ប្រមុខការពារជាតិ៖«អាមេរិកមិនចង់ប្តូររបបកូរ៉េខាងជើងទេ តែបើហ៊ានវាយកោះហ្គាមដឹងតែមានសង្គ្រាម»

អន្តរជាតិ

ប្រមុខការពារជាតិ៖«អាមេរិកមិនចង់ប្តូររបបកូរ៉េខាងជើងទេ តែបើហ៊ានវាយកោះហ្គាមដឹងតែមានសង្គ្រាម»

15, Aug 2017 , 9:19 pm

រូបភាព

ដោយ: ថ្មីៗ

ប្រមុខការពារជាតិអាមេរិកលោក ជេម ម៉ាទីស បានលើកឡើងថា អាមេរិកមិនមានចំណាប់អារម្មណ៍ក្នុងការផ្តួលរំលំ ឬប្តូររបបដឹកនាំកូរ៉េខាងជើងឡើយ ហើយក៏រឹតែមិនមានបំណងពន្លឿនការរួបរួមគ្នារវាងកូរ៉េទាំងពីរដែរ។ លោកក៏ឆ្លៀតព្រមានជាថ្មីថាឲ្យតែមីស៊ីលកូរ៉េខាងជើងធ្លាក់លើដីអាមេរិក រួមទាំងកោះហ្គាម គឺមានន័យថា សង្គ្រាមកើតឡើងហើយ។ ប៉ុន្តែប្រមុខការពារជាតិរូបនេះមិនបានបញ្ជាក់ឲ្យច្បាស់លាស់ឡើយថា អាមេរិកនឹងធ្វើអ្វីឲ្យប្រាកដក្នុងករណីដែលមានការវាយប្រហារបែបនេះទេ ដោយលោកគ្រាន់តែបង្ហើបថា ការសម្រេចចិត្តគ្រប់យ៉ាងស្ថិតលើដីប្រធានាធិបតី រួមទាំងសភាផងដែរ។

ចុងសប្តាហ៍កន្លងទៅរដ្ឋមន្ត្រីការពារជាតិអាមេរិកលោក ជេម ម៉ាទីស បានបញ្ជាក់ជាថ្មីក្នុងអត្ថបទមួយចុះផ្សាយក្នុងសារព័ត៌មាន Wall Street Journal ថា អាមេរិកគ្មានចំណាប់អារម្មណ៍ក្នុងការប្តូររបបដឹកនាំកូរ៉េខាងជើង និងចង់ពន្លឿនការបង្រួបបង្រួមកូរ៉េទាំងពីរឡើយ។ ការបញ្ជាក់ជាថ្មីនេះកើតឡើងស្របពេលដែលកូរ៉េខាងជើងនិងអាមេរិកប្រឈមមុខគ្នាកាន់តែខ្លាំង ក្រោយកូរ៉េខាងជើងគំរាមបាញ់មីស៊ីលសំដៅតំបន់ក្បែរកោះហ្គាមនៅត្រឹមពាក់កណ្តាលខែសីហានេះ។

ប្រមុខការពារជាតិអាមេរិករូបនេះបានបញ្ជាក់ថា អាមេរិកនៅតែចង់ប្រើប្រាស់នយោបាយការទូតដើម្បីបន្ធូរបន្ថយកម្តៅនៅឧបទ្វីបកូរ៉េ។ ប៉ុន្តែទាំងលោក ម៉ាទីស និង រដ្ឋមន្ត្រីការបរទេសអាមេរិកលោក រិច ធីល័រសិន បានសង្កត់ធ្ងន់ថាការទូតមានទម្ងន់ក៏ចាំបាច់ត្រូវមាន ចំណាត់ការយោធាដូចគ្នា។

លោក ម៉ាទីស អះអាងដូច្នេះ៖« អាមេរិកគ្មានចំណាប់អារម្មណ៍ចង់ប្តូររបបដឹកនាំឬ ពន្លឿការរួបរួមគ្នារវាងកូរ៉េទាំងពីរឡើយ។ យើងមិនស្វែងរកលេសដើម្បីដាក់ទ័ពអាមេរិកនៅភាគខាងជើងតំបន់គ្មានយោធាឡើយ ហើយយើងក៏គ្មានបំណងចង់ធ្វើបាបប្រជាជនកូរ៉េខាងជើងដែលរងទុក្ខវេទនាអស់ពេលជាយូរឆ្នាំទាំងនោះដែរ។

ប្រមុខការពារជាតិអាមេរិកក៏បានបន្តអំពាវនាវឲ្យចិនចូលរួមឲ្យកាន់តែសកម្មក្នុងការដោះស្រាយបញ្ហាកូរ៉េខាងជើងផងដែរ ព្រោះចិនមានទឹកមាត់ប្រៃ និងមានឥទ្ធិពលខ្លាំងលើរបបដឹកនាំក្រុងព្យុង។ ចិនអាចប្រើប្រាស់ទម្ងន់ការទូតនិងសេដ្ឋកិច្ចដាក់សម្ពាធកូរ៉េខាងជើងដើម្បីធានាបាននូវស្ថិរភាពនិងសន្តិភាពក្នុងតំបន់ផងដែរ។

