែកស្រែអំបិល ដែលជារកឃើញសំបុកលើកដំបូងក្នុងរយៈពេល១០ឆ្នាំចុងក្រោយនេះ។
កូនក្រពើត្រី ឬក្រពើព្រៃ ដែលជាប្រភេទជិតុតពូជបំផុតនៅលើសាកលលោក ចំនួ៩ក្បាល ក្នុងចំណោមពង១៩ បានញាស់ដោយជោគជ័យ នៅក្នុងមជ្ឈមណ្ឌលអភិរក្សប្រភេតសត្វល្មូន ខេត្តកោះកុង។ បើតាមសេចក្តីប្រកាសព័ត៌មាន របស់អង្គការសមាគមអភិរក្សសត្វព្រៃ(WCS) និងរដ្ឋបាលជលផល សំបុកពងរបស់វា ត្រូវបានក្រុមអ្នកអភិរក្សរបស់រដ្ឋបាលជលផល អង្គការWCS និងប្រជាសហគមន៍ ប្រទះឃើញនៅពេលដើរល្បាតកាលពីថ្ងៃទី២៨ ខែមិថុនា នៅត្រពាំងកៀនតុ ស្ថិតក្នុងភូមិព្រះអង្គកែវ ស្រុកស្រែអំបិល ខេត្តកោះកុង។ ពងក្រពើត្រីទាំងអស់នេះ ត្រូវបានក្រុមអ្នកអភិរក្សយកទៅថែរក្សា នៅក្នុងមជ្ឈមណ្ឌលអភិរក្ស រហូតដល់ពួកវាញាស់នៅពេលនេះ។
លោក Lonnie McCaskill អ្នកជំនាញផ្នែកសត្វក្រពើ និងជាជំនួយការនាយកប្រចាំសួនសត្វ Prospect Park សហរដ្ឋអាមេរិក បាននិយាយថា ការរកឃើញសំបុកលើកដំបូងបង្អស់សម្រាប់រយៈពេល១០ឆ្នាំចុងក្រោយ នៅប្រព័ន្ធព្រែកស្រែអំបិល បញ្ជាក់ថាក្រពើត្រីនៅតែមានវត្តមានរស់នៅ និងបន្តពូជនៅទីនេះ។
ក្រពើត្រី ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតនៅលើសាកលលោក ខណៈចំណួនរបស់ពួកវានៅតែបន្តធ្លាក់ចុះគួរឲ្យកត់សម្គាល់។
បើតាមអង្គការWCS ពួកវាមាននៅតែក្នុងប្រទេសកម្ពុជា ឥណ្ឌូនេស៊ី ថៃ និងវៀតណាមតែប៉ុណ្ណោះ។ ចំនួនរបស់វានៅលើសាកលលោក មានប្រមាណ៤១០ក្បាល ក្នុងនោះចន្លោះ១០០ទៅ៣០០ក្បាល កំពុងរងស់នៅក្នុងព្រៃធម្មជាតិក្នុងប្រទេសកម្ពុជា ដែលធ្វើឲ្យកម្ពុជា ក្លាយជាប្រទេសមួយសំខនា់បំផុតសម្រាប់ការអភិរក្សសត្វក្រពើត្រីនេះកុំឲ្យបាត់បង់។
អ្នកស្រី ទុន សារ៉ន អ្នកមើលថែទាំសត្វនៅមជ្ឈមណ្ឌលអភិរក្សប្រភេទសត្វល្មូនខេត្តកោះកុង បានថ្លែងថា អ្នកស្រីរំភើបណាស់ ដែលបានឃើញកូនក្រពើត្រីទាំងអស់នេះ ព្រោះនេះជាលើកដំបូងហើយ ដែលគាត់បានថែទាំចាប់តាំងពីវាបានមកមជ្ឈមណ្ឌល។ អ្នកស្រី ទុន សារ៉ន បន្ថែមដូច្នេះ៖«មុនពេលឃើញមុខកូនក្រពើត្រីទាំងអស់នេះ ខ្ញុំភ្ញាក់ផ្អើលដែលឮសំឡេងពួកវាចេញពីក្នុងពង។ វាពិតជាអស្ចារ្យខ្លាំងណាស់ ហើយខ្ញុំមានអារម្មណ៍សប្បាយចិត្ត ព្រោះខ្ញុំដឹងថាពួកវាកំពុងតែញាស់»។
