ហ្វីលីពីន៖ ចិនធានាថាខ្លួនលែងបន្តវាតទីនៅតំបន់ជម្លោះសមុទ្រចិនខាងត្បូងទៀតហើយ

អន្តរជាតិ

ហ្វីលីពីន៖ ចិនធានាថាខ្លួនលែងបន្តវាតទីនៅតំបន់ជម្លោះសមុទ្រចិនខាងត្បូងទៀតហើយ

16, Aug 2017 , 9:39 pm

រូបភាព

រដ្ឋមន្ត្រីការពារជាតិហ្វីលីពីនលោក Delfin Lorenzana

ដោយ: សៅ ផលនិស្ស័យ (Sao Phal Niseiy)

រដ្ឋាភិបាលចិនបានធានាប្រាប់ហ្វីលីពីនថា ខ្លួនឈប់វាតទីឬកាន់កាប់កោះឬទីតាំងផ្សេងទៀតនៅតំបន់ជម្លោះសមុទ្រចិនខាងត្បូងហើយ។ ការធានារបស់ចិនចំពោះហ្វីលីពីននេះធ្វើឡើងស្របពេលសមាជិកសភាហ្វីលីពីនមួយចំនួនអះអាងថា ចិនទំនងត្រៀមលក្ខណៈដណ្តើមកាន់កាប់កោះថ្មីចោទៀតដែលហ្វីលីពីនកំពុងកាន់កាប់។

រដ្ឋមន្ត្រីការពារជាតិហ្វីលីពីនលោក Delfin Lorenzana បានអះអាងថា សមភាគីចិនបានឯកភាពឈប់បន្តកាន់កាប់ឬវាតទីនៅក្នុងតំបន់ជម្លោះសមុទ្រចិនខាងត្បូងទៀតហើយ។ ចិនចាត់ទុកថា ការរក្សាស្ថានភាពឲ្យនៅស្ថិតស្ថិរបច្ចុប្បន្នពិតជាសំខាន់ក្នុងការស្តារនិងអភិវឌ្ឍចំណងមិត្តភាពរវាងចិន និងហ្វីលីពីន។

យោងតាមទីភ្នាក់ងារព័ត៌មាន Reuters ប្រមុខការពារជាតិហ្វីលីពីនរៀបរាប់ពីជំហររបស់ចិនក្នុងការបញ្ឈប់សកម្មភាពវាតទីនៅតំបន់ជម្លោះនេះ ក្នុងពេលដែលលោកផ្តល់សក្ខីកម្មចំពោះសភាជុំស្ថានភាពបញ្ហាជម្លោះនេះ។ លោកបានសង្កត់ធ្ងន់ថា ចិននិងហ្វីលីពីនសម្រេចបានកិច្ចព្រមព្រៀងដែលហាមឃាត់ភាគីទាំងពីរក្នុងការកាន់កាប់កោះថ្មីៗផ្សេងទៀត។

«វាគ្មានការប្រែប្រួលកើតឡើងឡើយនៅសមុទ្រចិនខាងត្បូង ក្រោយមានការឯកភាពគ្នារវាងរដ្ឋមន្ត្រីការបរទេសប្រទេសទាំងពីរ។ បើតាមរដ្ឋមន្ត្រីការទេសយើង ចិននឹងមិនកាន់កាប់កោះឬតំបន់ថ្មីទៀតឡើយ ហើយចិនក៏មិនសង់សំណង់ថ្មីនៅថ្មប៉ប្រះទឹក Scarborough Shoal ដែរ»។ នេះជាសម្តីរបស់លោក Lorenzana ថ្លែងទៅកាន់សមាជិកសភាថ្ងៃអង្គារទី ១៥ សីហា។

ថ្វីបើរដ្ឋមន្ត្រីការពារជាតិបកស្រាយបែបនេះក៏ដោយ សមាជិកសភាហ្វីលីពីនបានលើកឡើងពីរបាយការណ៍ថ្មីមួយដែលបង្ហាញថា នាវាចិនធ្វើសកម្មភាពនៅកៀកកោះដែលហ្វីលីពីនកាន់កាប់ថែមទៀតផង។

លោក Gary Alejano បានស្រង់របាយការណ៍យោធាដែលបញ្ជាក់ថា នាវាចិនចំនួនប្រាំគ្រឿងបានធ្វើដំណើរក្បែរកោះ Thitu ស្ថិតក្នុងប្រជុំកោះ Spratlys ផងនោះ ហើយនាវាទាំងនោះមិនអនុញ្ញាតឲ្យនាវាឈ្លបយកការណ៍ផ្លូវសមុទ្រចូលទៅក្បែរឡើយ។ បើតាមទីភ្នាក់ងារព័ត៌មាន Reuters កោះ Thitu ជាកោះដ៏ធំបំផុតមួយក្នុងចំណោមថ្មប៉ប្រះទឹកទាំងប្រាំបួនដែលហ្វីលីពីនកាន់កាប់នៅប្រជុំកោះ Spratlys។

យ៉ាងណាក៏ដោយចុះ ទំនាក់ទំនងរវាងចិននិងហ្វីលីពីនត្រឡប់មករកភាពល្អប្រសើរវិញក្រោយពេលដែលប្រធានាធិបតី រ៉ូឌ្រីហ្គោ ឌូទើតេឡើងកាន់អំណាចនៅឆ្នាំ ២០១៦។ លោកប្រកាសថា ហ្វីលីពីនរក្សានយោបាយការបរទេសឯករាជ្យ និងអព្យាក្រឹត្យ ហើយក៏ទុកជម្លោះមួយលែកដើម្បីស្តារទំនាក់ទំនងជាមួយចិនឡើងវិញផងដែរ។

សូមបញ្ជាក់ថា ចិនបានទាមទារយកសមុទ្រចិនខាងត្បូងស្ទើរតែទាំងស្រុង ខណៈដែលភាគីផ្សេងទៀតដូចជាហ្វីលីពីន ព្រុយណេ ម៉ាឡេស៊ី វៀតណាម និងតៃវ៉ាន់ក៏ទាមទារដូចគ្នា។ ក្រុងប៉េកាំងក៏បានសាងសង់កោះចំនួនប្រាំពីរលើថ្មប៉ប្រះទឹកនៅតំបន់ជម្លោះសមុទ្រចិនខាងត្បូង ហើយក្នុងចំណោមកោះទាំងនោះមានកោះចំនួនបីអាចឲ្យយន្តហោះចម្បាំងចុះចតបាន។ វាមានផ្លូវយន្តហោះរត់ រ៉ាដា និង ប្រព័ន្ធមីស៊ីលផងដែរ។ ឯចិនអះអាងឧបករណ៍យោធានៅលើកោះ គឺទុកប្រើប្រាស់ដើម្បីការពារខ្លួនប៉ុណ្ណោះ៕