ជាតិ
លោក ឆាយ សុផល សាស្ត្រាចារ្យសារព័ត៌មាន ចេញផ្សាយសៀវភៅជីវិតរដ្ឋមន្ត្រីព័ត៌មាន
× លោក ឆាយ សុផល អ្នកសារព័ត៌មានជើងចាស់ នៅថ្ងៃអង្គារនេះបានចេញសៀវភៅថ្មីមួយទៀតរបស់លោកដែលមានចំណងជើងថា “ខៀវ កាញារីទ្ធ - ជីវិតក្នុងសមរភូមិទស្សនៈចម្រុះពណ៌”។
សៀវភៅនេះបានរៀបរាប់ពីជីវិតរបស់លោករដ្ឋមន្ត្រីព័ត៌មាន ខៀវ កាញារីទ្ធ ដែលលោកបានឆ្លងកាត់ច្រើនដំណាក់កាល និងមនោគមវិជ្ជាចម្រុះចាប់តាំងពីមុនឆ្នាំ១៩៧០ មកដល់ឆ្នាំ២០១៧នេះ។ នៅក្នុងសៀវភៅក៏បានលាតត្រដាងពីភាពជូរចត់ ផ្អែមល្អែម ការប្រឈម និងភាពជោគជ័យនៅក្នុងជីវិតជាអ្នកព័ត៌មាន និងជាមន្ត្រីព័ត៌មាន ក៏ដូចជាមន្ត្រីរបស់រាជរដ្ឋាភិបាល។
ថ្លែងប្រាប់អ្នកសារព័ត៌មាន បន្ទាប់ពីជួបលោករដ្ឋមន្ត្រី ខៀវ កាញារីទ្ធ រួចមក លោក ឆាយ សុផល បាននិយាយថា ចំណុចពិសេសរបស់លោករដ្ឋមន្ត្រីព័ត៌មាន គឺភាពស្មោះត្រង់ និងការបំពេញការងារប្រកបដោយជំនាញនិងវិជ្ជាជីវៈ ខណៈដែលចេះជួយយកអាសារអ្នកដទៃ។
លោក ឆាយ សុផល បាននិយាយថា សៀវភៅដែលមានកម្រាស់ជាង៣០០ទំព័រនេះ គឺលោកបានស្រាវជ្រាវនិងចងក្រងចាប់តាំងពីឆ្នាំ២០១១ ហើយនៅព្រឹកមិញនេះ លោកបានប្រគល់សៀវភៅចំនួន ២២២ ច្បាប់ជូនលោករដ្ឋមន្ត្រីព័ត៌មាន ខៀវ កាញារីទ្ធ ដើម្បីលោកបានទុកចែកជូនមន្ត្រីរបស់លោក៕
© រក្សាសិទ្ធិដោយ thmeythmey.com