លោក ឱម យ៉ិនទៀង ស្នើឲ្យរដ្ឋមន្ត្រីគ្រប់ក្រសួង រឹតបន្តឹងការប្រឡង តាមស្ដង់ដារក្រសួងអប់រំ

ជាតិ

លោក ឱម យ៉ិនទៀង ស្នើឲ្យរដ្ឋមន្ត្រីគ្រប់ក្រសួង រឹតបន្តឹងការប្រឡង តាមស្ដង់ដារក្រសួងអប់រំ

16, Aug 2017 , 8:19 pm

រូបភាព

ដោយ: ថ្មីៗ

ភ្នំពេញ៖ ប្រធានអង្គភាពប្រឆាំងអំពើពុករលួយ (ACU) លោក ឱម យ៉ិនទៀង ស្នើទៅរដ្ឋមន្ត្រីតាមក្រសួងនានា ឲ្យអនុវត្តតាមគោលការណ៍ក្រសួងអប់រំ យុវជន និងកីឡា ក្នុងការរឹតបន្តឹងការប្រឡងចូលក្របខណ្ឌក្រសួង។

សូមស្តាប់សំឡេង៖

ការលើកឡើងរបស់លោក ឱម យ៉ិនទៀង បែបនេះ ធ្វើឡើងក្រោយពី ACU សង្កេតឃើញថា ការប្រឡងនៅតាមក្របខណ្ឌក្រសួងកន្លងមក នៅមានចំណុចខ្វះខាតមួយចំនួន ដែលត្រូវកែតម្រូវ។ ត្រង់ចំណុចនេះ លោក ឱម យ៉ិនទៀង ស្នើឲ្យរដ្ឋមន្ត្រីគ្រប់ក្រសួងទាំងអស់ គោរពយកស្ដង់ដារប្រឡងរបស់ក្រសួងអប់រំ ដើម្បីបង្កើនគុណភាពនៅតាមក្រសួង។

ថ្លែងនៅក្នុងពិធីជួបអ្នកស្ម័គ្រចិត្តអង្កេតការណ៍របស់អង្គភាពប្រឆាំងអំពើពុករលួយ នៅសាលាតិចណូ កាលពីថ្ងៃទី១៤ សីហា ប្រធាន ACU រូបនេះ បានបញ្ជាក់ដូច្នេះថា៖«យើងយកច្បាប់មកអនុវត្តដូចគ្នា ហើយយើងកំពុងតែចម្លងយក ប្រកាសរបស់ក្រសួងអប់រំដើម្បី ជូនទៅរដ្ឋមន្ត្រីផ្សេងៗទាំងអស់ សូមគួរយកចំណុចនេះដូចគ្នាទៅ ដើម្បីងាយស្រួល ពីព្រោះយើងតែងសង្កេតថា ក្រសួងខ្លះប្រឡងទៅ អនុរក្សនៅយកទូរសព្ទចូលបាន បានន័យថាគាត់នៅមានស្ដង់ដារខុសគ្នា។ ដូច្នេះយើងចង់ឲ្យយកស្ដង់ដារតែមួយ ងាយស្រួលដល់គាត់វិញ គាត់អាងយើងខ្ញុំ ឃើញបញ្ហាអីយើងអាចរាយការណ៍ទៅរដ្ឋមន្ត្រី ចឹងរដ្ឋមន្ត្រីនីមួយៗ គាត់មានសេនាធិការតែពីរ ទី១មន្ត្រីគាត់ គណៈកម្មការគាត់ ទី២គឺខាង ACU ក៏ធ្វើជាសេនាធិការឲ្យគាត់»។

កន្លងមកអង្គភាពប្រឆាំងអំពើពុករលួយ បានដាក់អ្នកសង្កេតការណ៍ប្រឡងតាមក្រសួងនានា ដូចជាក្រសួងសុខាភិបាល ក្រសួងសាធារណៈការ និងដឹកជញ្ជូន និងក្រសួងយុត្តិធម៌ ជាដើម ។ នេះបើតាមលោក ឱម យ៉ិនទៀង។

គួរបញ្ជាក់ថា ស្ដង់ដារប្រឡងរបស់ក្រសួងអប់រំ ដែលបានដាក់កំណត់មិនឲ្យបេក្ខជនណាលាក់សំណៅឯកសារ ឬគ្រឿងអេឡិចត្រូនិក ដូចជាទូរសព្ទដៃ និងប្រដាប់គិតលេខជាដើម ហើយត្រូវអនុរក្សរកឃើញ បេក្ខជននោះ នឹងត្រូវធ្លាក់ដោយស្វ័យប្រវត្តិ។ ចំណែកអនុរក្ស និងអ្នកអង្កេតការណ៍ ក៏មិនអនុញ្ញាតឲ្យប្រើប្រាស់ទូរសព្ទផងដែរ៕