អន្តរជាតិ
អ្នកដំណើរបរទេសអាចប្រើប្រព័ន្ធត្រួតពិនិត្យលិខិតឆ្លងដែនស្វ័យប្រវត្តិនៅអាកាសយានដ្ឋានសុវណ្ណភូមិ រូបភាព៖ Bangkok Post
× រដ្ឋាភិបាលថៃសម្រេចដាក់ច្រកទ្វារត្រួតពិនិត្យលិខិតឆ្លងដែនស្វ័យប្រវត្តិចំនួន ប្រាំបីកន្លែងនៅអាកាសយានដ្ឋានអន្តរជាតិសុវណ្ណភូមិ ដោយអ្នកដំណើរមិនចាំបាច់ចាំតម្រង់ជួរឆ្លងកាត់ប៉ុស្តិ៍អន្តោប្រវេសន៍ឡើយ។ ប៉ុន្តែជំហានដំបូង មានតែប្រជាជនសិង្ហបុរីប៉ុណ្ណោះដែលអាចប្រើប្រាស់ប្រព័ន្ធនេះបាន។
ម៉ាស៊ីនត្រួតពិនិត្យលិខិតឆ្លងដែនចំនួនប្រាំបីកន្លែងត្រូវបានអាជ្ញាធរថៃដាក់ឲ្យដំណើរការនៅអាកាសយាន្តដ្ឋានអន្តរជាតិសុវណ្ណភូមិចាប់ពីថ្ងៃសៅរ៍ទី ១៩ ខែសីហា។ ថៃកំពុងពិចារណាបន្ថែមម៉ាស៊ីទាំងនេះទៅកាន់អាកាសយានដ្ឋានផ្សេងទៀតដូចជា ដូនមឿង និងភូកេតជាដើម។
សារព័ត៌មានថៃ បាងកកប៉ុស្តិ៍ស្រង់សម្តីប្រធានការិយាល័យអន្តោប្រវេសន៍ Nathatorn Prousoontorn ថា ម៉ាស៊ីនត្រួតពិនិត្យលិខិតឆ្លងដែនស្វ័យប្រវត្តិនេះត្រូវបានដាក់ដំណើរការសម្រាប់ជនជាតិថៃតាំងពីឆ្នាំ ២០១២ ម្ល៉េះ។ ប៉ុន្តែដើម្បីសម្រួលដល់ការត្រួតពិនិត្យឯកសារឆ្លងកាត់របស់អ្នកដំណើរនិងកាត់បន្ថយពេលវេលាសម្រាប់រង់ចាំ ការិយាល័យលោកសម្រេចដាក់ឲ្យអ្នកដំណើរបរទេសប្រើប្រាស់ប្រព័ន្ធនេះតែម្តង។
ប្រព័ន្ធត្រួនិត្យនេះនឹងស្រង់យកព័ត៌មានរបស់អ្នកដំណើរ និងស្នាមក្រយៅដៃដើម្បីកំណត់អត្តសញ្ញាណអ្នកដំណើរដែលឆ្លងដែនចូលថៃនោះ។ វាក៏ភ្ជាប់ជាមួយប្រព័ន្ធកំណត់អត្តសញ្ញាណអ្នកដំណើរពេលចូល Check in ត្រៀមហោះហើរដូចគ្នា។
តាមពិតទៅ ការសម្រេចដាក់ប្រព័ន្ធត្រួតពិនិត្យលិខិតឆ្លងដែនដោយស្វ័យប្រវត្តិនេះជាការឆ្លើយតបនឹងការ ការរិះគន់អាជ្ញាថៃរឿងតម្រូវឲ្យអ្នកដំណើរចំណាយពេលយូរដើម្បីឆ្លងកាត់កន្លែងប៉ុស្តិ៍អន្តោប្រវេសន៍នៅព្រលានយន្តហោះ។ កាលពីខែមុនអ្នកដំណើរត្អូញត្អែរនិងរិះគន់អាកាសយាន្តដ្ឋានដូនមឿងយ៉ាងចាស់ដៃព្រោះពួកគេត្រូវចំណាយពេលរហូតដល់បួនម៉ោងរង់ចាំ។
-ប្រជាជនសិង្ហបុរីអាចប្រើប្រាស់បានមុនគេ
បើតាមការផ្សព្វផ្សាយរបស់ទំព័រហ្វេសប៊ុកផ្លូវការរបស់ស្ថានទូតថៃប្រចាំសិង្ហបុរី សិង្ហបុរីនឹងក្លាយជាប្រទេសដំបូងគេដែលអាចប្រើប្រាស់ច្រកទ្វារត្រួតពិនិត្យលិខិតឆ្លងដែនស្វ័យប្រវត្តិនៅអាកាសយានដ្ឋានអន្តរជាតិសុវណ្ណភូមិប្រទេសថៃបានចាប់ពីចុងសប្តាហ៍នេះ។ នេះមានន័យថា អ្នកដំណើរជនជាតិសិង្ហបុរីអាចប្រើប្រាស់ប្រព័ន្ធនេះដោយមិនចាំបាច់តម្រង់ជួរចាំមន្ត្រីអន្តោប្រវេសន៍ត្រួតពិនិត្យដូចមុនឡើយ។
សេចក្តីប្រកាសដដែលស្រង់សម្តីមន្ត្រីការិយាល័យអន្តោប្រវេសន៍ថៃថា ជាជំហានដំបូង ច្រកទ្វារត្រួតពិនិត្យលិខិតឆ្លងដែនពីរកន្លែងត្រូវបើកឲ្យប្រជាជនសិង្ហបុរីប្រើប្រាស់។ សូមទាញការចាប់អារម្មណ៍បន្តិចថា ប្រជាជនសិង្ហបុរីធ្វើដំណើរទៅកាន់ប្រទេសថៃប្រហែល មួយលាននាក់រៀងរាល់ឆ្នាំ។
ការសម្រេចឲ្យប្រជាជនសិង្ហបុរីប្រើប្រាស់ដំបូងគេនេះគឺធ្វើឡើងតាមការវិភាគនិងវាយតម្លៃផ្នែកសន្តិសុខនិងផ្អែកលើកិច្ចព្រមព្រៀងដែលមានរួមគ្នា។ ក្រោយថៃអនុញ្ញតឲ្យប្រជាជនសិង្ហបុរីប្រើប្រាស់ច្រកទ្វារត្រួតពិនិត្យលិខិតឆ្លងដែនដោយស្វ័យប្រវត្តិនេះ អាជ្ញាធរសិង្ហបុរីក៏ត្រៀមសម្រួលដល់អ្នកដំណើរជនជាតិថៃដូចគ្នា៕
Tag:
ថៃ
សិង្ហបុរី
Nathatorn Prousoontorn
© រក្សាសិទ្ធិដោយ thmeythmey.com