កីឡាជាតិ
ជាតិ
សម្តេច ហ៊ុន សែន ឲ្យរៀបចំក្បូនម៉ូតូស១០គ្រឿងដង្ហែមេដាយមាសប៉ារ៉ាឡាំពិក យ៉ាវ វណ្ណៈ សម្តេច ហ៊ុន សែន ថ្លែងក្នុងពិធីជួបសំណេះសំណាលជាមួយប្រតិភូ ASEAN Para Games នៅវិមានសន្តិភាព
× សម្តេចនាយករដ្ឋមន្ត្រី ហ៊ុន សែន បញ្ជាឲ្យក្រសួងអប់រំ យុវជន និងកីឡារៀចចំក្បូនម៉ូតូសចំនួន១០គ្រឿងដង្ហែមេដាយមាសកម្រិតអាស៊ីរបស់កីឡាករ យ៉ាវ វណ្ណៈ ដែលដណ្តើមបានពីការប្រកួតកីឡាប៉ារ៉ាឡាំពិករដូវក្តៅយុវជនពិការនៅសាធារណរដ្ឋកូរ៉េនៅល្ងាច។ ការបញ្ជានេះ ធ្វើឡើងក្នុងពិធីប្រគល់ប្រាក់រង្វាន់លើកទឹកចិត្តដល់ម្ចាស់មេដាយមាស និងសំរឹទ្ធដល់អត្តពលិកប៉ារ៉ាឡាំពិកកម្ពុជា និងការជួបសំណេះសំណាលប្រតិភូកីឡា ASEAN Para Games កាលពីព្រឹកថ្ងៃទី១៨ សីហា នៅវិមានសន្តិភាព។
ដើម្បីលើកទឹកកីឡាករជនពិការ ក៏ដូចជាលើកតម្លៃកម្រិតមេដាយកីឡាជនពិការឲ្យស្មើភាពជាមួយកីឡាធម្មតា សម្តេចនាយករដ្ឋមន្ត្រី ហ៊ុន សែន បានបញ្ជាឲ្យក្រសួងពាក់ព័ន្ធរៀបចំក្បួនម៉ូតូ ស ចំនួន១០គ្រឿង ដើម្បីដង្ហែមេដាយមាសកម្រិតអាស៊ីរបស់កីឡាករ យ៉ាវ វណ្ណៈ នៅល្ងាចថ្ងៃទី១៨ ខែសីហា នេះ។ ក្បូនដង្ហែនេះនឹងចេញដំណើរពីទីស្នាក់ការគណៈកម្មាធិការជាតិអូឡាំពិកកម្ពុជាឆ្ពោះទៅកាន់វិមានឯករាជ្យរួចបន្តដំណើរទៅសណ្ឋាគារសុខាដោយបញ្ចប់នៅទីនោះតែម្តង។
ក្នុងឱកាសនោះដែរ សម្តេច ហ៊ុន សែន បានបញ្ជាមន្ត្រីក្រោមបង្គាប់រៀបចំពិធីជប់លៀងនៅល្ងាចនេះ ដើម្បីអបអរដល់ប្រតិភូកីឡា គ្រូបង្វឹក គ្រូជំនួយ និងអត្តពលិកពិការមុនចេញដំណើរទៅចូលរួមការប្រកួតក្នុងព្រឹត្តិការណ៍ ASEAN Para Games នៅទីក្រុងកូឡាឡាំពួ ប្រទេសម៉ាឡេស៊ីចន្លោះពីថ្ងៃទី១៧ ដល់ថ្ងៃទី២៣ ខែកញ្ញា ខាងមុខនេះទៀតផង។
គួរបញ្ជាក់ថា មេដាយរបស់កីឡាករ យ៉ាវ វណ្ណៈ ឈ្នះលើវិញ្ញាសាហែលទឹកចម្ងាយ៥០ម៉ែត្រសេរីនៅក្នុងព្រឹត្តិការណ៍កីឡាប៉ារ៉ាឡាំពិករដូវក្តៅយុវជនពិការនៅសាធារណៈរដ្ឋកូរ៉េ ខណៈកីឡាករ យ៉យ កុសល ទទួលបានមេដាយសំរឹទ្ធលើវិញ្ញាសាវាយកូនឃ្លីលើតុ៕
Tag:
សម្តេច ហ៊ុន សែន
យ៉ាវ វណ្ណៈ
ប៉ារ៉ាឡាំពិក
© រក្សាសិទ្ធិដោយ thmeythmey.com