អន្តរជាតិ
មីយ៉ាន់ម៉ា ពិចារណាហៅសកម្មភាពនៅតំបន់ជម្លោះរ៉ូហ៊ីងយ៉ាថាជា«ភេរវកម្ម»ដើម្បីបន្តចាត់វិធានការអន្តរជាតិ រូបភាព៖ Public Radio International
× មេដឹកនាំកំពូល de facto មីយ៉ាន់ម៉ា លោកស្រី អ៊ុងសាន ស៊ូជី បាននិងកំពុងតែពិភាក្សាជាមួយនឹងមេដឹកនាំយោធាចម្បងៗដើម្បីប្រើប្រាស់ការហៅមួយផ្លូវការទៅលើអំពើហិង្សាដែលកើតឡើងនៅរដ្ឋជម្លោះ Rakhine ។ កិច្ចពិភាក្សាដឹកនាំដោយលោកស្រីស៊ូជី ធ្វើឡើងស្របពេលសហគមន៍អន្តរជាតិ បន្តចោទរដ្ឋាភិបាលមីយ៉ាន់ម៉ា ពីភាពអសកម្មក្នុងរឿងហិង្សាជាតិសាសន៍ម៉ូស្លីមរ៉ូហ៊ីងយ៉ា និងក្រុមពុទ្ធសាសនិកនៅរដ្ឋ Rakhine។
អ្នកនាំពាក្យរដ្ឋាភិបាលមីយ៉ាន់ម៉ា លោក Zaw Htay បានឲ្យដឹងថា ទីប្រឹក្សារដ្ឋលោកស្រី អ៊ុងសាន ស៊ូជី និងមេដឹកនាំយោធា កំពុងតែពិភាក្សាគ្នាក្នុងការហៅក្រុមបង្កហិង្សានៅរដ្ឋ Rakhine ជាអង្គការភេវរជន។ អ្នកនាំពាក្យ ក៏បានអះអាងថា រដ្ឋាភិបាល បានសម្រេចចាត់ទុកសកម្មភាពទាំងនោះថា «សកម្មភាពភេរវជន»ទៀតផង។ នេះបើយោងតាមការចុះផ្សារបស់សារព័ត៌មានមីយ៉ាន់ម៉ា The Irrawaddy នៅថ្ងៃទី១៧ សីហា។
សូមរម្លឹកបន្តិចថា នៅខែតុលាឆ្នាំមុន មានការប៉ះទង្គិចគ្នារវាងកងកម្លាំងរដ្ឋាភិបាលមីយ៉ាន់ម៉ា ជាមួយនឹងក្រុមឧទ្ទាម ដែលភាគីរដ្ឋាភិបាលមីយ៉ាន់ម៉ា បានអះអាងថា ពួកក្រុមនេះ បានវាយប្រហារមកលើប៉ូលិសតម្រួតព្រំដែន ដែលបានឲ្យមានប៉ូលិសយ៉ាងតិច៩នាក់ស្លាប់។
ការប៉ះទង្គិចនេះ មិនបានបញ្ចប់ភ្លាមៗឡើយ ពោលគឺ កងកម្លាំងរដ្ឋាភិបាលមីយ៉ាន់ម៉ា បានបើកការវាយប្រហារទ្រង់ទ្រាយធំទៅលើក្រុមនោះ ដោយថែមចោទថាក្រុមនេះ ជាក្រុមជនជាតិភាគតិចរ៉ូហ៊ីងយ៉ា ដែលកំពុងតែរស់នៅ ក្រោមការរើសអើង ពីប្រជាជនភាគច្រើនមីយ៉ាន់ម៉ា ក្នុងតំបន់ជម្លោះនោះស្រាប់។ ជាផលប៉ះពាល់នៃការប៉ះទង្គិចនេះ មានជនជាតិរ៉ូហ៊ីងយ៉ា មកទល់នេះ ក៏នៅតែបន្តភៀសខ្លួន ដោយពួកគេអះអាងថា បានរងការធ្វើបាបពីកងកម្លាំង ខណៈ រដ្ឋាភិបាលលោកស្រី ស៊ូជី ក៏ទទួលសម្ពាធអន្តរជាតិ ពីការបន្តឲ្យរឿងនៅតែអាក្រក់។
ដោយឡែកជុំវិញ ការហៅឈ្មោះក្រុមបង្កហិង្សា ថាជាអង្គការភេរវជននេះដែរ ពិតជាសំខាន់សម្រាប់រដ្ឋាភិបាលមីយ៉ាន់ម៉ា ។ បើពួកក្រុមនេះ ដែលរាប់បញ្ចូលទាំងក្រុមជនជាតិភាគតិចរ៉ូហ៊ីងយ៉ាមួយចំនួន ត្រូវចាត់ទុកថា ជាក្រុមភេរវជនហើយនោះ ពួកគេ មិនទទួលបានជំនួយពីអង្គការអន្តរជាតិទៀត ហើយសារព័ត៌មានអន្តរជាតិ ក៏មិនដាក់កំហុសមីយ៉ាន់ម៉ា ក្រោមបរិបទបំពានសិទ្ធិមនុស្សទៀតដែរ៕
Tag:
មីយ៉ាន់ម៉ា
រ៉ូហ៊ីងយ៉ា
អាស៊ាន
© រក្សាសិទ្ធិដោយ thmeythmey.com