គូឡាឡាំពួរ៖ ក្រុមកីឡាករបាល់ទាត់ជម្រើសជាតិអាយុក្រោម២២ឆ្នាំកម្ពុជា បានបាត់បង់ឱកាសទៅកាន់វគ្គពាក់កណ្តាលផ្តាច់ព្រ័ត្រនៃព្រឹត្តិការណ៍កីឡាស៊ីហ្គេមហើយ បន្ទាប់ពីពួកគេបានចាញ់ថៃ ៣-០ នៅកីឡដ្ឋាន MP Selayang Stadium នារាត្រីថ្ងៃទី២០ ខែសីហា។ លោក Leonardo Vitorino បានថ្លែងប្រាប់អ្នកសារព័ត៌មានក្រោយការប្រកួតថា កំហុសដដែលរបស់កីឡាករបានធ្វើឲ្យគូប្រជែងមានប្រៀប និងបន្តការមានប្រៀប ប៉ុន្តែទោះបីជាយ៉ាងណាក៏ដោយ គ្រូបង្វឹកប្រេស៊ីលរូបនេះ បានវាយតម្លៃថា U22 កម្ពុជា មានការប្រឹងប្រែងខ្ពស់ក្នុងជំនួបជាមួយថៃដែលពោរពេញទៅដោយបទពិសោធន៍។
ក្រោយការវាយលុកជាច្រើនលើក U22 ថៃ មានគ្រាប់បាល់បញ្ចូលទីដំបូងលើកម្ពុជា នៅនាទី៣៥ បន្ទាប់ពី ច្រឹង ពលរដ្ឋ មិនអាចទាត់បាល់ឲ្យចេញឆ្ងាយពីមុខអ្នកចាំទី អ៊ុំ សេរីរ័ត្នន៍។ ខ្សែប្រយុទ្ធថៃ Picha Au-Tra ជាអ្នកសម្រាប់ឱកាសមាស។
នៅនាទីចុងក្រោយនៃវគ្គទីមួយ អាជ្ញាកណ្តាលឥណ្ឌា លោក Nagvenkar Tenas បានផ្តល់កាតក្រហម ជាបន្តបន្ទាប់ដល់ខ្សែបម្រើថៃ Chaiyawat Buran និងខ្សែប្រយុទ្ធកម្ពុជា សុក សំណាង ក្រោយការប៉ះទង្គិចគ្នាមួយ។ ក្រុមទាំងពីរនៅសល់គ្នា១០នាក់រៀងៗខ្លួន សម្រាប់ការប្រកួតក្នុងវគ្គទីពីរ។
ខ្សែការពារ ណុប តុលា បានបង្កកំហុសលើខ្សែប្រយុទ្ធនៅក្នុងប្រអប់គ្រោះថ្នាក់ ហើយ Nattawut Sombayotha បានស៊ុតបាល់ប៉េណាល់ទីបានសម្រេចនៅនាទី៧៦ ហើយបន្ថែមមួយគ្រាប់ទៀតនៅនាទី៨៧ នាំឲ្យថៃរក្សាលទ្ធផលឈ្នះ ៣-០ រហូតដល់បញ្ចប់ការប្រកួត។
នាសន្និសីទសារព័ត៌មាន លោក Leonardo Vitorino បានថ្លែងឲ្យដឹងថា នេះជាលើកដំបូងដែលលោកប្រើប្រាស់ខ្សែការពារក្រោម៣នាក់ ហើយតម្លើងកម្លាំងនៅតំបន់បម្រើ។ លោកអះអាងថា៖ «នៅវគ្គទីមួយយើងធ្វើបានល្អ ខណៈថៃ មានខ្សែបម្រើស្លាបល្អ ខ្សែបម្រើប្រកបគុណភាព ប៉ុន្តែកំហុសដដែលរបស់កីឡាករដដែលបានធ្វើឲ្យគូប្រជែងមានប្រៀប និងបន្តការមានប្រៀប។ ពួកគេជាសំណព្វចិត្ត [Idol] របស់ក្រុមអ្នកគាំទ្រ ខ្ញុំគិតថា វាហាក់ដូចជាលឿនពេកហើយសម្រាប់ពួកគេក្នុងការក្លាយជា Idol »។
ទោះបីជាយ៉ាងណាក៏ដោយ គ្រូបង្វឹកប្រេស៊ីលរូបនេះ បានអះអាងថា ក្រុមលោកធ្វើបានល្អប្រសើរហើយក្នុងជំនួបជាមួយក្រុមដែលពោរពេញដោយគុណភាពដូចជាថៃ។ «ខ្ញុំក៏មិនខកចិត្តជ្រុលនោះដែរ យើងធ្វើបានល្អហើយ ដោយក្រុមទាំងមូលបាត់បង់សមាជិកឆ្នើម៣នាក់ ក្នុងនោះ ខ្សែការពារម្នាក់ជាប់ពិន័យកាតក្រហម និង២នាក់ទៀតត្រូវត្រឡប់ទៅប្រឡងសញ្ញាបត្រមធ្យមសិក្សាទុតិយភូម [អ៊ិន សូដាវីដ និងសឿត បារាំង] »។ នេះជាការលើកឡើងរបស់លោក Leonardo។
រយៈពេល៥ឆ្នាំដែលលោកត្រូវបានតែងតាំងជាគ្រូបង្វឹកក្រុមជម្រើសជាតិ និងឈុតស៊ីហ្គេម លោក Leonardo បានបញ្ជាក់ថា លោកបានធ្វើការជាមួយឈុតយុវជនវ័យក្មេងកម្ពុជានេះ ត្រឹម២ខែ ប៉ុន្តែលោកមើលឃើញពីការរីកចម្រើនរបស់ពួកគេ។
U22 កម្ពុជា បានរងបរាជ័យជាបន្តបន្ទាប់សម្រាប់ការប្រកួតនៅក្នុងពូល B នៃព្រឹត្តិការណ៍កីឡាស៊ីហ្គេមនេះ ដោយបើកឆាកចាញ់ហ្វីលីពីន ២-០ បន្តចាញ់វៀតណាម ៤-១ និងចាញ់ថៃ ៣-០ ។ បរាជ័យទាំងបីប្រកួតជាប់ៗគ្នា បាននាំឲ្យកម្ពុជា បាត់បង់កៅអីដោយស្វ័យប្រវត្តិទៅកាន់វគ្គបន្ត។
នៅថ្ងៃអង្គារ ទី២២ ខែសីហា U22 កម្ពុជា ត្រូវតទល់ជាមួយទីម័រខាងកើត ដែលជាក្រុមហាលអាវដូចគ្នា។ នាការប្រកួតបីលើកកន្លងមក ទីម័រខាងកើត ចាញ់វៀតណាម ៤-០ ចាញ់ថៃ ១-០ និងចុងក្រោយចាញ់ឥណ្ឌូណេស៊ី ១-០ ៕