គួរទាញការចាប់អារម្មណ៍បន្តិចដែរថា ចិនបានសម្រេចផ្អាកការនាំចូលអាហារសមុទ្រ រ៉ែដែក និងដែកពីកូរ៉េខាងជើង ដោយព្យាយាមអនុវត្តតាមដំណោះស្រាយក្រុមប្រឹក្សាសន្តិសុខអង្គការសហប្រជាជាតិនៅសប្តាហ៍នេះដែរ។

ដោយឡែកលោក ម៉ាទីស ក៏បានរម្លឹកជាថ្មីថា អាមេរិកនៅតែមានឆន្ទៈក្នុងការចរចាជាមួយកូរ៉េខាងជើង ប៉ុន្តែកូរ៉េខាងជើងត្រូវតែបង្ហាញឲ្យឃើញពីចេតនារបស់ខ្លួនក្នុងការផ្អាកការផលិតអាវុធ និងសាកល្បងអាវុធនុយក្លេអ៊ែរជាមុនសិន។

ម៉ាទីសព្រមាន៖ «បើមីស៊ីលកូរ៉េខាងជើងធ្លាក់លើដីអាមេរិក មានន័យថាសង្គ្រាមផ្ទុះឡើង»

ដោយឡែក ស្ថានការណ៍ឧបទ្វីបកូរ៉េនៅតែក្តៅ និងតានតឹងខ្លាំងក្រោយភាគីទាំងសងខាងអាមេរិកនិងកូរ៉េខាងជើងផ្ទុះសង្គ្រាមពាក្យសម្តីនិងចង់ប្រើកម្លាំងរៀងខ្លួន។ បច្ចុប្បន្នគេកំពុងរង់ចាំមើលថា តើកូរ៉េខាងជើងនឹងសម្រេចបាញ់មីស៊ីលផ្លោងសំដៅកោះហ្គាមដែលមានមូលដ្ឋានទ័ពអាមេរិកស្ថិតនៅឬអត់នៅសប្តាហ៍នេះ ព្រោះកូរ៉េខាងជើងបានអះអាងថា ខ្លួនសម្រេចផែនការបាញ់មីស៊ីលនេះរួចស្រេចហើយ។ បើសិនជាមានការវាយប្រហារដោយមីស៊ីលចូលកោះហ្គាមមែននេះ គេប្រហែលជាអាចនឹងឃើញសង្គ្រាមផ្ទុះឡើងផងក៏មិនដឹង ព្រោះអាមេរិកបានព្រមានជាមុនហើយថា ការវាយប្រហារលើកោះហ្គាមមានន័យស្មើប្រកាសនឹងសង្គ្រាមប្រឆាំងអាមេរិក»។

ពាក់ព័ន្ធបញ្ហានេះលោក ជេម ម៉ាទីស បានព្រមានកូរ៉េខាងជើងនៅដើមសប្តាហ៍នេះថា បើសិនជាកូរ៉េខាងហ៊ានបាញ់មីស៊ីលលើទឹកដីកោះហ្គាម សង្គ្រាមនឹងកើតឡើងភ្លាមៗ។ យោងតាមសារព័ត៌មាន South China Morning Post លោកបានបញ្ជាក់ដូច្នេះ៖« វាអាចនឹងរាលដាលទៅជាសង្គ្រាមយ៉ាងឆាប់រហ័ស។ ពិតហើយវាប្រាកដជាសង្គ្រាម។ ប្រសិនបើក្រុងព្យុងយ៉ាងវាយប្រហារអាមេរិក ខ្ញុំសន្និដ្ឋានថា គេនឹងក្លាយជាសញ្ញានៃការចាប់ផ្តើមសង្គ្រាម»។

មកដល់បច្ចុប្បន្នទាហានអាមេរិក ៧ពាន់នាក់ រួមទាំងក្រុមគ្រួសារកំពុងស្ថិតនៅកោះហ្គាម ហើយប្រជាជនសរុបដែលរស់នៅក្នុងទឹកដីនេះមានរហូតដល់ ១៧ម៉ឺននាក់ឯណោះ។ ដូច្នេះហើយអាមេរិកក៏បារម្ភផងដែរក្រែងមានការវាយប្រហារណាមួយកើតឡើងនៅពេលខាងមុខពីសំណាក់កូរ៉េខាងជើងនោះ។

យ៉ាងណាមិញ ប្រមុខការពារជាតិអាមេរិកហាក់បីដូចជាមិនទាន់កំណត់ឲ្យបានច្បាស់លាស់នៅឡើយទេថា តើអាមេរិកត្រូវធ្វើដូចម្តេចឬ ឆ្លើយតបយ៉ាងដូចម្តេចបើសិនជាមានការវាយប្រហារមែននោះ។ លោកគ្រាន់តែសង្កត់ធ្ងន់ថា ការប្រកាសសង្គ្រាមជាអំណាចប្រធានាធិបតីអាមេរិកលោក ដូណាល់ ត្រាំ និងរួមបញ្ចូលទាំងសាផងដែរ៕