លោក ឃួង ស្រេង បញ្ជាឲ្យអាជ្ញាធរខណ្ឌសែនសុខ ត្រួតពិនិត្យការដ្ឋានសាងសង់ក្រុមហ៊ុន «ប៊ូយ៉ុងថោន»ឡើងវិញ

ជាតិ

លោក ឃួង ស្រេង បញ្ជាឲ្យអាជ្ញាធរខណ្ឌសែនសុខ ត្រួតពិនិត្យការដ្ឋានសាងសង់ក្រុមហ៊ុន «ប៊ូយ៉ុងថោន»ឡើងវិញ

17, Aug 2017 , 3:14 pm

រូបភាព

អភិបាលរាជធានីភ្នំពេញលោក ឃួង ស្រេង ចុះត្រួតពិនិត្យការដ្ឋានសាងសង់របស់ក្រុមហ៊ុន ប៊ូយ៉ុងថោន នៅព្រឹកថ្ងៃទី១៧ សីហា

ដោយ: ធឿន បញ្ញាឬទិ្ធ

អភិបាលរាជធានីភ្នំពេញ បានបង្គាប់ឲ្យអាជ្ញាធរខណ្ឌសែនសុខ ចុះត្រួតពិនិត្យលើការដ្ឋានសាងសង់ក្រុមហ៊ុន «ប៊ូយ៉ុងថោន» ឡើងវិញ។ ការណែនាំរបស់លោក ឃួង ស្រេង នេះធ្វើឡើងក្រោយពីក្រុមហ៊ុនបរទេសមួយនេះ បានជីកដីសាងសង់បាក់ស្រុតចុះ ដែលអាចបង្កឲ្យប៉ះពាល់ដល់ផ្លូវសាធារណៈ។

លោក ឃួង ស្រេង ដែលបានដឹកនាំក្រុមការងារចុះត្រួតពិនិត្យការដ្ឋានសាងសង់ក្រុមហ៊ុន «ប៊ូយ៉ុងថោន» ឃើញថា ក្រុមហ៊ុននេះ មិនបានរៀបចំការពារសុវត្ថិភាពសាងសង់ឲ្យបានត្រឹមត្រូវឡើយ ទើបបានជាបង្កឲ្យមានហេតុការណ៍បាក់ស្រុតដីនៅក្នុងការដ្ឋាន កន្លងមកនេះ។ លោក ឃួង ស្រេង បានបង្គាប់ឲ្យអាជ្ញាធរខណ្ឌសែនសុខ ចុះត្រួតពិនិត្យលើការដ្ឋានសាងសង់ក្រុមហ៊ុន «ប៊ូយ៉ុងថោន» ឡើងវិញ ដើម្បីទប់ស្កាត់បញ្ហាដែលអាចកើតឡើងជាយថាហេតុ ប៉ះពាល់ដល់ការធ្វើដំណើរបស់ប្រជាពលរដ្ឋ នៅតាមផ្លូវសហព័ន្ធរុស្ស៊ី។

ថ្លែងចំពោះមុខអ្នកសារព័ត៌មាន នៅព្រឹកថ្ងៃទី១៧ សីហានេះ អភិបាលរាជធានីភ្នំពេញ បានបញ្ជាក់ថា៖«តាមការមើលជាក់ស្ដែង ប៉ុន្តែខ្ញុំមិនមែនជាអ្នកបច្ចេកទេសខាងសាងសងទេ។ ប៉ុន្តែខ្ញុំឃើញថា គាត់ជីកដីមកដល់របងសាងសង់ហើយ (ជិតដល់ផ្លូវសហព័ន្ធរុស្ស៊ី) ព្រោះគាត់ជីកមកកៀករបងពេក ដូច្នេះវាមកពីខ្វះការត្រួតពិនិត្យ ហើយក៏ជាកំហុសរបស់អាជ្ញាធរដែរ។ អាជ្ញាធរដែនដីត្រូវត្រួតពិនិត្យលើរឿងនេះ ហេតុអ្វីគាត់ជីកមកដល់របងហើយ ដែលអត់មានអ្នកឆែកឆេរច្បាប់សាងសង់គាត់…។ ដូច្នេះអ្នកកាន់ការងារនេះ ត្រូវត្រួតពិនិត្យការងារខ្លួនឡើងវិញ»។

ទាក់ទងនឹងសំណង់អគារធំៗ និងខុនដូរកន្លងមក សាលារាជធានីភ្នំពេញ តែងតែទទួលពាក្យបណ្ដឹងពីប្រជាពលរដ្ឋ ដែលបានប្ដឹងចំពោះម្ចាស់ក្រុមហ៊ុនទាំងនោះ ដោយសារតែការសាងសង់របស់ក្រុមហ៊ុនខ្វះការការពារសុវត្ថិភាព បង្កក្តីព្រួយបារម្ភដល់ពួកគាត់។ ជុំវិញបញ្ហានេះ លោក ឃួង ស្រេង ស្នើឲ្យម្ចាស់ក្រុមហ៊ុនបរទេស ដែលមកដាក់ទុនវិនិយោគ និងសាងសង់អគារធំៗនៅកម្ពុជា អនុវត្តស្ដង់ដារសាងសង់ឲ្យបានស្របច្បាប់ ចៀសវាងបង្កគ្រោះថ្នាក់ដល់ប្រជាពលរដ្ឋ។

ក្រុមហ៊ុន ប៊ូយ៉ុងថោន កំពុងបើកការដ្ឋានសាងសង់អគារ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ៕