មជ្ឈមណ្ឌលអភិរក្សប្រភេទសត្វល្មូនខេត្តកោះកុង ស្ថិតក្នុងស្រុកមណ្ឌលសីមា បង្កើតឡើងដើម្បីចិញ្ចឹមថែរក្សា និងបង្កាត់ពុជសត្វល្មូន។ មជ្ឈមណ្ឌលនេះ គឺជាកិច្ចខិតខំប្រឹងប្រែងរួមគ្នារវាងរដ្ឋបាលជលបាល និងអង្គការ WCS ដើម្បីសង្គ្រោះប្រភេទសត្វល្មូន ដូចជាអណ្តើកហ្លួង និងក្រពើត្រីជាដើម។ កូនអណ្តើហ្លួង និងក្រពើត្រី ដែលញាស់ចេញពីសំបុក ដែលទទួលបានការការពារ នឹងនាំមកមជ្ឈមណ្ឌលនេះ ដើម្បីចិញ្ចឹម ថែរក្សា និងលែងឲ្យទៅរស់នៅក្នុងធម្មចាតិវិញ នៅពេលវាធំ អាចរស់នៅដោយខ្លួនឯងបាន។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សខេត្តកោះកុងរបស់អង្គការ WCS និយាយថា កូនក្រពើត្រីនេះ បង្ហាញពីការចាប់ផ្តើមយ៉ាងល្អសម្រាប់មជ្ឈមណ្ឌលអភិរក្សប្រភេទសត្វល្មូនខេត្តកោះកុង ដែលនឹងត្រូវប្រើប្រាស់សម្រាប់បង្កាត់ពូជប្រភេទសត្វល្មូននាពេលអនាគត។ វាក៏ជាដំណឹងល្អមួយសម្រាប់ការអភិរក្សក្រពើត្រីនៅកម្ពូជា ព្រោះចំនួនរបស់វាក្នុងធម្មចាតិនៅតែបន្តធ្លាក់ចុះ។
កូនក្រពើត្រីទាំងអស់នេះ នឹងត្រូវរក្សាទុកក្នុងមជ្ឈមណ្ឌល ដើម្បីចិញ្ចឹម ថែរក្សា និងលែងនិងលែងឲ្យទៅរស់នៅក្នុងធម្មចាតិវិញ នៅពេលវាធំ អាចរស់នៅដោយខ្លួនឯងបាន។ លោក សោម ស៊ីថា បញ្ជាក់បន្ថែមដូច្នេះ៖«យើងនឹងថែទាំងពួកវាយ៉ាងយកចិត្តទុកដាក់ រហូតដល់វាអាចរស់នៅក្នុងធម្មជាតិបាន។ យើងនឹងលែងពួកវាមួយចំនួនទៅក្នុងធម្មជាតិ និងមួយចំនួនទៀតយើងរក្សាទុកក្នុងមជ្ឈមណ្ឌល ដើម្បីបង្កាត់ពូជ»។
នៅកម្ពុជា ការរស់នៅរបស់ក្រពើត្រី ប្រឈមនឹងការគំរាមកំហែងជាច្រើនដូចជា ការនេសាទខុសច្បាប់ ពិសេសការចាប់សម្រាប់ផ្គត់ផ្គង់ដល់កសិដ្ឋានចិញ្ចឹមក្រពើនៅអំឡុងទស្សវត្ស១៩៩០ និង២០០០ ការបំផ្លាញទីជម្រក ការថយចុះចំណីអាហារក្នុងធម្មជាតិ ការបាត់បង់ឱកាសបន្តពូជ ការបាត់ពូជសុទ្ធនៅក្នុងធម្មជាតិ និងការធូររលុងក្នុងការអនុវត្តច្បាប់ជាដើម។
លោក អ៊ុក វិបុល ប្រធាននាយកដ្ឋានអភិរក្សជលផលនៃរដ្ឋបាលជលផល ថ្លែងថាលោករីករាយខ្លាំងណាស់ ចំពោះវត្តមានកូនក្រពើត្រីទាំងអស់នេះ ព្រោះវាប្រភេទរងគ្រោះចិតផុតពូជបំផុតក្នុងសាកលលោក ។ លោក បញ្ជាក់ដូច្នេះ៖«យើងអាចបង្កើនចំនួនរបស់វាក្នុងធម្មជាតិ។ ពួកវាត្រូវការការអភិរក្សបន្ថែមទៀត ដើម្បីកុំឲ្យបាត់បង់»។
ប្រធាននាយកដ្ឋានអភិរក្សជលផលនៃរដ្ឋបាលជលផល ក៏បានថ្លែងអំណរគុណ និងសំណូមពរដល់អ្នកពាក់ព័ន្ធ ចូលរួមអភិរក្សសត្វប្រភេទកម្រនេះ ដោយបញ្ឈប់ការបរបាញ់ ការប្រមូលពងកូន និងការបំផ្លាញទីជម្រកធម្មជាតិរបស់វា៕
© រក្សាសិទ្ធិដោយ thmeythmey.com