វៀតណាមពង្រឹងវិធានការប្រឆាំងពុករលួយ និងធានាថាមន្ត្រីជាន់ខ្ពស់ឈប់កេងប្រវ័ញ្ចរដ្ឋ

អន្តរជាតិ

វៀតណាមពង្រឹងវិធានការប្រឆាំងពុករលួយ និងធានាថាមន្ត្រីជាន់ខ្ពស់ឈប់កេងប្រវ័ញ្ចរដ្ឋ

22, Sep 2017 , 3:39 pm

រូបភាព

រូបភាព៖ Reuters

ដោយ:

គណបក្សកុម្មុយនីស្ដវៀតណាមបានសម្រេចដាក់ចេញបទបញ្ញត្តិសំដៅគ្រប់គ្រងសកម្មភាពមន្ត្រីជាន់ខ្ពស់ ដើម្បីធ្វើយ៉ាងណាប្រឆាំងអំពើពុករលួយដែលជាជំងឺសង្គម ក៏ដូចជាបញ្ចៀសបញ្ហាបក្សពួកនិយម និងធានាបានថា មន្ត្រីវៀតណាមមានភាពស្អាតស្អំមិនកេងប្រវ័ញ្ចរដ្ឋ។

រដ្ឋាភិបាលវៀតណាមកាលពីពេលថ្មីៗកន្លងមកនេះ បានប្រកាសក្នុងគេទំព័រផ្លូវការរបស់ខ្លួនថា បក្សកុម្មុយនីស្តវៀតណាមសម្រេចចេញច្បាប់សំដៅគ្រប់គ្រងសកម្មភាពមន្ត្រីជាន់ខ្ពស់ទាំងឡាយដើម្បីធ្វើយ៉ាងណាប្រឆាំងអំពើពុករលួយ ចៀសវាងការលំអៀង ឬ បក្សពួកនិយម។ មិនត្រឹមតែប៉ុណ្ណោះទេ វៀតណាមក៏ចង់ឲ្យមន្ត្រីខ្លួនរស់នៅដោយស្អាតស្អំ និងគ្មានចិត្តលោភលន់កេងប្រវ័ញ្ចរដ្ឋឡើយ។

ទីភ្នាក់ងារព័ត៌មាន Reuters ផ្សាយថា ការិយាល័យនយោបាយវៀតណាមបានយល់ព្រមចេញបទបញ្ញញត្តិនេះដើម្បីឆ្លើយការរីករាលដាលនៃអំពើពុករលួយក្នុងប្រទេស បន្ទាប់ពីអ្នកនយោបាយអភិរក្សដែលជាអ្នកគិតគូរពីបញ្ហាសន្តិសុខនោះឈ្នះឆ្នោត ហើយមានឥទ្ធិពលកាន់តែខ្លាំងក្នុងបិរបទនយោបាយវៀតណាមនោះ។

សេចក្តីប្រកាសរបស់រដ្ឋាភិបាលវៀតណាមបន្តថា រាល់មន្ត្រីថ្នាក់ខ្ពស់ទាំងឡាយមិនត្រូវប្រព្រឹត្តអំពើពុករលួយ ឬឆ្លៀតឱកាសកេងប្រវ័ញ្ចជាដាច់ខាត ហើយពួកគេត្រូវប្ដេជ្ញាធ្វើយ៉ាងណាប្រឆាំងការថមថយឥទ្ធិពលនៃមនោគមវិជ្ជានយោបាយនៅក្នុងប្រទេសកន្លងមកផង។

រដ្ឋាភិបាលវៀតណាមក៏ដាស់តឿនមន្ត្រីរបស់ខ្លួនបន្ថែមឲ្យលះបង់រាល់មហិច្ឆតាលោភលន់ចង់បានអំណាច ហើយដាច់ខាតមិនត្រូវឲ្យសាច់ញាតិ ឬមិត្តភក្ដិខ្លួនទាញយកផលប្រយោជន៍ពីមុខងាររបស់ខ្លួនឡើយ។ មន្ត្រីជាន់ខ្ពស់ទាំងអស់ត្រូវមានភាពស្មោះត្រង់ រស់នៅដោយស្អាតស្អំ និងមានសណ្តានចិត្តខ្ពស់។

គួរបញ្ជាក់ដែរថា ការដាក់ចេញច្បាប់នេះដែរកើតឡើង ក្រោយអាល្លឺម៉ង់ចោទថា វៀតណាមបានចាប់ជំរិតអតីតនាយកប្រតិបត្តិក្រុមហ៊ុនប្រេងរដ្ឋវៀតណាមលោក Trinh Xuan Thanh ពីទីក្រុងប៊ែរឡាំង ក្រោយលោកសុំសិទ្ធិជ្រកកោននៅទីនោះ។ មុនមានការការចាប់ខ្លួន វៀតណាមបានចោទថា លោក Trinh Xuan Thanh នេះថាបានប្រព្រឹត្តអំពើពុករលួយ និងគ្រប់គ្រងក្រុមហ៊ុនរដ្ឋមិនល្អទើប បង្កឲ្យក្រុមហ៊ុនខាតអស់ប្រាក់១៥០លានដុល្លារ។ ថ្វីបើមានការចោទប្រកាន់វៀតណាមពីសំណាក់អាល្លឺម៉ង់ក៏ដោយ លោក Trinh Xuan Thanh បានបង្ហាញមុខតាមកញ្ចក់ទូរទស្សន៍វៀតណាម និងបានអះអាងថា លោកជាអ្នកចុះចូលឲ្យអាជ្ញាធរចាប់ខ្លួន៕